एउटा सन्कीले टुुहुरा बनाएका करण-अर्जुन

A+ A A-

रूपन्देहीको तिलोत्तमा नगरपालिका-१० मैनहवामा सोमबार राति भएको सामूहिक हत्याकाण्डमा ५ जनाको ज्यान गयो । त्यसमध्ये एक दम्पत्ति हुन् । २ छोरा रहेका दम्पत्तिको फर्ममै काम गर्ने झसेन्द्र सिंजालीले रिसइबी साँधेर हत्या गरेको प्रहरीको प्रारम्भिक अनुसन्धानबाट खुलेको छ । तर, दम्पत्तिका २ नाबालक छोरा भने अभिभावकविहीन बनेका छन्, विचल्लीमा परेका छन् ।

सोमबार राति भएको सामूहिक हत्याकाण्डको घटनास्थल गंगादेवी पशु फार्ममा रिपोटिङका लागि पुग्दा सामूहिक हत्यामा ज्यान गुमाएका माधव र जानकीका कान्छा छोरा अर्जुन मुसहर साथीहरूसँग हास्दै रमाउँदै खेल्दै थिए । नजिकै रहेको ट्याक्टरमा कहिले माथि चढ्थे त कहिले तल झर्थे । उनी अन्य दिनमा जसरी फर्ममा समय बिताइरहेका थिए । उनलाई के भएको छ भन्नेसमेत थाहा थिएन ।

अर्जुनका दाजु अर्थात् माधव र जानकीका जेठा छोरा करण पनि फार्ममै लुगा कुम्लाउनमा व्यस्त थिए । तिलोत्तमा नगरपालिकामा रहेको कोटहीयामाई आधारभूत विद्यालयको कक्षा ४ मा करण र कक्षा १ मा अर्जुन अध्ययनरत छन् ।

१ कक्षामा अध्ययनरत अर्जुनलाई बा आमाको कसरी ज्यान गयो भन्नेसमेत राम्ररी थाहा छैन । उनीहरुलाई हुर्काएर ठुलो मान्छे बनाउने बा आमाको चाहनामा एक्कासी बिराम लागेको छ । सानो भाइ पाल्ने जिम्मा अव मजदुरी गर्दै कक्षा ४ मा पढिरहेका करणमा आएको छ । तर कसरी अवको यात्रा तय हुन्छ उनलाई नै थाहा छैन ।

बाबा माधव र आमा जानकीको मृत्यु भएपछि अब सानो भाइलाई हेर्ने जिम्मेवारी करणको काँधमा छ । करणले आफूले पढ्न नपाए पनि भाइलाई मजुदरी गरेर भए पनि पढाउने ईच्छा रहेको बताए ।

करण कान्छीबजारनजिकै एक फर्मममा काम गर्दै आएका छन् । बुवा र आमा गुमाएपछि अब भाइको पढाइ स्थगित हुने चिन्ता करणको छ । सैनामैनामा रहेको घरमै बसेर आफूले मजदुर गरेरै भए पनि भाइलाई पढाउने इच्छा करणको छ । 'घरमै गएर दुःख सुःख गरेर भाईलाई पढाउने सोचेको छु, अंकलसँग पनि कुरा भएको छ' उनले भने ।

तर, फर्म सञ्चालक कृष्ण बहादुर पुनले भने काजकिरिया सकेपछि उनीहरूको कहाँ व्यवस्थापन गर्ने भन्ने सोच्ने बताए । करणले फर्ममा रहेका आफ्ना बुवाआमाका कपडा र अन्य सामान कान्छीबजार मामा घरमा लगिसकेका छन् ।

घटनापछि मृतकका आफन्त, जनप्रतिनिधि, फर्म सञ्चालकबीच तिलोत्तमा नगरपालिकामा भएको छलफलमा फर्म सञ्चालकले प्रतिपरिबार १/१ लाख र नगरपालिकाले काजकिरियाका लागि २५/२५ हजार रुपैयाँ दिने निर्णय गरेको छ ।

मंगलबार बिहान मृतकका आफन्त र छिमेकीलाई क्षतिपूर्ति नदिँदासम्म शव उठाउन नदिने अडान गरेका थिए । पछि जनप्रतिनिधिको रोहबरमा क्षतिपूर्ति दिने गरी शव उठाएका थिए । त्यहीअनुसार क्षतिपूर्ति पीडित परिवारलाई दिइएको तिलोत्तमा नगरपालिकाका नगर प्रमुख वासुदेव घिमिरेले बताए ।

छलफलमा मृतक जानकी र माधवको तर्फबाट माधवका भाइ चिन्का मुसहर सहभागी थिए । उनी सैनामैनामै बस्दै आएका छन् । दाजुका २ छोराको लालनपालन र शिक्षादिक्षा गर्ने आफ्नो दायित्व भए पनि आफ्नै आर्थिक स्थिति कमजोर रहेको उनी बताउँछन् ।

आर्थिक स्थिति कमजोर भएका कारण शिक्षा र लालनपालनमा दुःख हुने उनले बताए । 'मेरो परिवारले नै ४ जनाको छ, यी २ थपिँदा ६ जना भइन्छ, तर खाने लाउने केही छैन् । कसरी लालनपालन गर्ने ?' उनले दुखेसो पोखे ।

काजकिरियाको लागि गंगादेवी पशु फर्म सञ्चालक र नगरपालिकाले केही राहात उपलब्ध गराए पनि २ नाबालक भने बिचल्लीमा पर्ने चिन्ता थपिएको छ । करण र अर्जुनको सैनामैनामा रहेको एउटा कच्ची घरबाहेक अरू जायजेथा छैन् । भएको एउटा घरमा पनि पानी तर्दैन ।

अब के खाने के गर्ने उनीहरू अलमलमा परेका छन् । विचल्लीमा परेकाहरूलाई अभिभावकत्व प्रदान गर्ने स्थानीय तहले शिक्षाको ग्यारेन्टी र पालनपोषणको जिम्मा लिनुपर्नेमा राहतका नाममा रकम दिएर उम्किएको छ ।

प्रकाशित मिति: शुक्रबार, जेठ ३०, २०७७ ११:५३