मल माग्दै सडकमा उत्रिए कृषक, उपमेयरलाई दिए मकैको बोट

A+ A A-

रसायनिक मलको चरम अभाव भएपछि मकवानपुरका कृषकले सडकमा उत्रिएर प्रदर्शन गरेका छन् ।

कृषकले हेटौँडामा सरकारविरुद्ध प्रदर्शन तथा नाराबाजी गरेका छन् । सोमबार हेटौंडाका मल बिक्री केन्द्रमा मल नपाएपछि कृषकले हेटौँडाको बुद्धचोकमा जम्मा भएर सरकारविरुद्ध प्रदर्शन गरेका हुन् । उनीहरूले यथाशीघ्र मल उपलब्ध गराउन सरकारसँग माग गरेका छन् ।

सडकमै प्रदर्शन गरेपछि प्रहरीले आन्दोलित कृषकलाई सडकबाट हटाएको थियो । हेटौँडा उपमहानगरपालिकाकी उपमेयर मीनाकुमारी लामासँग छलफल गर्ने तय भएपछि आन्दोलित कृषक सडकबाट हटेका हुन् । उपमेयर लामालाई प्रदर्शनमा उत्रिएका कृषकले मकैको बोट दिँदै मल उपलब्ध गराउन सांकेतिक दबाब दिएका छन् ।

मल नपाएर आक्रोशित बनेका कृषकलाई यथाशीघ्र युरिया मल उपलब्ध गराउने आश्वासन उपमेयर लामाले दिएकी छिन् । लामाले आन्दोलित कृषक, कृषि सहकारी संस्थाका प्रतिनिधि, जनप्रतिनिधिलगायतसँग मल उपलब्धताका बारेमा छलफल गरेकी छिन् ।

उपमेयर लामाले मंगलबार ३ सय २० बोरा मल झिकाएर वितरण गर्ने कृषकसमक्ष प्रतिवद्धता जनाइन् । मल अभाव हुँदा कृषक मर्कामा परेको लामाको भनाइ छ । मल अभाव देशभरका कृषकको समस्या भएको भन्दै सबै निकायबाट समस्याको समाधान निकाल्नु पर्ने लामाले बताइन् ।

कृषकले युरिया मलको अभावमा मकै उत्पादनमा ह्रास आएको बताए । ‘यता अमेरिकी जातको फौजी किराले मकै खाएर हैरान भएका छौँ । उता युरिया मल नपाउँदा मकै उत्पादन घट्ने चिन्ता बढेको छ’ मकवानपुरगढीका कृषक सुरेन्द्र हुमागाईंले बताए ।

उनले युरिया मलकै खोजीमा करिब १ हप्ताभन्दा बढी दिन हेटौंडाका मल बिक्री केन्द्रको चक्कर लगाएको बताए । सहकारीमार्फत युरिया मल वितरण भइरहे पनि सबै किसानले मल नपाएको हुमागाईंको गुनासो छ ।

कृषि सामग्री कम्पनी लिमिटेड र साल्ट ट्रेडिङ कर्पोरेसनले सहुलियत अनुदानको युरिया मल सहकारीमार्फत् कृषकलाई बिक्री गर्दै आएको छ । सहुलियत अनुदानको युरिया मल कृषकहरुमा पर्याप्त वितरण हुन सकेको छैन । कम परिमाणमा मल उपलब्ध गराएका कारण कृषकको आवश्यकताअनुसार मल वितरण गर्न नसकिएको सहकारी संस्थाहरुले बताएका छन् ।

हेटौंडा–११ का कृषक बबिम वर्तौलाले मल नपाउँदा किसानलाई जहिल्यै समस्या भएको गुनासो गरे । मलको पर्खाइमा धेरै दिनदेखि बजार धाएको तर मल नपाएपछि बाध्य भएर नाराबाजी गरिएको कृषकले बताएका छन् ।

प्रकाशित मिति: सोमबार, जेठ २६, २०७७ १६:५२