लकडाउनका बीच बुटवलमा धमाधम विकास निर्माणका काम

A+ A A-

बुटवल उपमहानगरपालिकाले स्वास्थ्य सुरक्षाको प्रबन्ध र सामाजिक दूरी कायम राख्दै विभिन्न योजनाका कामलाई अगाडि बढाएको छ । लकडाउनका कारण अन्यत्र काम रोकिएका बेलामा बुटवलमा भने सुरक्षा प्रबन्धसहित योजनाका काम धमाधम अगाडि बढेका छन् ।

उपमहानगरपालिका प्रमुख शिवराज सुवेदीले स्वास्थ्यकर्मी तथा प्राविधिकसहितको टोलीको निगरानी गरेर सुरक्षा बन्दोबस्ती भए नभएको यकिन गर्दै निर्माणका काम सुचारु गरिएको बताए । उनले निर्माणमा संलग्न निर्माण कम्पनी तथा उपभोक्ता समितिलाई मजदुरको स्वास्थ्य परीक्षण गर्न लगाइएको पनि बताए ।

सञ्चालनमा रहेका यस्ता कामको प्रमुख सुवेदी, उपप्रमुख गुमादेवी आचार्य तथा सम्बन्धित वडाअध्यक्ष र विषयका प्राविधिकहरूले नियमित अनुगमन गरेका छन् भने योजना सञ्चालनमा रहेका ठाउँमा समुदायलाई पनि निगरानीमा खट्न आग्रह गरिएको छ ।

यीबाहेक वडा नं. ११ र १३ का वडा कार्यालय भवन, वडा नं. २ नाली निर्माण, स-साना पुल र विद्यालयका भवन निर्माणका कामलाई सुरक्षा उपायसहित निर्माण सुरू गरिएको छ । बुटवलको सिमसार क्षेत्र कपरकट्टी बैठौलिया तालमा दैनिक ज्यालादारीमा मजदुरले सुरक्षा प्रबन्धसहित काम गरिरहेका छन् । यहाँ करिब डेढ करोड रूपैयाँबराबरको काम भइरहेको उपमहानगरका प्रवक्ता तथा सो ताल रहेको वडा नं. १६ का अध्यक्ष रामप्रसाद रेग्मीले बताए ।

यस्तै, बुटवलको अर्को आन्तरिक बाइपासको मैत्रीपथको विस्तार र स्तरोन्नतिको काम भइरहेको छ । यहाँ करिब ३ करोड रुपैयाँबराबरको काम भइरहेको छ । बुटवलको अर्को महत्त्वपूर्ण सडकका रूपमा रहेको श्रवणपथको पनि विस्तार र स्तरोन्नतिको काम भइरहेको छ । साथै, उजिरसिंह र नरसिंह टोल जोड्ने करिब ७० लाख रूपैयाँबराबरको पुलको पनि निर्माण कार्य चलिरहेको छ भने त्यही क्षेत्रमा व्यवस्थित नाली निर्माणको काम भइरहेको छ ।

वडा नं ४ मा रहेको सुखौरा खोलामा पुल, लुम्बिनी बस टर्मिनलपछाडिको नाली निर्माणको काम, मोतिपुरमा निर्माण हुने थारू संग्रहालय निर्माणको कामको पनि टेण्डरलगायतका प्रक्रिया पूरा भएका छन् । योसँगै त्यहाँ पनि निर्माणका काम सरू हुनेछन् ।

बुटवलको गौरवको आयोजना कालिका पथ नमुना बन्दै

लकडाउन सँगै रोकिएको बुटवलको गौरवको आयोजनाका रूपमा रहेको कालिकापथ आन्तरिक बाइपास सडकको रोकिएको निर्माण कार्य अगाडि बढाइएको छ । विश्वव्यापी महामारीसँगै रोकिएका योजनालाई सुरक्षाको प्रवन्धसहित बुटवलमा सुचारू गरिएको हो ।

