संक्रमित बढेपछि थाहा नगरको सबै वडामा क्वारेन्टाइन

A+ A A-

देशमा कोरोना संक्रमण बढ्दै गएपछि मकवानपुरको उत्तरी क्षेत्रस्थित थाहा नगरपालिकाले सबै वडामा क्वारेन्टाइन निर्माण गर्ने भएको छ ।

थाहा नगरका बस्ने ३ जनामा यसअघि कोरोना संक्रमण पुष्टि भएको थियो । संक्रमित फेला परेपछि उच्च सतर्कता अपनाएको नगरपालिकाले प्रत्येक वडामा क्वारेन्टाइन स्थापना गर्ने तयारी अघि बढाएको हो ।

नगरपालिकाले कोरोना रोकथाम तथा नियन्त्रणका लागि १२ वटै वडामा क्वारेन्टाइन निर्माण गर्न सम्भावित क्षेत्रको छनौट गरेको छ ।

कोभिड–१९ संक्रमण बढ्दै गएको अवस्थामा नगरपालिकाले सतर्कता अपनाउँदै सबै वडामा क्वारेन्टाइन निर्माण गर्न लागिएको नगर प्रमुख लवशेर विष्टले जानकारी दिए ।

उनले सरकारले विदेशबाट नेपाली ल्याउने तयारी गरेसँगै विदेशमा रहेका थाहा नगरबासीलाई क्वारेन्टाइनमा राख्न क्वारेन्टाइनको क्षमता बढाउन लागिएको बताए ।

थाहा–६ स्थित बज्रबाराहीको अध्याय रिसोर्टमा निर्माण गरिएको २५ बेडको क्वारेन्टाइन तयारी अवस्थाको छ । क्वारेन्टाइनमा हाल ६ जना बसेका छन् । जसमध्ये ४ जना भारतबाट आएका र २ जना चितवनबाट आएका छन् ।

वडा नं. ३ को सेती गणेश आधारभूत विद्यालयमा १५ बेडको क्वारेन्टाइन सोमबारसम्म निर्माण भइसक्ने नगरपालिकाले जनाएको छ ।

थाहा नगरले वडा नं. १ को झम्केश्वरी, सुनौला मावि, वडा नं. २ को मत्स्य नारायण मावि, वडा नं. ३ को सेती गणेश निमावि, वडा नं. ५ को बसन्त प्रावि, वडा नं. ७ को सुन्दरी देवी र सरस्वती मावि, वडा नं. ८ को इन्द्रायणी माविमा क्वारेन्टान बनाउन सम्भावत क्षेत्रको छनौट गरेको छ ।

त्यस्तै वडा नं. ९ को जनक प्रावि, वडा नं. १० को नाट्ेश्वेर मावि र चम्पाकेश्वर निमावि, वडा नं. ११ को बागेश्वरी मावि र वडा नं. १२ को नेपाल चेम्बर प्राविमा क्वारेन्टाइन बनाउन कार्यालयले छनौट गरेको हो ।

क्वारेन्टाइन निर्माण गर्न नगरपालिकाले स्थान छनौट गर्न भनेपछि सम्बन्धित वडा कार्यालयले यी विद्यालयलाई सम्भावित क्षेत्रको पहिचान गरेको हो ।

छनौट भएका स्थानमा क्वारेन्टाइन प्रयोग गर्न सकिने नगर प्रमुख विष्टले शिलापत्रलाई जानकारी दिए । उनका अनुसार खानेपानी र शौचालयको सहज व्यवस्था, एम्बुलेन्स जान सक्ने क्षेत्रलाई क्वारेन्टाइन निर्माण गर्न छनौट गरिएको हो ।

नगरपालिकाले विदेशमा रहेका नगरबासीको डाटा संकलन पनि गरेको छ । नगर प्रमुख विष्टका अनुसार भारतलगायत विभिन्न देशमा २ हजार ४ सय ९ जना नगरबासी रहेका छन् । तर, नगरपालिकाले यतिमात्र नभई धेरै नगरबासी दोस्रो मुलुकमा रहेको अनुमान गरेको छ ।

‘विदेशमा रहेका यति धेरै नगरबासी एकैपटक आए भने राख्ने ठाउँ छैन्, त्यसैले थप बेडको क्वारेन्टाइन निर्माण गर्न लागेका छौं,’ विष्टले भने ।

प्रकाशित मिति: आइतबार, जेठ २५, २०७७ १५:१७