जुम्लाबाट गलैँचा बेच्न आएका ३ बालबालिकासहित १० जनाको हेटौँडाबाट उद्धार

A+ A A-

कर्णाली प्रदेशको जुम्लाबाट गलौँचा बेच्न आएका बालबालिकासहित १० जनालाई हेटौँडाबाट उद्धार गरिएको छ ।

लकडाउनअघि जुम्लामा बनेको गलैँचा बेच्न मकवानपुर आएका बालबालिकासहित १० जनाको टोलीलाई सोमबार उद्धार गरी सुर्खेत पठाइएको छ । उद्धार गरिएका सबै जुम्लाको हिमा गाउँपालिकाका रहेका छन् । मकवानपुर उद्योग वाणिज्य संघ, नारायणी यातायात व्यवसायी संघ र नारायणी यातायात व्यवसायी कम्पनी प्रालीको सहजीकरणमा उनीहरूलाई उद्धार गरिएको छ ।

३ बालबालिकासहित टेक राज बम, मन कुमार शाही, गोरो शाही, रुपा बम, महेन्द्र शाही, पुन्ना शाही, सम्झौता बमलाई उद्धार गरिएको थियो । टेक राज बमले हेटौँडामा मजदुरी गरेर पेट पालेको सुनाए ।

‘गलैँचा बेच्न आएका थियौं । याहाँ आएपछि लकडाउन भयो । जुम्ला जान कुनै विकल्प हामीसँग थिएन् । घर बनाउने ठाउँमा मजदुरी गरेर यतिका दिनसम्म बसेका थियौं’ बमले भने– जुम्ला पठाउन सहयोग गर्नुहुनेलाई धन्यवाद दिन चाहन्छु ।

हेटौंडामा चैतदेखि अलपत्र परेका उनीहरुलाई हेटौंडा–१ उद्योग वाणिज्य संघ चोकबाट दिउँसो ना १ ज १९२२ नम्बरको टाटासुमोमा चढाएर पठाइएको छ । जिल्ला प्रशासन कार्यालय मकवनापुरले सुर्खेतसम्मको सवारी पास जारी गरेको छ ।

उद्दार गरिएका सबैलाई सुर्खेतबाट कर्णाली प्रदेशको सामाजिक विकास मन्त्रालयले जुम्लासम्म पठाउने व्यवस्थापन मिलाएको उद्योग वाणिज्य संघका अध्यक्ष कृष्ण कटुवालले जानकारी दिए । ‘हामीले सुर्खेतसम्मको पास जारी गरेर पठाएका छौं । त्याहाँबाट प्रदेशको सामाजिक विकास मन्त्रालयले जुम्लासम्म पठाउने व्यवस्था मिलाइएको छ’ अध्यक्ष कटुवालले भने ।

प्रकाशित मिति: सोमबार, जेठ २६, २०७७ १९:२५