बुटवलको वडा नं. ६ को कृषि उपज केन्द्र परिसरदेखि वडा नं. ९ र ११ को योगिकुटीसम्मको भित्री सडकलाई ८२ फुटको कायम गर्दै नमुना मार्ग बनाउने गरी उपमहानगरपालिकाले काम सुरू गरेको थियो । प्रदेशको अस्थायी मुकाम भएसँगै बुटवलमा जनघनत्व र सवारी साधनको चाप बढ्दो छ । ट्राफिक जामको समस्याले भित्री सडकका उपभोक्ता र व्यवसायीहरू मारमा परिरहेका बेला बुटवलले यस खालको गौरवको आयोजना सुरू गरेको थियो ।

सडक क्षेत्र अधिकारमा (राइट अफ वे) मा परेका संरचना हटाउने, नाली निर्माण गर्ने र कल्भर्ट निर्माणका काम अगाडि बढेका छन् । अहिले कालिका पथमा बुटवल उपमहानगरपालिकाले विनियोजन गरेकोे मध्ये करिब १० करोड रुपैयाँबराबरको काम भइरहेको छ ।

मुलुककै प्रमुख व्यापारिक केन्द्र र प्रदेशको अस्थायी मुकामसमेत बुटवलमै भएका कारणले मुख्य सडकहरूमा प्रायः ट्राफिक जाम हुने गरेको छ । कालिकापथ ८२ फुटको निर्माण भइरहेकाले पनि यसलाई बुटवल हाइवेका रूपमा लिइएको र समुदायको समेत प्रत्यक्ष निगरानी रहेको प्रमुख प्रशासकीय अधिकृत चक्रपाणि शर्माले बताए ।

बुटवलको नमुना सडक बनाउने गरी विस्तृत परियोजना प्रतिवेदन (डीपीआर) नै बनाएर काम भइरहेको छ । अघिल्लो आवमै बनाएको डीपीआरअनुसार झण्डै १ अर्ब लागत लाग्नेछ भने अबको १ वर्षमा सम्पन्न हुने अनुमान गरिएको थियो । डीपीआर बनाएसँगै प्रदेश सरकार र संघीय सरकारसँग सहकार्यको आग्रह गरिएको उपमहानगरले बताएको छ ।

उपमहानगरपालिकाका वरिष्ठ इन्जिनियर तथा सहरी पूर्वाधार विकास महाशाखा प्रमुख सुमन श्रेष्ठका अनुसार बाइपास सडकहरूलाई बुटवलको चक्रपथसँग जोड्ने गरी काम भइरहेको छ । बुटवलले चुरे पहाड र तराईलाई जोड्दै झण्डै ४५ किलोमिटरको चक्रपथ निर्माण गरिरहेको छ ।

१ चरणमा काम गरिरहेको बबुल निर्माण कम्पनीले अहिले दैनिक १२ जना मजदुरलाई सुरक्षा प्रबन्धसहित काममा लगाएको छ । आवश्यकता अनुसार पालो बाँढेर प्राविधिक र मजदुरलाई पनि काममा खटाइने निर्माण कम्पनीका सञ्चालक किरण कार्कीले बताए ।

लकडाउनसँगै रोकिएको नाली निर्माणको कामलाई सुचारू गरिएको र अबको केही दिनमा नाली निर्माणको काम पूरा भएपछि कल्भर्टलगायतका काम सुरू हुने बताइएको छ । आवश्यकताअनुसारका प्राविधिक र मजदुरलाई गाडीमा सुरक्षित साथ आवातजावत गराएर काममा लगाइएको छ । अहिले नाली निर्माण गर्ने, फुटपाथ बनाउने काम तीव्र भइरहेको छ ।

पहिलो चरणमा नाली र फुटपाथ निर्माण सक्ने र लगत्तै पिचको काम सुरू हुने उपमहानगरले जनाएको छ । सुरूमा सडक क्षेत्राधिकार (राइट अफ वे)मा परेका संरचना र विद्युतका पोल हटाउन ढिलाइ भएको थियो । अहिले यी सबै समस्या समाधान भएका छन् । २०५४ सालमा कालिका पथलाई ८२ फुटको कायम गर्नेगरी मापदण्ड बनाइएको थियो ।

प्रकाशित मिति: बुधबार, जेठ २८, २०७७ १०:५१