विदेशिनेका दु:ख- गाली गर्दै गए, स्वर्ग भन्दै आए

A+ A A-

धुनषाका श्यामकुमार शाह बंगलादेशको इस्लामिक विश्वविद्यालयमा अध्ययनरत थिए । कोरोना भाइरसको संक्रमण फैलिएसँगै विश्वविद्यालय बिदा भएपछि कोठामै ३ महिना बसेर आइतवार साँझ मात्र उनी स्वदेश फर्किएका छन् ।

ढिलै भए पनि स्वदेश फर्कन पाएकोमा धेरै खुसी छन् उनी । आफनो देश आकाशबाट देख्दा पनि धेरै खुसी भएका शाह नेपाल आइपुगे पनि अब के गर्ने होला भन्ने चिन्तामा छन् ।

विदेशी नागरिकलाई कोरोना भाइरसको संक्रमणबाट जोगाउन स्वास्थ्य परीक्षणदेखि व्यक्तिगत सुरक्षामा समेत बंगलादेशले राम्रो काम गरेको देखेका शाह नेपालमा पनि यही अपेक्षा गर्छन् ।

बंगलादेशमै बीएस्सी नर्सिङ अध्ययनरत सोनिया सिंजाली पनि स्वदेश फर्कन पाउँदा धेरै खुसी छिन् । आफ्नो देशको माटोमा टेक्दा धेरै खुसी लागेको र कोरोनाको त्रास नै हराएको उनले विमानस्थलबाट ओर्लंदै गर्दा बताइन् ।

‘बंगलादेशमा बस्दा कोरोना भाइरसको त्रासले ३ महिना राम्रोसँग खाना पनि रुचेन,’ शिलापत्रसँग उनले भनिन्, ‘नेपाल फर्किने भनेपछि कति बेला पुगिन्छ जस्तो भएको थियो । नेपाल आएपछि कोरोना भाइरसको महामारी छ जस्तो लागेको छैन ।’

अध्ययनका सिलसिलामा बंगलादेश पुगेका नेपाली संकटको बेला आफ्नो देशको यादले सताउने मीठो अनुभव बोकेर फर्किएको बताउँछन् ।

सबैको एकैखाले अनुभव छ– नेपाल फर्किएपछि कोरोनाको मानसिक तनाव हरायो ।

अध्ययन सकेपछि नेपाल फर्किएर दुर्गम जिल्लामा गएर स्वास्थ्य क्षेत्रमा सेवा गर्ने इच्छा सिंजालीको छ । उनमा बंगलादेश जाने बेला जस्तो उत्साह थियो, अहिले त्याे उत्साह सबै मरेको छ । भन्छिन्, ‘कहिले अध्ययन सकिएला र आफ्नै देश फर्केर काम गर्नु जस्तो भएको छ ।’

आइतबार नै बंगलादेशबाट स्वदेश फर्किएका सिराहाका राजीव यादवको पनि धेरैपछि मनमा खुसी छाएको छ । कोरोना भाइरसका कारण ३ महिना बंगलादेश बस्दा ३० वर्ष जेलमा बसेजस्तो अनूभूति भएको उनले सुनाए ।

‘कोरोना भाइरसको त्रासले ज्यान नै खाएको थियो । पढाइतिर ध्यान थिएन । कहिले नेपाल फर्कन पाइन्छ भन्ने मात्र थियो’, उनले भने, ‘मिल्ने भए नेपालमै पढ्ने थिए । तर, पढाइ सकिन लागेको छ । त्यही भए पनि फेरि बंगलादेश जानुपर्छ । अब कोरोना नियन्त्रण भएपछि मात्र जान्छु ।’

अध्ययन सकिएपछि नेपाल नै फर्किएर त्यहाँ पढेको ज्ञान र सीपअनुसार काम गर्ने उनको भनाइ छ ।

आइतबार सरकारले बंगलादेशबाट १ सय ५८ जना विद्यार्थी नेपाल एयरलाइन्समार्फत स्वदेश फर्काएको छ । उनीहरू बंगलादेश अध्ययनका लागि गएका थिए ।

बंगलादेशमा करिब ५ हजार विद्यार्थी विभिन्न विश्वविद्यालयमा अध्ययनरत छन् । कोरोना त्रासका कारण करिब २ हजार विद्यार्थी भारत हुँदै नेपाल फर्किइसकेका छन् ।

अझै १ हजार विद्यार्थी उद्धारको प्रतीक्षामा रहेको नेपाल फर्किएका विद्यार्थी बताउँछन् । सरकारले आइतबार बंगलादेशबाट उद्धार गरेका विद्यार्थी आफनै खर्चमा फर्किएको बताएका छन् ।

उनीहरू १ सय ६५ अमेरिकी डलर हवाई खर्च तिरेर फर्किएका हुन् । सरकारले कोरोना भाइरसका कारण विदेशबाट नेपाल फर्कन चाहने नागरिकलाई आफनै खर्चमा उद्धार गर्ने थालेको छ ।

प्रकाशित मिति: सोमबार, असार १, २०७७ ११:१६