कोरोना रोकथाममा प्रदेश ५ सरकारले खर्चियो ७ करोड ७९ लाख बढी रकम

A+ A A-

प्रदेश-५ ले सञ्चालन गरेको कोरोना भाइरस विशेष कोषबाट हालसम्म झण्डै ८ करोड रकम खर्च भएको छ । प्रदेश सरकारले कोरोना रोकथाम तथा नियन्त्रणका लागि ७ करोड ७९ लाख रुपैयाँ भन्दा बढी रकम खर्च गरेको हो ।

कोषबाहेक आन्तारिक मामिला तथा कानुन मन्त्रालयले समेत कोरोना रोकथामका लागि बजेट खर्च गर्दै आएको छ । सामाजिक विकास मन्त्रालयका लेखा अधिकृतका अनुसार हालसम्म प्रदेशमा कोरोना भाइरस नियन्त्रण तथा उपचार कोषबाट ७ करोड ७९ लाख ३० हजार रुपैया खर्च भएको छ ।

मंगलबार प्राप्त विवरणअनुसार कोषमा रहेको कुल १५ करोड ६ लाख १६ हजार ७ सय २ मध्ये ७ करोड ७९ लाख ३० हजार खर्च भई ७ करोड २६ लाख ८६ हजार ७ सय २ रुपैयाँ मौज्जात रहेको लेखा अधिकृत मीनबहादुर घर्ती मगरले जानाकारी दिए । खर्च भएको रकम आइसोलेसन निर्माणदेखि शव वाहन खरिदमा प्रयोग भएको उनको भनाइ छ । स्वास्थ्यकर्मीका लागि आवश्यक पर्ने स्वास्थ्य सामग्री पनि सो रकमबाट खर्च भएको उनले बताए ।

उक्त रकमबाट लुम्बिनी प्रादेशिक अस्पताललाई ३ पटक गरी २ करोड १५ लाख रुपैयाँ दिइएको छ । बुटवलको धागो कारखानामा निर्माण गरिएको कोरोना अस्थायी अस्पताल निर्माण, आइसियू सञ्चालनका लागि प्रदेशबाट प्राप्त रकम खर्च गरिएको अस्पतालका अध्यक्ष सूर्य भटट्राईले जानाकारी दिए ।

त्यस्तै, राप्ती प्रादेशिक अस्पताललाई ३ पटक गरी ३० लाख, भेरी अस्पताललाई १ करोड ४४ लाख रुपैयाँ, भीम अस्पताल भैरहवालाई ५३ लाख ३० हजार रुपैयाँ कोषबाट दिइएको छ । प्रदेश जनस्वास्थ्य प्रयोगशालाका लागि २ करोड ७ लाख रुपैया कोषबाट दिइएको छ । प्रयोगशाला सञ्चालन, मेसनरी खरिदका लागि सो रकमबाट खर्च गरिएको प्रदेश जनस्वास्थ्य प्रयोगशालाका निमित्त प्रमुख डा. राजेन्द्र गिरीले जानाकारी दिए ।

त्यस्तै, स्वास्थ्य निर्देशनालयलाई ५ लाख, प्रदेश स्वास्थ्य आपूर्ति व्यवस्थापन केन्द्रका लागि ५ लाख रुपन्देही दिइएको छ । स्वास्थ्य कार्यालय नवलपरासी, रुपन्देही, कपिलवस्तु, दाङ, बाँके र बर्दियाका लागि ५/५ लाख रुपैयाँ दिइएको सामाजिक विकास मन्त्रालयका सहायक लेखापाल कृष्ण बहादुर पौडेलले जानाकारी दिए । जिल्ला प्रशासन कार्यालय कपिलवस्तु र बाँकेलाई २०/२० लाख रुपैयाँ कोषबाट दिइएको छ ।

त्यस्तै, बुटवल उपमहानगरपालिकालाई २० लाख, नेपालगञ्ज उपमहानगरपालिकालाई १५ र तुल्सीपुर उपमहानगरपालिकालाई १५ लाख रुपैयाँ कोषबाट दिइएको छ । उक्त रकम शव वाहन खरिद गर्नका लागि कोषबाट रकम दिइएको हो ।

प्रकाशित मिति: बुधबार, जेठ २८, २०७७ १४:०८