पाकिस्तान प्रशासित काश्मिरलाई भारतको नक्सामा देखाइएपछि...

A+ A A-

पाकिस्तानको सरकारी टेलिभिजन च्यानल पीटीभीले पाकिस्तानको गलत नक्सा प्रसारण गरेको आरोपमा दुई कर्मचारीलाई बर्खास्त गरेको छ ।

सो नक्सामा पाकिस्तान प्रशासित काश्मिरको क्षेत्रलाई भारतको नक्सामा देखाएपछि उनीहरूलाई बर्खास्त गरिएको हो । पीटीभीमा सो नक्सा प्रसारण भएको विषयमा पाकिस्तानमा विवाद सिर्जना भएको थियो ।

पीटीभीमा प्रशासित नक्सालाई लिएर संसदको माथिल्लो सदनमा समेत ८ जुनमा छलफल भएको थियो । त्यसपछि माथिल्लो सदनका अध्यक्ष सादिक सञ्जरानीले सो विवादलाई सूचना तथा प्रसारणसम्बन्धी संसदीय समितिमा पठाएका थिए ।

बढ्दो विवादबीच पीटीभीले दुई कर्मचारीलाई बर्खास्त गरिएको ट्विटरमार्फत जानकारी दिइएको हो । पीटीभीले भनेको छ, ‘६ जूनमा पीटीभीमा पाकिस्तानको गलत नक्सा प्रसारित भएकोमा जिम्मेवार दुई अधिकारीलाई जागिरबाट निकालिएको छ ।’

पाकिस्तान सरकारका केही मन्त्रीले नै सामाजिक सञ्जालमा पीटीभीको कडा आलोचना गरेका थिए । विज्ञान तथा प्रविधिमन्त्री चौधरी हुसेनले यस विषयमा पीटीभीका महानिर्देशकको आलोचना गरेका थिए ।

उनले ट्विटरमा लेखेका छन्, ‘यो लज्जास्पद हो, पीटीभीका अध्यक्ष अरसद खान यति लामो समयदेखि च्यानलका प्रमुख रहेका छन् । उनले भुले कि उनी पीटीभीको प्रमुख हुन्, दूरदर्शनको होइन । दूरदर्शनको होइन ।’

पाकिस्तानका मानवअधिकारमन्त्री शिरिन मजारीले यो लापरबाही र असावधानीका कारण भइरहेको छ । उनले भने, ‘केही व्यक्तिले गुगलबाट तानेर जस्ताको तस्तै नक्साको प्रयोग गर्छन्, मलाई अफसोच लाग्छ कि नक्साको महत्त्व बुझ्दैनन् ।’

भारत र पाकिस्तानबीच काश्मिरलाई लिएर ७० वर्षदेखि विवाद रहँदै आएको छ । पछिल्ला दिनमा दुई देशबीच काश्मिरको मौसमको भविष्यवाणीलाई लिएर टकराव सुरु भएको छ ।

गत महिना भारतको सरकारी सञ्चारमाध्यमले पाकिस्तान प्रशासित काश्मिरको मीरपुर, मुजफ्फरावाद र गिलगित वाल्टिस्तानजस्ता इलाकाको पनि मौसमको जानकारी दिन सुरु गरेको थियो ।

त्यसको प्रतिउत्तरमा पाकिस्तानी सरकारी सञ्चारमाध्यमले भारत प्रशासित काश्मिरको श्रीनगर, मीरपुर, पुलवामा तथा जम्मु काश्मिर र लद्दाखको समेत तापमानबारे जानकारी दिन थालेको थियो ।

दुई देशबीच काश्मिरलाई विभाजन गर्ने नियन्त्रण रेखामा संसारकै सबैभन्दा बढी सैनिक उपस्थिति छ । भारतले ५ अगस्ट, २०१९ मा काश्मिरलाई प्राप्त विशेषाधिकार कटौती गरेर केन्द्र शासित प्रदेश बनाएको थियो ।

प्रकाशित मिति: बिहीबार, जेठ २९, २०७७ १५:०६