पोखरामा मृत्यु भएका संक्रमितको शव व्यवस्थापनको जिम्मा भगवती दल गणलाई

A+ A A-

पोखरामा कोरोना संक्रमणबाट मृत्यु भएका स्याङ्जाका ५८ वर्षीय पुरुषको शव व्यवस्थापनको जिम्मा फूलबारीस्थित भगवती दल गणलाई दिइएको छ ।

मिर्गौला रोगको उपचार गराउन भारत पुगेका स्याङ्जाको वालिङ नगरपालिकाका उनलाई नगरपालिकाको सहयोगमा सीमा नाकाबाट उद्धार गरी थप उपचारका लागि पश्चिमाञ्च क्षेत्रीय अस्पताल पोखरा पठाइएको थियो ।

अस्पताल भर्ना भएलगत्तै उनको कोरोना परीक्षणका क्रममा आइतबाट पोजिटिभ रिपोर्ट आएको थियो । उनको उपचारकै क्रममा सोमबार बिहान पश्चिमाञ्चल क्षेत्रीय अस्पतालको आइसोलेसन वार्डमा मृत्यु भएका थियो ।

भारतबाट फर्कँदा अवस्था नाजुक

भारतमा उपचारका लागि गएका उनी नेपाल–भारत सीमामा अलपत्र परेपछि वालिङ नगरपालिकाको पहलमा २१ गते नेपाल भित्र्याइएको थियो । वालिङ ३ घर भएका उनी श्रीमतीसँगै दिल्लीबाट सुनौली नाकासम्म आएका थिए ।

अवस्था नाजुक भएको जानकारी पाएपछि त्यहाँबाट फर्किनलाई नगरपालिकाले छुट्टै गाडी पठाएर उनलाई ल्याइएको वालिङका स्वास्थ्य महाशाखा प्रमुख कमल पाण्डेले जानकारी दिए ।

उनका अनुसार उनीहरू सुनौलीसम्म आफ्नै हिसाबले आएका थिए । त्यहाँबाट नगरपालिकाले प्राइभेट कार पठाएर २१ जेठकाे राति वालिङ ल्याएको हो । राति क्वारेन्टाइनमा राखेपछि भोलिपल्ट बिहान पोखरा पठाइएको थियो ।

बिरामी भएकाले थप उपचारका लागि २२ जेठका दिन बिहानै श्रीमान्/श्रीमती दुवैलाई पोखरा पठाइएको उनले बताए । पोखरा आएपछि स्वाब संकलन गरिएकोमा उनमा शुक्रबार कोरोना पोजिटिभ देखिएको हो ।

पश्चिमाञ्चल क्षेत्रीय अस्पतालका निर्देशक डा. अर्जुन आचार्यका अनुसार ती पुरुषमा उच्च रक्तचाप, चिनीरोग, रक्तअल्पता, सेप्टिसिमिया (रगतमा ब्याक्टेरियाको संक्रमण) र मिर्गौलासम्बन्धी समस्या देखिएको थियो ।

संक्रमण पुष्टि भएलगत्तै अस्पतालकै आइसोलेसनमा भर्ना गरिएको थियो । ती पुरुषका श्रीमती र छोरीको भने स्वाब संकलन नभएको अस्पतालका निर्देशक आचार्यले जानकारी दिए ।

उनका अनुसार दुवैलाई पोखरा– ५, मालेपाटनमा महानगरपालिकाले बनाएको क्वारेन्टाइनमा राखिएको छ । वालिङका यी संक्रमित कोरोनाबाट मृत्यु हुने गण्डकी प्रदेशका पहिलो व्यक्ति हुन् ।

प्रकाशित मिति: सोमबार, जेठ २६, २०७७ १२:५४