तिलोत्तमा हत्या प्रकरणः क्षतिपूर्तिको माग गर्दा मृतकको पोष्टमार्टम हुन सकेन

तिलोत्तमा हत्या प्रकरणः क्षतिपूर्तिको माग गर्दा मृतकको पोष्टमार्टम हुन सकेन

A+ A A-

रुपन्देहीको तिलोत्तमा नगरपालिका-१० मैनहवा रहेको गंगादेवी पशु फार्ममा सोमबार राती हत्या भएका ५ जनाको अझै पोष्टमार्टम हुन सकेको छैन ।

मृतकका आफन्तले क्षतिपूर्तिको माग गर्दै पोष्टमार्टमका लागि अनुमति नदिँदा पोष्टमार्टम हुन नसकेको प्रदेश प्रहरी प्रवक्ता एसएसपी राजकुमार बैदवारले जानकारी दिए ।

मंगलबार अबेरसम्म मृतकका आफन्तसँग पोष्टमार्टमका लागि सहमति माग गर्न प्रयास गरे पनि सफल हुन सकेन । एसएसपी बैदवारले बुधबार पोष्टमार्टम गर्ने तयारी भइरहेको बताएका छन् । घटनाबारे थप अनुसन्धानसमेत भइरहेको र यथार्थ केही दिनमै बाहिर आउनेसमेत उनले बताए ।

प्रहरीले पाँचै जनाको शव लुम्बिनी प्रादेशिक अस्पताल बुटवलमा राखेको छ । मंगलबार घटनास्थलबाटै मृतकका परिवार र आफन्तले क्षतिपूर्तिको माग गर्दै शव उठाउन दिएका थिएनन् । तर, जनप्रतिनिधीहरूले क्षतिपूर्तिका लागि प्रतिबद्धता जनाएपछि शव उठाउन दिइएको थियो ।

मृतक पोखराज मुसहरकी भाउजू प्रेमकली मुसहरले क्षतिपूर्ति नदिएसम्म पोष्टमार्टमको गर्न नदिने बताइन् ।

सोमबार राती फर्ममा रहेका व्यक्तिको हत्या गरेको आरोपमा प्रहरीले सुर्खेतको लेकबेशी नगरपालिका-५ नेटा स्थायी बसोबास भएर मैनहवामा बस्दै आएका ३२ वर्षीय झसेन्द्रबहादुर सिँजालीलाई नियन्त्रणमा लिएको छ । उनीले प्रहरी समक्ष घटना रिसको आवेगमा गरेको बयान दिएका छन् । उनीमाथि सोमबार राती फार्ममा सुतेका ४ पुरुष र १ महिलासहित ५ जनाको हत्या गरेको आरोप छ ।

घटनाको स्थलगत निरीक्षण गर्दा प्रहरीले फरिया (खन्ती) को प्रयोगले हत्या गरेको हुन सक्ने आशंका गरेको छ ।

घटनामा मृत्यु हुनेमा रूपन्देहीको सैनामैना नगरपालिका-५ दरखासी स्थायी घर भएर ७ वर्षदेखि तिलोत्तमा नगरपालिका-१० मा बस्दै आएका ४० वर्षीय माधव मुसहर, उनकी श्रीमती ३७ वर्षीया जानकी मुसहर, १४ वर्षीय पोखराज मुसहर, १७ वर्षका करन चौधरी र आशिष चौधरी रहो छन् ।

प्रकाशित मिति: बुधबार, जेठ २८, २०७७ ०८:५८