हेटौँडाको कोरोना प्रयोगशाला २४ घण्टा खुल्ने, १ हजार स्वाब परीक्षण गर्ने लक्ष्य

हेटौँडाको कोरोना प्रयोगशाला २४ घण्टा खुल्ने, १ हजार स्वाब परीक्षण गर्ने लक्ष्य

A+ A A-

हेटौँडास्थित किटजन्य रोग अनुसन्धान तथा तालिम केन्द्रमा रहेको कोरोना प्रयोगशाला (अस्थायी प्रादेशिक ल्याब) अब २४ घण्टा खुलाइने भएको छ ।

राष्ट्रिय जनस्वास्थ्य प्रयोगशाला काठमाडौंले १ हजार स्वाब परीक्षण गर्न हेटौँडा पठाएपछि प्रयोगशालालाई २४ घण्टा खोल्न लागिएको प्रदेशको सामाजिक विकास मन्त्रालयले जानकारी दिएको छ । प्रयोगशालामा अब २ सिफ्टमा स्वाब परीक्षण गर्ने तयारी मन्त्रालयले गरेको छ ।

‘१ हजार स्वाब परीक्षण गर्न अब २४ घण्टा प्रयोगशाला खोल्छौँ, ल्याबका कर्मचारीलाई २ सिफ्टमा बाँडेर स्वाब परीक्षण छिटो गर्ने मन्त्रालयको योजना छ’ मन्त्रालयका प्रवक्ता तथा चिकित्सा महाशाखा प्रमुख डा. पुरूषोत्तम राज सेढाईंले भने । उनका अनुसार ५ दिनभित्र १ हजार स्वाब परीक्षण गरिसक्ने लक्ष्य प्रयोगशालाले लिएको छ ।

आज शुक्रबारदेखि काठमाडौंबाट आएको स्वाब परीक्षण सुरु गर्ने जनाइएको छ । राष्ट्रिय जनस्वास्थ्य प्रयोगशालाले १ हजार स्वाब परीक्षणको लागि हेटौँडा पठाएको पहिलो पटक हो । प्रयोगशालामा १० हजारभन्दा बढी स्वाब संकलन भएपछि हेटौँडा प्रयोगशालालाई ठूलो संख्यामा स्वाब पठाएको हेटौँडाको आइसोलेसन वार्डका इञ्चार्ज भोला चौलागाईंले जानकारी दिए ।

१ हजार स्वाब परीक्षण गर्न कर्मचारीको अभाव नहुने प्रवक्ता सेढाईंले बताए । परीक्षणको लागि केही कर्मचारीलाई ल्याबमा काज मिलाएर ल्याएको उनको भनाई छ । हाल प्रयोगशालामा ल्याब असिस्टेन्ट, मेडिकल टेक्नोलोजिक्स, माइक्रोबायोलोजिष्ट लगायतका गरी ५–६ जना कर्मचारी रहेका छन् ।

हेटौँडा प्रयोगशालाको क्षमता दैनिक १ सय स्वाब परीक्षण गर्नसक्ने छ । प्रयोगशालामा एउटा मात्रै परीक्षण गर्न मेसिन भएको भन्दै ठूलो संख्याको स्वाब आउँदा परीक्षणमा समस्या हुने मन्त्रालयका प्रवक्ता सेढाईं बताउँछन् । ‘प्रयोगशालाको क्षमता सानो छ । ठूलो संख्यामा स्वाब आउँदा परीक्षण गर्न समस्या हुन्छ’ उनले भने ।

हेटौँडा प्रयोगशालाले यसअघि मकवानपुरसहित बारा, पर्सा, रौतहट, चितवन, सिन्धुपाल्चोक, सिन्धुलीलगायतका जिल्लाको स्वाब परीक्षण गर्दै आइरहेको थियो । शुक्रबार बिहानसम्म प्रयोगशालामा पीसीआर परीक्षणको लागि ३ हजार ८ सय ७७ वटा स्वाब प्राप्त भएको मन्त्रालयले जानकारी दिएको छ । हालसम्म ल्याबमा २९ सय स्वाब परीक्षण भइसकेको छ ।

‘अनावश्यक स्वाक संकलन रोक्नुपर्छ’

प्रदेशको सामाजिक विकास मन्त्रालयका प्रवक्ता तथा चिकित्सा महाशाखा प्रमुख डा. सेढाईंले अनावश्यक स्वाब संकलन रोक्नु पर्ने बताएका छन् ।

उनले परीक्षणको लागि आवश्यक नै नभएको व्यक्तिको स्वाब संकलन भइरहेको बताए । शिलापत्र संवाददातासँग कुरा गर्दै प्रवक्ता सेढाईंले अनावश्यक व्यक्तिको स्वाब परीक्षण नगर्न सम्बन्धित निकायमा आग्रह गरिएको बताए ।

‘स्वाब संकलन संक्रमित क्षेत्रबाट आएका, मिल्दाजुल्दा लक्षण देखिएका व्यक्तिको गर्ने हो । याहाँ पहुँचको भरमा आवश्यक नै नभएको मान्छेको स्वाब संकलन भइरहेको देखिएको छ । त्यसलाई रोक्न सबै समक्ष आग्रह गरिएको छ’ सेढाईंले भने ।

अनावश्यक स्वाब परीक्षण गरेर पीसीआर सकाउन नहुने डा. सेढाईंको भनाई छ । अनावश्यक स्वाबले प्रयोगशालाको परीक्षण तालिकालाई पनि प्रभाव पारेको उनले बताए ।

प्रकाशित मिति: शुक्रबार, जेठ ३०, २०७७ ११:२३