बागमतीकाे तयारी : ३ लाख युवालाई रोजगारी

A+ A A-

बागमती प्रदेश सरकारले आगामी आर्थिक वर्षको लागि बजेट ल्याउँदैछ । बजेटको अन्तिम तयारी भइरहेको प्रदेशको आर्थिक मामिला तथा योजना मन्त्रालयले जनाएको छ ।

प्रदेशले १ असारमा प्रस्तुत गर्ने आगामी आवको बजेटमा करिब ३ लाख युवालाई रोगजारी दिने गरी बजेट ल्याउन लागेको छ । विश्वभर फैलिएको कोरोना भाइरसको प्रभावले वैदेशिक रोजगारीबाट स्वदेश फर्किन लागेका नेपाली युवालाई लक्षित गर्दै सरकारले रोजगारी दिने तयारी गरेको हो ।

प्रदेशको उद्योग, पर्यटन, वन तथा वातावरण मन्त्रालयले ३ लाख नेपाली युवालाई रोजगारी सिर्जना गर्न बजेट ल्याउन लागेको जानकारी दिएको छ । मन्त्रालयले अल्पकालीन रूपमा युवालाई रोजगारी दिन लागेको मन्त्रालयले जनाएको छ । ‘लकडाउनका कारण धेरै युवा वेरोजगार भएको र विदैशिक रोजगारीबाट ठूलो संख्यामा युवा स्वदेश फर्किन लागेकाले रोजगारीलाई प्राथमिकता दिइएको छ’ मन्त्रालय स्रोतले भन्यो ।

विदेशबाट फर्किएका २ हजार ९ सय ४० जना युवालाई ६ महिना रोजगारी दिने गरी कार्यक्रम मन्त्रालयले तयार पारिरहेको दावी छ । व्यवसायिक जडिवुटी फारम सञ्चालनबाट ६ हजार ४ सय रोपनीमा खेती गर्न दिने तथा उक्त कार्यक्रमा २५ हजार २ सय जनालाई सहभागी गराउँदै रोजगारी दिने तयारी मन्त्रालयको छ ।

मन्त्रालयले लघु उद्यम उद्योगअन्तर्गत् कुटी र उद्योग चलाउनेलाई प्राथमिकतामा राख्दै प्रदेशका हरेक स्थानीय तहलाई ३० लाख रुपैयाँ उपलब्ध गराउने भएको छ । ‘मेरो उद्यम, अति उत्तम’ कार्यक्रमअन्तर्गत् ७ हजार १ सय ४० जनालाई रोजगारी सिर्जना गर्ने मन्त्रालयको दावी छ ।

त्यस्तै, वन क्षेत्रअन्तर्गत् २ सय जनालाई प्रत्यक्ष रूपमा कटानमुछानको काम गर्ने गरी अल्पकालीन रोजगारी दिन लागिएको छ । वनजन्य फलफूल र जडीवुटी खेतीका लागि १९ लाख ५० हजार विरुवा रोप्ने मन्त्रालयको तयारी छ ।

बागमती प्रदेश सरकारले नीति तथा कार्यक्रममा विदेशबाट फर्किएका तथा स्वदेशमै रहेका कृषि तथा पशुसम्बन्धी अनुभव, र अध्ययन गरी वेरोजगार बसेका युवालाई कृषि पेशामा आवद्ध गरी उत्पादनमा जोड्न रोजगार, आयमूलक ‘कोभिड विशेष कृषि कार्यक्रम’ थालनी गर्ने उल्लेख गरेको छ ।

वेरोजगार तथा विदेशबाट फर्किकालाई लक्षित गरी उत्पादन वृद्धिका लाग रोजगारी सिर्जना गर्न र प्रविधि हस्तान्तरण, सीप तथा उद्यमशीलता विकास तथा सहुलियत पूर्ण ऋण उपलब्ध गराउने सरकारको नीति तथा कार्यक्रममा उल्लेख छ ।

प्रकाशित मिति: बुधबार, जेठ २८, २०७७ १८:२९