हेटौँडामा ५० बेडको ‘होल्डिङ सेन्टर’ संचालन गर्ने निर्णय

A+ A A-

जिल्ला समन्वय समिति (जिसस) मकवानपुरले हेटौँडामा होल्डिङ सेन्टर सञ्चालन गर्ने भएको छ ।

बाहिरबाट आउने मकवानपुरवासीलाई बढीमा १ दिनसम्म राख्न मिल्ने गरी ५० बेडको होल्डिङ सेन्टर सञ्चालन गर्ने निर्णय समितिले गरेको छ । भारतलगायत वैदेशिक रोजगारीबाट जिल्लामा आउने बढेपछि स्थानिय तहको सहकार्यमा होल्डिङ सेन्टर सञ्चालन गर्ने निर्णय जिससको बैठकले गरेको हो ।

होल्डिङ सेन्टर सञ्चालनका लागि जिल्लास्थित सबै स्थानीय तहले २ लाखका दरले सहयोग गर्ने प्रतिवद्धतासमेत जनाएको जिससका प्रमुख रघुनाथ खुलालले जानकारी दिए । मकवानपुरका १ उपमहानगरपालिका, १ नगरपालिका र ८ गाउँपालिका छन् ।

वैदेशिक रोजगारीबाट फकर्नेलाई सम्बन्धित स्थानीय तहले लैजान व्यवस्थापन गर्नुअघि बढीमा १ दिनसम्म राख्न सेन्टर सञ्चालन गर्न लागिएको समितिका उपप्रमुख भगवती पुडासैनीले जानकारी दिइन् । ‘समन्वय समितिकै व्यवस्थापनमा ५० बेडसम्मको होल्डिङ सेन्टर सञ्चालन गर्न लागेका हौँ,’ पुडासैनीले भनिन् ।

समितिको बैठकले स्थानीय तहले विदेशबाट आएका र आउने सम्भावना भएकाहरूको लगत संकलन तथा आँकलनसहितको प्रतिवेदन तयार गर्ने, स्थानीय तहमा भएका क्वारेन्टाइनलाई व्यवस्थित गर्दै लाने विषयमा छलफल भएको छ ।

विदेशबाट आफ्नो घर फर्किएका व्यक्तिहरूलाई दुर्व्यवहार तथा अपमान नगर्नका साथै आफ्नो घर, ठाउँमा फर्किनेप्रति सकारात्मक धारणा, सभ्य व्यवहार र सकारात्मक सोच राख्दै सहयोग गर्न सबैमा आव्हान गर्ने निर्णय समितिले गरेको छ ।

प्रकाशित मिति: सोमबार, जेठ २६, २०७७ १५:०५