लकडाउन नखुल्दै व्यापार बढ्यो, सातामै साढे २८ अर्ब रुपैयाँको सामान आयात

A+ A A-

सरकारले ११ चैतबाट लकडाउन लागू गरेको छ । लकडाउन लागू गरेपछि नेपालको अन्तर्राष्ट्रिय व्यापार ५५ प्रतिशले खुम्चेको छ ।

लगातार १० सातासम्म लकडानउन लगाएर पनि सरकारले आर्थिक क्रियाकलाप सहजीकरणतर्फ उन्मुख नदेखिएपछि उद्योगी व्यवसायीको अवज्ञा र सरकारले ४२ प्रकारका उद्योगलाई दिएको छुटले पछिल्लो १ सातामा भने सामान्य अवस्थामा भन्दा बढी सामानाको आयात भएको छ ।

आयात व्यापार चालू वर्षमा गत वर्षभन्दा न्यून रहेको छ । गत आर्थिक वर्षमा १४ खर्ब १८ अर्ब रुपैयाँको रहेकोमा चालू आर्थिक वर्षमा भने घटेको थियो । जस हिसाबले प्रतिसाता औषत २६ अर्ब रुपैयाँ सामग्री आयात भएको थियो । पछिल्लो १ साता भने अधिकतम् साढे २८ अर्ब रुपैयाँभन्दा बढीको कारोबार भएको छ । लकडाउनको २ सात ६ अर्ब रुपैयाँमा सीमित रहेको आयात पछिल्लो ४ साता औषत २० अर्बमाथिको छ ।

साप्ताहिक आयात

भन्सार विभागका महानिर्देशक सुमन दाहालले औषत जेठमा ३५ अर्ब रुपैयाँको कारोरबार हुनु पर्नेमा साढे २८ अर्ब रुपैयाँको पुगेको बताउँछन् । अन्य महिनाको तुलनामा जेठमा बढी कारोबार हुने भएता पनि औषतभन्दा पछिल्लो एक सातामा २ अर्ब रुपैयाँभन्दा बढीको कारोबार भएको छ । जेठ महिनाको २५ दिनमा मात्रै ७३ अर्ब ९४ करोड रुपैयाँ सामग्री आयात भएको छ ।

जबकि, चैतको २० दिन र वैशाखको ३० गरी ५० दिनको अवधिमा ८० अर्ब ३१ करोड रुपैयाँको सामान आयात भएको छ । लकडाउन पछिको ७५ दिनको अवधिमा १ खर्ब ५४ अर्ब २१ करोडको आयत भएको भन्सार विभागको तथ्यांक रहेको छ । यस अवधlमा सबैभन्दा बढी वीरगञ्ज भन्सार कार्यालयबाट करिब ४५ अर्ब रुपैयाँ बराबरको सामान आयत भएको छ ।

पछिल्लो सात दिनमा लगातार २ अर्ब भन्दा बढीको सामान आयत भएको भन्सार विभागको तथ्यांकमा उल्लेख छ । अझै बढ्ने क्रम देखिएको भन्सार विभागले जनाएको छ ।

गत वर्ष जेठ महिनामा १ खर्ब २७ अर्ब रुपैयाँको सामान आयात भएकोमा आइतबारलाई आधार मान्दा यो वर्ष जेठ महिनामा करिब १ खर्ब १० अर्ब रुपैयाँ बराबरको सामान आयत हुने देखिन्छ । आयत व्यापार गत वर्षभन्दा ५ प्रतिशतले कमी देखिएको छ । मुलुकभित्रका उपजले बजार नपाएको गुनासो अहिले पनि उस्तै देखिए तापनि आयात व्यापार भने पुरानै गतिमा भएको देखिएको छ । व्यापारीले भने नाकाबाट सामान आयात बढे पनि कारोबार पुरानो गति जान नसकेको दाबी गर्छन् ।

प्रकाशित मिति: सोमबार, जेठ २६, २०७७ १९:४८