हेटौँडाका युवाको प्रश्‍न : कर होइन सरकार केरा छ लाने हो ?

A+ A A-

बागमती प्रदेशको मुकाम हेटौँडामा युवा सडकमा उत्रिएर सरकारविरुद्ध प्रदर्शन गरेका छन् ।

कोरोना महामारी नियन्त्रण गर्न भन्दै सरकारले राज्य कोषको दुरुपयोग र जटिल परिस्थितिमा पनि लापरवाही गरेको भन्दै सयौँ युवा सडकमा उत्रिएर शान्तिपूर्ण आन्दोलन गरेका हुन् । हेटौँडाको मुख्य सडकमा र्‍याली निकालेका युवाले बुद्धचोकमा आएर कोणसभा गरेका थिए ।

प्रदर्शनमा उत्रिएका युवाले लकडाउनका कारण जनता भोकभोकै बस्नु परेको भन्दै व्यङ्ग्य गरेका छन् । उनीहरूले भोक लाग्या छ सरकार, कोरोना पनि खाइदिने हो ! भन्दै देशमा जारी लकडाउन खोल्न आग्रह गरेको प्रदर्शनमा सहभागी युवा भृगु कार्कीले बताए ।

प्रदर्शनमा सहभागी युवाले १० अर्ब खाएर अघाउनु भयो की अझै खानुहुन्छ ? अर्को चोटी फेरि भोट दिन्छु ! कस्ले भन्यो तँलाई ?, आरडीटी टेष्ट बन्द गर, सबै नागरिकको पीसीआर टेष्ट अनिवार्य गर, यो मौन अन्दोलन प्रहरीको आमा–बुवा, छोरा–छोरीको लागि पनि हो नरोक्नुस हामीलाई लगायतका नारा भएका प्ले कार्ड बोकेर प्रदर्शन गरेका थिए ।

हामीले तिरेको कर के का लागि ?, जनता भोकभोकै छन्, सरकार खोक्याखोक्यै छन्, कर होइन सरकार केरा छ लाने हो ?, नेपाली हो मुर्ख होइन, म स्वदेशमै केही गर्छु विदेश जाने माहोल नबनाइदे, नेताको भत्ता पाक्ने जनताको भात नपाक्ने ? जस्ता नारा प्रदर्शनमा उत्रिएका युवाले प्रयोग गरेका थिए ।

। शान्तिपूर्ण मौन आान्दोलन सफल भएको आन्दोलनका अभियान्ता विकेशलाल श्रेष्ठले बताए । युवाहरु सरकारविरुद्ध प्रदर्शनमा उत्रिने खबरपछि मकवानपुर प्रहरीले हेटौंडाका चोकचोकमा बाक्लो प्रहरी परिचालन गरेको थियो । जनपथ र सशस्त्र प्रहरीले निगरानी बढाएको थियो ।