क्वारेन्टाइनमा बसेकाको पीसीआर परीक्षण नगर्दा समुदायमा कोरोना फैलिने त्रास

क्वारेन्टाइनमा बसेकाको पीसीआर परीक्षण नगर्दा समुदायमा कोरोना फैलिने त्रास

A+ A A-

रुपन्देहीका अधिकांश क्वारेन्टाइनमा बसेकाहरूलाई र्‍यापिड डायग्नोस्टिक टेस्ट (आरडीटी) कै भरमा घरमा पठाउने गरेका छन् ।

पालिकाहरूले क्वारेन्टाइनहरूलाई व्यवस्थित गराउन केही प्रयास गरे पनि संक्रमण भए/नभएको यकिन गर्न आरडीटीमै निर्भर छन् । जसले गर्दा समुदाय स्तरमा कोरोनाको संक्रमण फैलिने डर बढी छ ।

नेपालमा लक्षणविना नै कोरोना संक्रमित बढिरहेका बेला आरडीटी चेक मात्र गर्दा समुदाय स्तरमा कोरोना फैलिन सक्ने आँकलन गरिएको छ ।

भारतबाट फर्केर रुपन्देहीका विभिन्न क्वारेन्टाइनमा बसेकाहरूमा कोरोना संक्रमण फैलिरहेको पाइएकोमा अधिकांश क्वारेन्टाइनमा बस्नेलाई पीसीआर परीक्षण नगरी घर पठाइने गरिएको हो । रुपन्देहीका अधिकांश क्वारेन्टाइनमा बस्नेहरू भारतबाट फर्केका रहेका छन् ।

रुपन्देहीको गैडहवा गाउँपालिका–६ सूर्यपूरामा ६० जना क्वारेन्टाइनमा रहेकोमा आरडीटी टेस्ट नेगेटिभ आएपछि १४ जनालाई बिहीबार घर पठाइएको त्यहाँ कार्यरत सिनियर अहेव देवीकला थापाले बताइन् ।

आरडीटी पोजिटिभ आएका चार जनालाई जोगडा पठाइएको उनले जानकारी दिइन् । सो क्वारेन्टाइनमा तीन महिनाको बच्चा, सात महिलासहित अहिले ३६ जना छन् । भारत माइतीबाट फर्केकी एक महिलालाई बच्चासहित क्वारेन्टाइनमा राखिएको हो ।

त्यसैगरी, सैनामैना न.पा.– ६ स्थित सहिद नारायण पोखरेल रामापुर क्याम्पसमा रहेका १३ जनालाई आरडीटी नेगेटिभ देखिएपछि घर पठाइएको छ ।

सो क्वारेन्टाइनमा हाल वडा नं. ५, ६ र ७ सहित वडा नं. ३ का केहीसमेत गरी ६० जना रहेको क्वारेन्टाइन व्यवस्थापन समितिका संयोजक वडा नं.६ का अध्यक्ष वसन्त पाण्डेले जानकारी दिए ।

सो क्वारेन्टाइनमा चार जनाको पीसीआर विधिबाट परीक्षण गरिएकोमा पोजेटिभ रिपोर्ट आएका एक जनालाई सैनामैनाकै बनकट्टास्थित आइसोलेसन सेन्टरमा पठाइएको क्वारेन्टाइनमा कार्यरत स्वास्थ्यकर्मी हरि ढकालले जानकारी दिए ।

सैनामैनामा बिहीबार एकैपटक १८ जनामा कोरोना संक्रमण देखिएपछि सैनामैनाको वनकट्टास्थित पदमपाणि योग तथा प्राकृतिक चिकित्सालयलाई आइसोलेसन सेन्टरको रुपमा व्यवस्थापन गरिएको छ ।

सो सेन्टरमा कोरोना पोजिटिभ देखिएका १८ जना, पीसीआर नतिजा पर्खाइमा रहेका २० जना रहेको स्वास्थ्यकर्मी अर्जुन पौडेलले जानकारी दिए ।

एक जना डाक्टर समेतको स्वास्थ्यकर्मी टोली कार्यरत रहेको सो आइसोलेसन सेन्टरमा हाल कपिलवस्तुका एक कर्मचारीबाहेक सबै भारतबाट आएका रहेको सैनामैना न.पा. का स्वास्थ्य संयोजक हेमराज पन्थीले जानकारी दिए ।

शनिबार उच्च अदालत बार एसाेसिएसन बुटवलको टोलीले रुपन्देहीका विभिन्न आइसोलेसन सेन्टर र क्वारेन्टाइनहरूमा गरेको अनुगमनका क्रममा पनि अधिकांश क्वारेन्टाइनले आरडीटी परीक्षणकै भरमा क्वारेन्टाइनमा बसेकाहरूलाई घर पठाइएको बताएको थियो ।

अनुगमन टोलीले शनिबार रुपन्देहीको सैनामैना न.पा., गैडहवा गा.पा., कञ्चन गा.पा., शुद्धोदन गा.पा.लगायतमा रहेका क्वारेन्टाइनहरूको अनुगमन गरेको हो ।

क्वारेन्टाइनमा रहेकाहरूको मानवअधिकारको अवस्था र उपभोक्ता अधिकारलगायतको विषयमा जानकारी लिन अनुगमन गरिएको उच्च अदालत बार एसाेसिएसन बुटवलका अध्यक्ष जोगबहादुर खत्रीले बताए ।

बार एकाई अध्यक्ष खत्रीसहितको अनुगमन टोलीमा बार एकाईका मानवअधिकार तथा जनसरोकार समितिका संयोजक वरिष्ठ अधिवक्ता तेजप्रसाद कणेल, सचिव देव महत, अधिवक्ता पशुपति भण्डारी, बार एकाईका सचिव गोविन्द मरासिनी, सदस्य ओमप्रसाद पंगेनी लगायत सहभागी रहेका थिए ।

प्रकाशित मिति: आइतबार, जेठ २५, २०७७ १८:३०