धर्मपुत्र गुमाउनुपरेको त्यो क्रुर हत्याकाण्ड

A+ A A-

रुपन्देहीको तिलोत्तमा नगरपालिका-१०, मैनहवामा रहेको गंगादेवी पशु फार्म २ वर्षअघि मात्र सञ्चालनमा आएको थियो । यसअघि कुखुरापालन हुने गरेकोमा २ वर्ष अघिदेखि भैँसी र गाई पालन भइरहेको थियो ।

सोमबार राती १० बजेसम्म फार्ममा काम सकेर सुत्न गएका फार्म सञ्चालक कृष्णबहादुर पुनले बिहान आफ्नै फर्ममा ५ जनाको हत्या भएको देखे ।

पुन सदाझैँ बिहान फार्ममा आए । बाहिरबाट गेट खोल्न भने । केही बेरपछि भित्रै रहेका अर्जुन मुसहर गेटमा आए । फर्म सञ्चालकले अर्जुनलाई बुबा, आमालाई उठाएर गेट खोल्न अह्राए ।

अर्जुन गएर बुबाआमालाई बोलाए । नबोलेपछि कृष्णसँग सोधे । तर, कसैले उनको जवाफ दिएनन् । कृष्णले पोखराजलाई बोलाउन भने । अर्जुन उनीहरू सुतेको गोठमा पुगे । सुनसान थियो गोठ ।

गोठमा एउटा ब्ल्याङ्केट देखे । खोलेर हेरेका मात्र के थिए, रगताम्य देखे । हतारहतार गेटमा आएर कृष्णलाई रगत देखिएको छ, कोही बोल्दैनन भन्दै चिच्याए ।

त्यसपछि कृष्ण गेटबाटै हाम फालेर फार्ममा प्रबेश गरे । उनीहरू सुतेको ठाउँमा लामवद्ध ५ जनाको शव देखेपछि छिमेकीलाई गुहार गरे । प्रहरीलाई खबर गरे ।

१७ वर्षीय करण चौधरी, १७ वर्षीय आशिस चौधरी, ३७ वर्षीया जानकी मुसहर, ४० वर्षीय माधव मुसहर र १४ वर्षका पोखराज मुसहर गोठमै ढलिसकेका रहेछन् ।

मृतक करण र आशिष पोखराजका साथी हुन् । जानकी र माधव श्रीमान्/श्रीमती हुन् । उनीहरू फार्ममै काम गर्थे ।

श्रीमान् माधव र श्रीमती जानकीले डेढ वर्षदेखि फर्ममा काम गर्दै आएका थिए । मृतक श्रीमान्/श्रीमती जानकी र माधवका कान्छा छोरा हुन् अर्जुन । जो फार्म सञ्चालकले बोलाउन पठाएका थिए ।

अर्जुनका दाजु करण तिलोत्तमाकै अर्को फार्ममा काम गर्थे । जानकी र माधव त्यहीनजिकै रहेको टिनको टहरोमा बस्थे । फार्मकै कम्पाउण्डमा टहरो छ ।

करण चौधरी, आशिष र पोखराज फ्रि-फायर गेम खेल्थे । सँगै खाना खान्थे । पोखराज पनि करण र आशिषकोमा जान्थे । सोमबार राति मृतक करण खाना खाएर १ घण्टा टीभी हेरेर फार्ममा गफ गर्ने भन्दै आएका थिए ।

करण र आशिष तिलोत्तमाकै स्थानीय हुन् भने जानकी र माधव सैनामैनामा घर भए पनि मैनहवामा बस्थे ।

१४ वर्षीय पोखराजलाई पशु फार्म सञ्चालकले धर्मपुत्रको रूपमा राखेका थिए । उनका बुबाआमा छैनन् । राति करिब १२ बजे घटना भएको हुन सक्ने आंशका प्रहरीको छ ।

५ जनाको हत्या भएपछि यतिबेला मैनहवा क्षेत्रमा सन्नाटा छाएको छ । हत्या आरोपमा फार्ममै काम गर्ने झसेन्द्र सिंजाली पक्राउ परिसकेको जिल्ला प्रहरी कार्यालय रुपन्देहीका प्रवक्ता खड्कबहादुर खत्रीले जानकारी दिए ।

