क्वारेन्टाइनमा बसेकाको कोरोना परीक्षण राेकियाे, जोखिममा समुदाय

A+ A A-

पछिल्लो तथ्यांकअनुसार देशभर क्वारेन्टाइनमा १ लाख ६५ हजार नागरिक छन् । प्रत्येक दिन सीमाबाट ५ हजारको हाराहारीमा नेपाली घर फर्किरहेका छन् । फर्किएकालाई क्वारेन्टाइनमा राखिएको छ ।

संक्रमितको संख्या ४ हजार पुगेको छ । अहिलेसम्म नेपालमा भेटिएका जति पनि संक्रमित छन् । त्यसको ८५ प्रतिशत भारतबाट आएका व्यक्तिमा संक्रमण देखिएको छ ।

सरकारले क्वारेन्टाइनमा बसेका र लक्षण नभएकालाई पीसीआर विधिबाट परीक्षण नगर्ने निर्देशिका बनाएको छ । स्वास्थ्य तथा जनसंख्या मन्त्रालयले क्वारेन्टाइनमा बसेका सबैको पीसीआर विधिबाट कोरोना भाइरसको परीक्षण नगरिने निर्देशिका बनाएको हो । क्वारेन्टाइनमा बसेको १४ दिनपछि उनीहरूलाई आरडीटी विधिबाट परीक्षण गरिने भएको छ ।

त्यस्तै, संक्रमितलाई लक्षण देखिन छोडेको ३ दिनभित्र र लक्षण नभएकालाई भर्ना भएको १४ दिनभित्र परीक्षण नै नगरी डिस्जार्च गर्न भनिएको छ ।

संक्रमितको संख्या बढेपछि र परीक्षणका लागि स्वाब संकलन धेरै भएकाले लक्षण नभएका र क्वारेन्टाइनमा बसेकाको पीसीआर नगर्ने निर्देशिका बनाएको हो ।

नयाँ निर्देशिकाअनुसार आइसोलेसनमा रहेका, प्रभावित क्षेत्रबाट आएका, संक्रमितको सम्पर्कमा रहेका, स्वास्थ्यकर्मी, सुरक्षाकर्मी, सरसफाइका कर्मचारी, शल्यक्रिया गर्नुपर्ने बिरामीलाई प्राथमिकतामा राखिएको छ । जनस्वास्थ्यविद्हरुले सरकारको यो निर्णयले समुदायमा कोरोना भाइरस फैलिने जोखिम बढेको बताएका छन् ।

‘परीक्षण नगरी घर पठाउनु हुँदैन,’ डा. बाबुराम मरासिनीले भने, ‘क्वारेन्टाइनमा बसेका कोही न कोही पोजिटिभ हुन्छन् । यसरी परीक्षण नगरी पठायो भने मान्छेको ज्यान जाने खतरा हुन्छ । बरु ७ प्रदेशमा ७ जना मान्छे राखेर परीक्षण गर्न सकिन्छ ।’

विदेशको हेरेर नेपालमा निर्णय नगर्न उनले आग्रह गरे । ‘बेलायत, अमेरिक, फ्रान्स जस्ता देशको जस्तो गर्न खोजेर हुन्न,’ उनले भने, ‘त्यहाँको स्वास्थ्य सेवा र यहाँको फरक छ । उनीहरूको आफ्नो घर वा फ्ल्याट हुन्छ । छुट्टै कोठा शौचालय हुन्छ । नेपालमा ग्रामीण भेगमा कहाँ सम्भव हुन्छ ?’

अहिले परीक्षण नगरेर पैसा जोगाउन खोजे भोलि दोब्बर खर्चले पनि नपुग्ने उनले बताए ।

‘परीक्षण नगर्दा सामाजिक समस्या पनि आउँछ । अहिले जति पैसा पर्छ, खर्च गरेर केही हुन्न । नगरी पठाउँदा झन् बढी खर्च गर्नुपर्ने हुन्छ । खर्च गरेर पनि नियन्त्रण गर्न समस्या पर्छ ।’

‘क्वारेन्टाइनमा बसेकाको टेस्ट गरिएन भने गडबड हुन्छ,’ डा. समीर दीक्षित भन्छन्, ‘मानौँ, १ सय जना व्यक्ति क्वारेन्टाइनमा छिरे । नेपालमा तथ्यांक हेर्ने हो भने ७ देखि ८ प्रतिशत क्वारेन्टाइनमा बस्नेमा देखिएको छ । अब १ सय जना छिरेका छन् भने ७ जनामा पोजिटिभ देखिन्छ । अब परीक्षण नगरी घर पठाउँदा के हुन्छ ?’

परीक्षणको नतिजा आउन ७ देखि १० दिन लागेकाले यसले अरुलाई सारेको उनले बताए ।

‘परीक्षणको नतिजा सार्वजनिक गर्न ७ देखि १० दिन लागेको छ,’ उनले भने, ‘१० दिनसम्म त्यो जमात क्वारेन्टाइनमा बस्छन् । क्वारेन्टाइन भद्रगोल छ । उनीहरू भेट्ने गफ गर्ने गर्छन् । त्यो ७ जनाले रिपोर्ट आउने समयसम्म कतिलाई सार्छन् ?’

पीसीआर नगरी घर पठाउँदा समाजमा संक्रमण फैलिने जोखिम हुने उनले बताए । ‘पीसीआर गरेर नेगेटिभलाई घर र पोजिटिभलाई आइसोलेसनमा राख्ने हो । पीसीआर नगरी पठाउँदा यसले डरलाग्दो अवस्था आउँछ । समाजमा फैलिन सक्छ,’ उनले भने ।

प्रकाशित मिति: बुधबार, जेठ २८, २०७७ १६:५२