बागमती सरकारले आकार घटाएर ४४ अर्ब हाराहारीको बजेट ल्याउँदै

A+ A A-

बागमती प्रदेश सरकारले आगामी आर्थिक वर्षको बजेट आज सोमबार ल्याउँदैछ । साँझ ५ बजे प्रदेशको आर्थिक मामिला तथा योजनामन्त्री कैलाश ढुंगेलले आव २०७७/०७८ को बजेट प्रदेशसभामा प्रस्तुत गर्दैछन् ।

कोरोना भाइरस संक्रमण र लामो समयसम्म भएको लकडाउनले देशको आर्थिक क्षेत्रमा परेको असरकै बेला बागमती प्रदेशले आगामी आवको बजेट ल्याउने तयारी पूरा गरिसकेको छ । कोरोना महामारीले निम्त्याएको जटिलताका बीच चालु आवको तुलनामा बजेटको आकार घटेर आउने मन्त्रालयले जनाएको छ ।

आज प्रस्तुत हुने आगामी आवको बजेट ४४ अर्ब हाराहारीको हुने मन्त्रालयले जानकारी दिएको छ । प्रदेशले चालु आवमा ४७ अर्ब ६० करोड ७८ लाख रुपैयाँको बजेट ल्याएको थियो । कोरोनाका कारण अर्थतन्त्रमा पर्ने प्रभावको मूल्यांकन गर्दै प्रदेशले आगामी आवको बजेट तयार गरेको मन्त्री ढुंगेलले बताए ।

बजेटमा प्रदेश सरकारले कृषि, स्वास्थ्य, शिक्षा, पूर्वाधार निर्माण र रोजगारीलाई प्राथमिकता दिएको मन्त्री ढुंगेलको भनाई छ । ‘कृषिमा अनुदान भन्दा पनि कृषि ऋणलाई प्राथमिकता दिइएको छ । विदेशमा रहेका हजारौं युवा स्वदेश फर्कने तयारीमा रहेका छन् । स्वदेशमै रहेका युवा पनि बेरोजगार रहेको अवस्थामा कृषिलाई प्राथमिकता दिइएको हो’ मन्त्री ढुंगेलले भने ।

प्रदेशले ६६ वटै निर्वाचन क्षेत्र र १ सय १९ वटै स्थानीय तहलाई लाभ हुने प्रकृतिको विशेष कार्यक्रम बजेटमार्फत ल्याउन लागेको मन्त्रालयको दावी छ । त्यस्तै, बागमती सरकारलाई संघीय सरकारले १४ अर्ब ८६ करोड ९८ लाख रुपैयाँ अनुदान दिएको छ । जुन समानीकरण, सशर्त, विशेष र समपुरक अनुदान हो ।