पक्राउ पर्ने झसेन्द्रको नालीबेली

पक्राउ पर्ने झसेन्द्र सिंजालीको स्थायी घर सुर्खेत हो । उनी १६ वैशाखदेखि सो गोठमा काम गर्न आएका हुन् । दूध दुहुने, सरसफाइ गर्ने, घाँस काट्ने काम सिंजालीले गर्थे ।

पशु फार्म सञ्चालक कृष्णबहादुर पुनका अनुसार सिंजाली सन्की पाराका थिए । उनको यही व्यवहारका कारण श्रीमतीले पनि छाडेर गएको उनी बताउँछन् ।

‘लकडाउनका कारण घर जान पाएका थिएनन् । श्रीमतीले पनि छाेडेर गई भन्दै विरक्तिइरहन्थे’, फार्म सञ्चालक पुन भन्छन् । फार्ममा जानकी, माधव कसैसँग पनि झगडा गरेको पुनले अहिलेसम्म थाहा पाएका थिएनन् ।

सिंजाली मदिरा पिउने गर्थे । माधवसँगै धेरै पटक बसेर पिएको पुनले देखेका थिए । सोमबार रातिको घटना पनि मदिराको मातमै भएको हुन सक्ने आँकलन पुनको छ ।

विक्षिप्त अवस्थामा थिए सिंजाली

सिंजाली घटनास्थलमै भुसमा लुकेको अवस्थामा प्रहरीले फेला पारेको हो । ५ जनाको हत्या गर्दा उनी आफू पनि विक्षिप्त बनेका थिए । बेहोस भएझैँ गरी भुसमा लुकेका थिए ।

घटनास्थलमा भेटिएको फरुवामा रगत पनि लागेका कारण फरुवा प्रहारबाटै हत्या भएको हुन सक्ने प्रहरीको आशंका छ । तर, ५ जनाको हत्या गर्दासमेत किन कसैले प्रतिकार गरेनन् ? घटना हुँदा सिंजालीले अरु केही उपाय रचेका थिए कि ? यो भने अनुसन्धानले देखाउने प्रहरी बताउँछ ।

घटनास्थलमा हेर्दा पनि कसैले प्रतिकार नगरेको र सबैको शव लामवद्ध अवस्थामा भेटिएको प्रहरी प्रवक्ता खत्रीको भनाइ छ । पक्राउ परेका उनलाई बुटवलको इलाका प्रहरी कार्यालयमा राखिएको छ ।

राति १ बजे बलरी सुत्ने कोठामा पुगेका थिए सिंजाली

गालरी मुसहर मृतक जानकी मुसहरकी बैनी हुन् । उनी पनि मैनहवामै काम गर्छिन् । घटनाको दिन (सोमबार राति) उनी पनि गंगादेवी फार्ममा आएकी थिइन् ।

दिदी भिनाजु, सिंजाली, करण, आशिष, पोखराज गोठमा गफ गर्दै बसेपछि जानकीका कान्छा छोरा अर्जुन मुसहरसँग फार्म परिसरमै रहेको टहरामा सुतिन् ।

राति १ बजे सिंजाली आफ्नो कोठामा लौरोसहित आएको गाेलरी मुसहरले बताइन् ।

‘मैले राति किन आएको, जाऊ भनेँ । मलाई गाउँमा सबैले नराम्रो भन्छन् भन्दै कराउँदै थियो, मैले जा भनेपछि गयो, घटनाबारे मलाई अरु केही थाहा भएन’, उनले भनिन् ।

सिंजालीले माधवलाई भन्थ्यो, कुन दिन मारिदिन्छु

हत्या आरोपमा पक्राउ परेका झसेन्द्र सिंजाली मृतक माधव मुसहर सँगै फार्ममा काम गर्थे । कहिलेकाहीँ रक्सी पनि पिउँथे । माधवका छोराका अनुसार सिंजालीले माधवलाई कुनै दिन मारिदिन्छु भन्दै बेलाबेलामा धम्क्याउँथे ।

‘बुबालाई मारिदिन्छु भन्थे अंकल (सिंजाली) ले । रिस त केही पनि थिएन तर किन हो खै रिसमा मारिदिन्छु भन्थे’, मृतक माधवका छोरा करण मुसहरले भने ।

उनका अनुसार १४ जेठमा पनि सिञ्जाली र माधवबीच झगडा भएको थियो ।