पोखराको मणिपालका संक्रमितलाई क्षेत्रीय अस्पतालमा सारियो

A+ A A-

मोटरसाइकल दुर्घटनमा परी मनिपाल शिक्षण अस्पतालमा उपचाररत कोरोना संक्रमित पुष्टि भएका युवालाई पश्चिमाञ्चल क्षेत्रीय अस्पतालमा सारिएको छ । पर्वतको कुश्मा नगरपालिका-३ घर भएका ३५ वर्षे युवामा कोरोना भाइरसको संक्रमण पुष्टि भएपछि पश्चिमाञ्चल क्षेत्रीय अस्पतालको आइसोलेसन वाडमा ल्याइएको हो ।

गण्डकी प्रदेशको स्वास्थ्य निर्देशनालयका निर्देशक विनोदविन्दु शर्माले शुक्रबार पर्वतका तीनसहित कोरोना संक्रमित प्रदेशको संख्या शुक्रबार सार्वजनिक गरेका थिए । ती युवाको मोटरसाइक दुर्घटनामा परी टाउकोमा गम्भिर चोट लागेको र हातखुट्टा समेत भाँचिएका छन् ।

उनको अप्रेसन गर्नुअघि लिइएको स्वाबको परीक्षण रिपोर्ट पोजेटिभ आएको प्रदेश स्वास्थ्य निर्देशनालयका निर्देशक शर्माले बताए । कोरोना संक्रमण बढेपछि अस्पतामा प्रत्येक बिरामीको अप्रेसन गर्नुअघि स्वाब लिएर कोरोना परीक्षण गर्ने गरिएको उनले बताए ।

पश्चिमाञ्चल क्षेत्रीय अस्पताललाई सरकारले कोरोनाको डेडिकेटेड अस्पताल तोकेको छ । त्यसैले नै मणिपालमा कोरोना पुष्टि भएका बिरामीलाई क्षेत्रीयमा सारिएको शर्माले जानकारी दिए । संक्रमित बिरामीलाई आइसोलेसनमा राखेर उपचार सुरु गरिएको छ ।

कुश्मा नगरपालिका-३ पातिचौरमा होटल व्यवसाय गर्दै आएका युवालाई कसरी कोरोना भाइरसको संक्रमण हुनपुग्यो भन्ने खोजी सुरु भएको छ ।

पछिल्लो तथ्यांकअनुसार शुक्रबार मात्रै प्रदेशमा कोरोना पुष्टि भएकाको संख्या थप ४१ भएको छ । यीसहित गण्डकीमा कोरोना संक्रमित १ सय ९२ जना पुगेका छन् । मनाङ र मुस्ताङबाहेक बाँकी सबै ९ जिल्लामा कोरोना संक्रमित भेटिएका छन् ।

शुक्रबार संक्रमण पुष्टि भएकामध्ये स्याङ्जाका २२, पर्वतका १३, तनहुँ १ र नवलपुरका ५ जना रहेका छन्। अहिलेसम्म गण्डकीमा ११ जना संक्रमित निको भएर घर फर्किएका छन् । संक्रमितमध्ये स्याङ्जाका १ जनाको मृत्यु भएको छ ।

प्रकाशित मिति: शुक्रबार, जेठ ३०, २०७७ १५:०९