श्रीलंकाको संसदीय निर्वाचनको मिति फेरि ३ महिना पछि सारियो

A+ A A-

श्रीलंलकाको संसदीय निर्वाचनको मिति फेरि ३ महिना पछि सारिएको छ । सरकारले कोरोना भाइरसको महामारीको कारण यही २० जुनमा गर्ने भनिएको निर्वाचनलाई आगामी ५ अगस्टमा गर्ने घोषणा गरिएको हो ।

कोरोनाको सङ्क्रमण फैलिएकाले निर्वाचनलाई पछाडि सार्नु परेको निर्वाचन आयोगका अधिकारीहरूले जनाएका छन् । कोरोनाको प्रभावको अवस्थाका आधारमा अहिले निर्धारण गरिएको निर्वाचन पनि हुने वा नहुने भन्ने बिषयमा राजनीतिक नेतृत्वबीचमा दृढविश्वास भने देखिएको छैन ।

कोरोनाबाट जोगिँदै निर्वाचन सम्पन्न गर्ने बारेमा यसै हप्ताको अन्त्यतिर नमूना निर्वाचन सम्पन्न गर्ने निर्वाचन आयोगले तयारी गरेको छ । आयोगका अनुसार सामाजिक दूरी कायम गर्दै मतदान, मतगणनालगायतका कार्य गर्नेगरी तयारी भइरहेको हो ।

आयोगका अध्यक्ष महिन्दा देशाप्रियाले निर्वाचनको तयारीका बारेमा बिहीबार विभिन्न सञ्चार माध्यमलाई जानकारी दिए ।

उनले यसअघि जारी गरिएको सूचनालाई संशोधन गर्दै नयाँ सूचना जारी गरिएको पनि बताए । संशोधित सूचनामा लेखिएको छ, ‘संसदीय निर्वाचनका लागि यही सन् २०२० को अगस्ट ५ मा मतदान गर्ने निर्णय गरिएको जानकारी गराइन्छ ।’

श्रीलंकाका राष्ट्रपति गोतावाय राजापाक्षेले गत बर्षको २ मार्चका दिन संसद विघटन गरेका थिए । त्यसपछि उनले गत २५ अप्रिलका लागि निर्वाचनको मिति पनि घोषणा गरेका थिए ।

अप्रिलका लागि तय भएको निर्वाचन सारेर यही २० जुनका लागि तोकिएको थियो । तर, सारिएको मितिमा पनि निर्वाचन गर्न नसकिने भएपछि फेरि अर्को मिति तय गरिएको बताइएको छ ।

श्रीलङ्कामा अहिले कोरोना कारण कम्तीमा ११ जनाको मृत्यु भएको र २ हजारभन्दा बढी सङ्क्रमित भएकाले निर्वाचन गर्न सकिने अवस्था नरहेको सरकारी अधिकारीहरूको भनाइ छ ।

श्रीलङ्कामा अहिले पनि रातीको समयका लागि पनि निषेधाज्ञा आदेश जारी गर्दै बन्दाबन्दीलाई कडाइसाथ लागू गरिएको छ । विद्यालय अर्को महिनामा मात्रै पुनः सञ्चालनमा ल्याउने प्रयास भएको र देशमा आउन चाहने विदेशी पर्यटकलाई १ अगस्टसम्म भ्रमण अनुमति नदिइने बताइएको छ ।

प्रकाशित मिति: बिहीबार, जेठ २९, २०७७ १९:२३