हत्याको दुई सातापछि जर्ज फ्लोइडको अन्त्येष्टि, जातीय न्यायको माग

A+ A A-

प्रहरी हिरासतमा मारिएका अफ्रिकी मूलका अमेरिकी नागरिक जर्ड फ्लोइडको दुई सातापछि अन्तिम संस्कार गरिएको छ । २५ मेमा मारिएका फ्लोइडको अन्तिम संस्कारका क्रममा जातीय न्यायको माग गरिएको छ।

टेक्सासको ह्युस्टनस्थित एक गिर्जाघरमा उनीप्रति अन्तिम श्रद्धाञ्जलि व्यक्त गर्न मानिसहरू जम्मा भएका थिए ।

मिनियापोलिस प्रहरीका एक प्रहरी अधिकारीले फ्लोइडलाई नियन्त्रणमा लिई उनको घाँटीमा ८ मिनेटभन्दा लामो समयसम्म घुँडाले थिचेका कारण उनको मृत्यु भएको थियो ।

सो घटनाको भिडियो सार्वजनिक भएपछि घटनामा संलग्न चारजना प्रहरी अधिकारीलाई बर्खास्त गरेर हत्याको आरोपमा मुद्दा दायर गरिएको छ ।

ह्युस्टन मेमोरिअल गार्डेनमा फ्लोइडलाई उनकी आमाको चिहानसँगै अन्त्येष्टि गरिएको छ । फ्लोइडकी भतिजी ब्रूक विलियम्सले अश्वेत मानिसहरूलाई नोक्सान गराउने कानुनहरूमा परिवर्तनका लागि आह्वान गरिन् ।

उनले प्रश्न गरिन्, ‘किन यो प्रणाली भ्रष्ट र अक्षम हुनुपर्छ ?’ उनले अफ्रिकी अमेरिकीलाई विफल पार्न कानुनहरू व्यवहारमा रहेकाले यस्ता कानुनहरु परिवर्तन गर्नुपर्नेमा जोड दिएकी छन् ।

उनले थपिन्, ‘कोही कोहीले ‘अमेरिकालाई फेरि महान् बनाऔँ’ भनेका छन्, तर के अमेरिका कहिल्यै महान् थियो ?’

राष्ट्रपति पदका डेमोक्र्याटिक उम्मेदवार जो बाइडनले भिडिओ सन्देशमार्फत्‌ अन्तिम संस्कारमा सम्बोधन गरेका थिए ।

उनले भने, ‘जर्ज फ्लोइडका लागि न्याय भएमा हामी अमेरिकामा साँच्चिकै जातीय न्यायको बाटोमा हुनेछौँ।’

फाउन्टेन अफ प्रेज नामक गिर्जाघरमा आयोजित अन्तिम श्रद्धाञ्जलि कार्यक्रममा राजनीतिज्ञ र सेलिब्रेटीसहित करिब पाँच सय सहभागी थिए ।

कार्यक्रममा उपस्थित चर्चित नागरिक अधिकारकर्मी रेभेरेन्ड अल शार्पटनले भने, ‘दास राख्ने मालिकका नातिनातिनाले अहिले विश्वभरि मालिकहरूका शालिक हटाइरहेको म देखिरहेको छु।’

डेमोक्र्याटिक पार्टीका स्थानीय सांसद अल ग्रीनले भने, ‘जर्ज फ्लोइड मिल्काउन हुने कुनै वस्तु थिएनन्। यसकारण हामी यहाँ आएका छौँ। उनी अश्वेत हुनु उनको अपराध थियो।’

फ्लोइडप्रति अन्तिम श्रद्धाञ्जलि व्यक्त गर्न सोमवार छ घण्टा उनको शव गिर्जाघरमा राखिएको थियो ।

मिनियापोलिस र उनी जन्मिएको नर्थ क्यारोलाइनामा पनि स्मृति कार्यक्रमको आयोजना गरिएको थियो।

फ्लोइडको मृत्युपछि जातीय विभेदविरुद्ध अमेरिकामा जारी प्रदर्शन तेस्रो सातामा प्रवेश गरेको छ । वासिंगटन डीसी, न्यूयोर्क, शिकागो, लस एन्जलस र सन फ्रान्सिस्को लगायतका थुप्रै शहरमा ठूला र्‍यालीहरूको आयोजना गरिएको छ।

प्रकाशित मिति: बुधबार, जेठ २८, २०७७ ०६:१८