स्वदेश आउन नपाएपछि विदेशमै आन्दाेलनमा उत्रिए नेपाली श्रमिक

A+ A A-

४ वर्षअघि मोरङका राजेन्द्र अधिकारी रोजगारीका लागि कुवेत पुगेका थिए । अधिकारीको करार अवधि सकिएकाे २ वर्ष भयो । राम्रो कम्पनी भएका कारण उनी अवैध भएर कुवेतमै काम गर्दै आएका थिए । कुवेत सरकारले २ महिनाअघि अवैध रूपमा कुवेतमा बसेर काम गर्दै आएका विदेशी कामदारलाई स्वदेश फर्कन आममाफी दिएको थियो ।

साे आममाफीमा अधिकारी पनि सहभागी भएका थिए । ५७ दिनदेखि घर फिर्ती केन्द्रमा असुरक्षित रूपमा बसिरहेको अधिकारीले बताएका छन् । घर फिर्ती केन्द्रमै बसेर मर्न लागे पनि कुवेतमा रहेको दूतावासले बेवास्ता गरेको अधिकारीले बताए ।

‘आममाफी पाएर घर फिर्ती केन्द्रमा बसेका प्राय: सबै अलपत्र अवस्था छन् । आममाफी पाएका करिब ३ हजार ७ सय नेपालीले समस्या भए पनि दूतावासले मतलब गर्दैन । आममाफी पाएका विदेशी कामदार फर्कंदा सबै खर्च कुवेत सरकारले ब्यहोर्ने भएको छ,’ उनले भने, ‘सरकारले हामीलाई नेपाली नागरिक होइनजस्तो गर्छ । अब जहाँ भए पनि मरिने नै रहेछ । भोक हडताल बसेर भए पनि मर्ने हो । सास नेपाल नगए पनि सरकारले लास त लैजान्छ होला नि । तत्काल स्वदेश नफर्काए भोक हडताल बस्ने हो ।’

५७ दिनदेखि अलपत्र अवस्थामा कुवेतको सेल्टरको क्वारेन्टाइनमा बस्दै आएका करिब ९ सयभन्दा बढी नेपाली कामदारले सोमबारदेखि आन्दोलन सुरु गरेको उनको भनाइ छ ।

यस्तै, कुवेत सरकारले दिएको आममाफी प्रक्रियामा सहभागी भएका कामदार तत्काल स्वदेश फर्काउन माग गर्दै आन्दोलनमा उत्रिएको झापाका दीपेन्द्र लिम्बूले जानकारी दिए । कुवेतमा रहेकाे नेपाली दूतावासले आजभोलि भन्दै घर फिर्ती केन्द्रमा राखेको ५७ दिन पुगेकाे लिम्बूले बताए ।

‘हामी रहरले कुवेत घुम्न आएका होइनौँ । देशमा सरकारले रोजगारी नदिएपछि बाध्यताले वैदेशिक रोजगारीमा कुवेत आएका हाैँ । कुवेत सरकारले बस्न दिँदैन, नेपाल सरकार स्वदेश लैजान खोज्दैन । अब के कुवेतमै मर्नुपर्ने हो ?,’ उनले भने, ‘नेपाल सरकारले तत्काल स्वदेश नफर्काए फिर्ती केन्द्रमा बसेका सबै एकै पटक भोक हडतालमा बस्छाैँ । कुवेत सरकारले पैसा हालिदिएर घर पठाउन खोज्दा पनि सरकारले बेवास्ता गरिरहेको छ । स्वदेश फर्कन नपाए भोक हडताल बस्ने हो ।’

कुवेतको इराकको सिमाना, जिलिव र फर्मानिया क्षेत्रका विभिन्न स्थानमा अलपत्र ४ हजारभन्दा बढी नेपाली कामदारहरू उद्धारका लागि नेपाल सरकारलाई गुहारिरहेको भए पनि अहिलेसम्म उनीहरूको माग सुनुवाइ नगरेको फिर्ती केन्द्रमा बसेका कामदारको गुनासो छ ।

अवैधानिक हैसियतमा रहेका उनीहरूलाई कुवेत सरकारले गत अप्रिल २६ देखि ३० सम्म स्वदेश फर्किनसक्ने सूचना जारी गरेपछि आफूहरूले गर्दै आएको काम र क्याम्प छोडेर स्वदेश फर्किने प्रक्रियामा सहभागी भएको गराएको थियो ।

अवैध आप्रवासी कामदारलाई स्वदेश पुग्ने हवाई भाडासमेत तिरिदिने निर्णय गरेको कुवेत सरकारले जनाए पनि अहिलेसम्म नेपाल सरकारले भने बेवास्ता गरेको छ । यो विषयमा कुवेतस्थित नेपाली दूतावासले अहिलेसम्म कुनै प्रतिक्रिया दिएको छैन ।

हाल स्वदेश फर्कन नपाएका ३ हजार ७ सय नेपाली कामदार नेपाली दूतावासअगाडि आन्दोलनमा उत्रिएकाे कुवेतस्थित दूतावासले जनाएकाे छ । हाल नेपाल फर्किन नपाएका ती सबै नेपाली कामदार कुवेतस्थित फिर्ती केन्द्र बसिरहेका छन् । सरकारले बेवास्ता गरेकाले कुवेत प्रहरीले पनि नाराबाजी गर्न छुट दिएको पीडितहरूले बताएका छन् ।

फिर्ती केन्द्रमा क्वारेन्टाइनमा बसेका कारण धेरै नेपालीहरू बिरामीसमेत परेको पीडितहरूले बताएका छन् । कोरोना भाइरस संक्रमण बढ्दै गएपछि अवैध आप्रवासी कामदारलाई स्वदेश फर्काउन कुवेत सरकारले जरिमानासमेत मिनाहा गरी आममाफी दिएको हो ।

प्रकाशित मिति: सोमबार, जेठ २६, २०७७ १८:५९