दुईजना रेष्टुराँ सञ्चालकलाई जनही १,१४६ वर्ष जेलसजाय

A+ A A-

थाईल्यान्डमा दुई जना रेष्टुरेन्ट सञ्चालकलाई अदालतले मानिसहरुलाई ठगेको आरोपमा जनही १,१४६ वर्ष जेलसजाय सुनाएको छ ।

गत वर्ष लाएमगेट सीफूड रेष्टुराँले अनलाइनमार्फत्‌ पहिल्यै भुक्तानी गर्नुपर्ने व्यवस्था गरेको थियो । थाईल्यान्डको पीबीसी च्यानलका अनुसार बीस हजार जति मानिसले पाँच करोड थाई भाट बराबरको भौचर खरिद गरे ।

तर पछि कम्पनीले माग पूरा गर्न नसक्ने भन्दै रेष्टुराँ बन्द गर्‍यो । सो घटनामा सयौँ मानिसले उजुरी गरेको आधारमा अपीचार्ट बोवोर्नबन्चरक र प्रापासोर्न बोवोर्नबन्चरक पक्राउ परेका थिए ।

थाईल्यान्डमा उजुरी सङ्ख्याका आधारमा ठगी प्रमाणित भएमा लामो जेल सजाय दिइन्छ । थाई कानुनले मानिसहरूलाई ठगी गरेको अभियोगमा २० वर्ष जेलसजाय तोकेको छ ।

एउटा स्किम अनुसार ८८० भाटमा १० जनाका लागि सीफूड पाइने भनिएको थियो । जुन सामान्य मूल्यभन्दा धेरै सस्तो थियो।

सुरुमा भौचर किन्नेहरूले रेष्टुराँमा खानेकुरा पाउन सके तर थाइ पीबीएसका अनुसार लामो वेटिङ्ग लिस्ट (पर्खन बाध्य ग्राहकहरूको सूची) हुँदा कैयौं महिनासम्म बुकिङ चल्यो ।

तर मार्चसम्म पुग्दा लाएमगेट इन्फिनिट नामक कम्पनीले माग अनुसार सीफूड दिन नसक्ने भन्दै रेष्टुराँ बन्द गर्ने घोषणा गर्‍यो ।

थाई पीबीएसका अनुसार कम्पनीले भौचर खरिद गरेका ग्राहकहरूलाई पैसा फिर्ता गर्ने प्रस्ताव गर्‍यो । जसमा ८१८ मध्ये उजुरी गरेका ३७५ जनाले रकम फिर्ता पाए । सो घटनापछि ठगीको आरोपमा बाँकी सयौँले कम्पनी र त्यसका सहसञ्चालकहरूविरुद्ध उजुरी दिएका थिए ।

गलत सन्देशमार्फत्‌ मानिसहरूलाई ठगेको आरोपमा अपीचार्ट बोवोर्नबन्चरक र प्रापासोर्न बोवोर्नबन्चरक पक्राउ परेका थिए ।

७२३ जनालाई ठगेको अभियोगमा उनीहरुलाई अदालतले दोषी ठहर गर्दै जनही १,१४६ वर्ष जेलसजाय तोकेको हो ।

गल्ती स्वीकार गरेपछि उनीहरूको सजाय आधाले घटाएर ७२३ वर्ष कायम गरियो । तर उनीहरूले बढीमा २० वर्ष जेलसजाय काट्नुपर्ने हुन्छ ।

उनीहरूको कम्पनीलाई १८ लाख भाट जरिमाना तिर्न अदालतले आदेश दिएको छ भने सहसञ्चालक तथा कम्पनीलाई क्षतिपूर्ति स्वरूप पीडितहरूलाई २५ लाख भाट तिर्न पनि आदेश दिएको छ ।

प्रकाशित मिति: शुक्रबार, जेठ ३०, २०७७ ०७:२२