८० दिनको लकडाउन : कृषकको उत्पादन बिकेन, बजारमा भने फालाफाल !

A+ A A-

११ चैतदेखि सुरु भएको बन्दाबन्दी ८० दिन पुगेको छ । बन्दाबन्दी घोषणा गरिएसँगै बजारमा संशय बढेको थियो । उपभोक्ताले मौज्दात बढाएका थिए । खुद्रा व्यापारीका अनुसार औसत समयमा १ केजी सामान किन्ने उपभोक्ताले ५ केजीसम्म किन्ने गरेका थिए ।

बन्दाबन्दीको करिब २ साता भने बजारमा ग्यासको समस्या देखियो । साे समस्या समाधानका लागि आधा सिलिण्डर ग्यासको व्यवस्था नेपाल आयल निगमले गरेको थियो । पछि १ वैशाखदेखि भरिएको सिलिन्डर नै बिक्री गरिएको थियो ।

बन्दाबन्दीको समयमा कतिपय जिल्लाहरूमा आफ्ना कृषि उत्पादन बिक्री नभएको भन्दै सडकमा फालिदिए । तर, बजारमा भने अत्यावश्‍यक भनिएका कुनै पनि वस्तुको अभाव नदेखिएको वाणिज्य आपूर्ति तथा उपभोक्ता हित संरक्षण विभागले जनाएको छ ।

आयातित वस्तुमा सरलीकृत गरिएको भन्सार विभागका महानिर्देशक सुमन दाहालले बताए । उनका अनुसार ८० दिनको समयमा आयात भएको सामानको परिमाणको हिसाबले ७८ प्रतिशत अत्यावश्‍यक वस्तुको आयात भएको छ ।

'भन्सारमा समस्या नभएर पनि केही सम्बन्धित व्यक्तिहरू आउन नपाउँदा केही समस्या भएको थियो तर, समग्रमा भने सामान आयात निर्यातमा अवरोध रहेन,' दाहालले भने, 'अत्यावश्‍यक वस्तुको छिटो चेकजाँच हुने गरी हामीले मोडालिटी बनाएका थियौँ, जसले गर्दा सहज पनि भयो ।'

सामान्य दिनको तुलनामा केही कम आयात भए पनि आवश्‍यकताअनुसार सामान भने आएको उनी बताउँछन् ।

८० दिनमा कुन सामानको कति आयात ?

८० दिनको अवधिमा विदेशी बजारबाट १ खर्ब ६० अर्ब रुपैयाँको सामान आयात भएको छ । लकडाउन लागू भएको पहिलो ९ दिनको अवधिमा ७ अर्ब ५८ करोड रुपैयाँको अत्यावश्‍यक सामान आयात भएको थियो भने पछिल्लो ९ दिनमा भने २२ अर्ब ९२ करोड रुपैयाँको सामान आयात भएको छ ।