विदेशमा नागरिक अलपत्र, नेपाल एयरलाइन्सका २५ अन्तर्राष्ट्रिय चार्टर्ड उडान भने रित्तै फर्किए

विदेशमा नागरिक अलपत्र, नेपाल एयरलाइन्सका २५ अन्तर्राष्ट्रिय चार्टर्ड उडान भने रित्तै फर्किए

फाइल तस्वीर

A+ A A-

विदेशमा कोरोना भाइरसका कारण अलपत्र परेका हजारौँ नेपाली सरकारले कहिले उद्धार गर्छ भनेर प्रतीक्षारत छन् । दैनिक चार्टर्ड उडानमार्फत उद्धारको प्रतीक्षामा बसेका नेपाली भएको देश पुगेको नेपाल एयरलाइन्सको जहाज भने क्षमताभन्दा धेरै कम यात्रु बोकेर फर्किने गरेको छ ।

लकडाउन सुरू भएयता नेपाल एयरलाइन्सले २५ वटा अन्तारिष्ट्रय चार्टर्ड उडान भरेको नेपाल वायुसेवा निगमले जानकारी दिएको छ । यो अवधिमा अष्ट्रेलिया ३ पटक, चीन ९ पटक, हङकङ ३ पटक, दिल्ली १ पटक, ढाका १ पटक र जापान ८ पटक चार्टर्ड उडान भरेको निगमको तथ्यांकमा छ । नेपाल एयरलाइन्सले चार्टर्ड उडान भरेको देशबाट करिब ५ हजार नागरिक उद्धार गर्नुपर्ने परराष्ट्र मन्त्रालयले जनाएको छ ।

लकडाउन भएयता गरेका अन्तर्राष्ट्रिय चार्टर्ड उडान रित्तै फर्किएका छन् । विदेशमा अप्ठ्यारोमा परेका नेपालीको उद्धारका विषयमा नेपाल सरकारले निर्णय गर्न अलमल गरेका कारण २ सय ७४ सिट क्षमताको जहाजमा ११ जना मात्रै यात्रु लिएर फर्किने गरेका छन् ।

मंगलबार राति अस्ट्रेलियाको क्यानबेरा चार्टर्ड उडान गरेको जहाज जम्मा ११ जना नेपाली लिएर आएको छ । अस्ट्रेलिया उद्धारको प्रतीक्षामा १ हजार ६ सय नेपाली नागरिक छन् ।

यस्तै, गत शुक्रबार जापानको टोकियोबाट चार्टर उडान गरेको नेपाल एयरलाइन्सले ७ जना नेपाली बोकेर फर्किएको थियो ।

यस्तै, जापानबाट अन्य ६ पटक चार्टर गरेर फर्किंदा २७ जना यात्रु लिएर फर्किएकाे निगमले जनाएको छ । जापानबाट ९ सय १६ जना नेपाली नागरिक उद्धार गर्नुपर्ने परराष्ट्र मन्त्रालयको तथ्यांक बुझाएकाे छ ।

नेपाल वायुसेवा निगमले गरेको चार्टर उडानबाट धेरै नेपाली उद्धार गरी ल्याउन सरकारले तयारी गरेको भए धेरै नागरिकको उद्धार हुने निगमको बुझाइ छ । अस्ट्रेलियाबाट चार्टर उडानमार्फत नेपाल आउन १ यात्रुलाई १ लाख ६० हजार रुपैयाँभन्दा बढी र जापानबाट आउने नेपालले ९० हजारभन्दा धेरै तिरेर आउने गरेका छन् ।

निगमको काम निर्धारित समयमा उडान भर्ने र चार्टर्ड तालिका भएअनुसार उडान भर्ने भएको नेपाल वायुसेवा निगमकी प्रवक्ता अर्चना खड्काले बताइन् । चार्टर गरेर फर्कने जहाजमा सम्बन्धित देशका कूटनीतिक नियोग र सम्बन्धित मन्त्रायलले यात्रु लिएर आउनु भन्दा मात्र लिएर आँउछ । चार्टर्ड गएका जहाज निश्चित समयमा फर्किने भएकाले यात्रु तयारी भए मात्र लिएर आउने उनले बताइन् ।

