बजेट निर्माणको अन्तिम तयारीमा जुट्यो प्रदेश ५

A+ A A-

प्रदेश-५ सरकार बजेट निर्माणको अन्तिम तयारीमा जुटेको छ । कोरोना भाइरस (कोभिड-१९) महामारीले शिथिल बनाएको अर्थतन्त्रलाई उठाउने गरी ल्याउन लागिएको बजेट असार १ गते प्रदेशसभामा प्रस्तुत हुनेछ ।

कृषि उत्पादन, स्वास्थ्य सुधार र रोजगारी स्थापनालाई प्राथमिकतामा राखेर नीति तथा कार्यक्रम ल्याएको प्रदेश-५ सरकार त्यहि प्राथमिकताका आधारमा बजेट निर्माणको अन्तिम तयारीमा जुटेको हो । मन्त्रालयबाट प्राप्त हुने खर्च विवरण आइसकेकाले बजेट लक गरिएको छ । अहिले बजेटको भाषा र अंक रुजुको काम भइरहेको छ ।

कोरोनाले गरेको क्षति न्यूनीकरण गर्न बजेटमा नयाँ कार्यक्रम समावेश गर्नेछ भने स्वदेशी श्रमिक प्रयोगमुलक योजना बनाउने र उक्त योजना कार्यान्व्यनकाका लागि बजेटमा समेटिने प्रदेश सरकारले जनाएको छ । 'विदेशबाट फर्कने युवालाई नेपालमै रोजगार प्रदान गर्न कृषि, रोजगारका क्षेत्रलाई बजेटमा प्राथमिकता दिइएको छ । त्यति मात्र हैन वनलाई पनि रोजगारमा जोड्ने गरी बजेट तयार गरिँदै छ' सरकारका प्रवक्ता बैजनाथ चौधरीले भने ।

बजेटमा स्मार्ट कृषि गाउँ, मुख्यमन्त्री ग्रामीण कार्यक्रमलगायतका पुराना योजनालाई पनि निरन्तर अगाडि बढाइने उनले बताए । स्वास्थ्यकर्मी, सुरक्षाकर्मीको मनोबल उच्च पार्ने गरी बजेट ल्याइने उनको भनाइ छ । स्रोत अनुमान समितिको सिफासिमा अनुमान गरिएको बजेट प्रतिवेदनका आधारमा आर्थिक मामिला तथा योजना मन्त्रालयले बजेट तयार गरेको हो ।

प्रस्तुत हुने बजेट चालु आर्थिक वर्षको ३६ अर्ब ४१ करोड ६८ लाखबाट बढेर ३८ अर्ब हारहारी हुने आकंलन गरिएको छ । कृषिमा आधारित रोजगारमूलक कार्यक्रम, स्वास्थ्यका पूर्वाधार, उपकरण र जनशक्ति व्यवस्थापनमा बजेट बढ्ने बताइएको छ । प्रदेशका १३ वटा निकायबाट माग भएको बजेट प्राथमिकतामा हेरेर बजेट तयार गरिएको आर्थिक मामिला तथा योजना मन्त्रालय जनार्दन पौडेलले जानाकारी दिए ।

बजेटमा चालु वर्षको जस्तै अंकका आधारमा भोतिक पूर्वाधार मन्त्रालयमा बजेट जाने छ । चालु वर्षमा सुरु भएका अधुरा योजना सम्पन्न गर्नुपर्ने भएकाले पनि भौतिक पूर्वाधार मन्त्रालयमा बजेट जाने बताइएको छ । यद्यपि यो बजेट कोरोना फोकस बजेट भएकाले त्यसबाट सिर्जित अवस्थाको आंकलन गर्दै कृषि मन्त्रालयमा बजेटको अंक बढ्ने छ ।

प्रदेश योजना आयोगका उपाध्यक्ष प्राडा. ईश्वर गौतमले अंकमा भौतिक मन्त्रालयमा बजेट धेरै जाने भए पनि कोरोनाको फोकस योजनामा स्वास्थ्य र कृषिमा बजेट बढी हुने बताए ।

१२ जिल्लाका जिल्ला अस्पतालाई ५० बेड बनाउने, तुल्सीपुर र बुटवलको प्रादेशिक अस्पताललाई विशिष्टकृत बनाउने गरी बजेटको प्राथमिकतामा पर्ने उनले बताए । स्वास्थ्यमा जनशक्ति बढाउने, भौतिक विकास गर्ने गरी बजेटको प्राथमिकतामा पर्ने उनले बताए ।

त्यस्तै, बजेटमा रोजगार दिने क्षेत्रलाई प्राथमिकतामा राख्ने, खाद्यान्य उत्पादन बढाउनका लागि सहुलियत, कोरोनाबाट प्रभावित क्षेत्रलाई माथि उठाउन विभिन्न सहुलियत पनि बजेटले दिनेछ । आम्दानीको स्रोत गत वर्षको तुलनामा घटने निश्चित भएकाले करको दायरा फराकिलो बनाइने छ ।

पर्यटन, कृषि र वनलाई जोडेर एग्रो टुरिजमको रूपमा विकास गर्ने योजना बजेटले सम्बोधन गर्नेछ । अर्थमन्त्रीका रूपमा मुख्यमन्त्री शंकर पोखरेलले नै प्रदेशको तेस्रो बजेट ल्याउनेछन् । कोरोना अवस्था सामान्य भएको अवस्थामा प्रदेशको स्थायी राजधानीका लागि आवश्यक पूर्वाधार खर्चमा पनि बजेट छुट्याइने छ ।

प्रकाशित मिति: सोमबार, जेठ २६, २०७७ ११:५७