एकपटक चार्टर गरे फर्कंदा कम्तीमा प्रतिव्यक्ति ७० हजारका दरले घाटा हुने निगमले जनाएको छ । चार्टर्ड गरे फर्किँदा २ सय ५० जना नै लिएर आउँदा ७० हजारका दरले १ करोड ७५ लाख भाडा नोक्सानी हुने निगमको अनुमान छ ।

पर्यटन र परराष्ट्र मन्त्रालयबीच समन्वय नहुँदा उद्धार भएन

परराष्ट्र मन्त्रालयले प्रधानमन्त्री कार्यालय र कोरोना रोकथाम तथा नियन्त्रण समन्वय समितिलाई २४ हजारभन्दा धेरै नागरिक नेपाल तत्काल उद्धार गर्नुपर्ने तंथ्याक बुझाएको थियो । ३ साताअघि परराष्ट्र मन्त्रालयले प्रधानमन्त्री कार्यलय र समितिलाई बुझाइको थियो । तर, कहिले कहाँबाट कसरी कामदार उद्धार गर्ने भने सरकारले निर्णय गरेको छैन ।

संस्कृति, पर्यटन तथा नागरिक उड्डयन मन्त्रालय र परराष्ट्र मन्त्रालयबीच समन्वय नहुँदा नेपाल एयरलाइन्सको चार्टर्ड जहाज रित्तै फर्कने गरेका छन् । चार्टर्ड गरेर गएको जहाज निश्चित समयमा फर्किने हुँदा अलपत्र नागरिक ल्याउन सम्भावना कम भएको पर्यटन मन्त्रालयका प्रवक्ता रुद्रसिंह तामाङले बताए । ‘कुनै समयमा कहाँ चार्टर्ड गरेर जानुपर्छ, त्यो निश्चित नहुँदा चार्टर्डमार्फत विदेशमा अलपत्र नागरिक उद्धार गरेर ल्याउन समस्या भएको छ,’ उनले भने, ‘योभन्दा धेरै यो विषयमा बोल्न मिल्दैन ।’

यस्तै, नेपाल वायुसेवा नियमको जहाज चार्टर्ड उडान कहाँ भर्दै छ भनेर जानकारी नहुने गरेको परराष्ट्र मन्त्रालयका प्रवक्ता भरतराज पौडेलेले बताए । ‘पर्यटन र परराष्ट्र मन्त्रालयले समन्वय गरेर विदेशमा अलपत्र नागरिक चार्टर्ड गरेको जहाज फर्कँदा ल्याउँदा हुने हो,’ उनले भने, ‘तर, यो विषय समग्र भएकाले २ मन्त्रालयले निर्णय गरेर मात्र हुँदैन । मन्त्रालयपिच्छेका नियम हुन्छन्, जसले गर्दा केही समस्या भएको हुन सक्छ ।’

चार्टर्ड उडानमा भाडा अत्यधिक महँगो हुने देखिपछि सरकारले विदेशमा अलपत्र नागरिककाे उद्धारका लागि अन्तराष्ट्रिय उडान खुलाउने विषयमा छलफल सुरू गरेको छ । जसका लागि पर्यटन मन्त्रालयले विभिन्न अन्तर्राष्ट्रिय उडान भर्दै आएका एयरलाइन्ससँग छलफल गरिरहेको छ ।

गत मंगलबार प्रधानमन्त्री केपी शर्मा ओलीले नै संस्कृति, पर्यटन तथा नागरिक उड्डयन मन्त्री योगेश कुमार भट्टराईसँग अन्तर्राष्ट्रिय उडान खुलाएर विदेशमा अलपत्र नागरिक उडान गर्ने विषयमा छलफल गरेका थिए । सरकारले निश्चित देश तोकेर केही समय नियमित उडान खुलाउनुपर्ने आवश्यक देखिएको पर्यटन मन्त्रालयका प्रवक्ताले जानकारी दिए । अन्तर्राष्ट्रिय उडान खुलाउने विषयमा पनि अध्ययन भइरहेको उनको भनाइ छ ।

चार्टर्ड उडानको भाडा महँगो हुने विषयमा उद्धार गर्नुपर्ने देशका राजदूतावासहरूले सरकारलाई जानकारी गराइरहेका छन् । यसले पनि ताेकिएकाे समयमा विदेशमा अलपत्र नागरिक उडानमा समस्या भइरहेको राजदूतावासले सरकारको ध्यानाकर्षण गराइरहेका छन् ।

प्रकाशित मिति: बिहीबार, जेठ २९, २०७७ ०८:२४