अमेरिकी राष्ट्रपति चुनाव : जो बाइडेनको उम्मेदवारी सुनिश्चित

A+ A A-

अमेरिकाको राष्ट्रपतिको आगामी कार्यकालका लागि डेमोक्रेटिक पार्टीको तर्फबाट जो बाइडेनले उम्मेरवारी दिने सुनिश्चित भएको छ । यही वर्षको नोभेम्बरमा हुने निर्वाचनमा उनले वर्तमान राष्ट्रपति डोनाल्ड ट्रम्पलाई टक्कर दिनु पर्नेछ ।

कोरोनाको महामारी, आर्थिक चुनौती र नागरिक अशान्ति लगायतका विषयलाई उनले मुख्य एजेण्डाको रुपमा अगाडी सार्ने जनाइएको छ । पूर्व उपराष्ट्रपति समेत रहेका बाइडेनले आफ्नो पार्टीबाट उम्मेदवारी दिने निर्णय शुक्रबार राती भएको हो । निर्णय भएपछि उनले भनेका छन्, ‘हाम्रो पार्टीमा धेरै विद्धान तथा क्षमतावान उम्मेदवारहरू अरु धेरै हुँदाहुँदै पनि मलाई अवसर दिनुभएकोमा म सबैप्रति धन्यवाद ज्ञापन गर्न चाहन्छु ।’

उनले पार्टीको एकतासहित आफूहरू आउदो आम निर्वाचनमा जान लागेकोमा आफूलाई गौरब महसुस भएको पनि बताएका छन् । आफ्नो पार्टीबाट सहजै उम्मेदवार बन्न पाउने अवस्था आउनु उनका लागि सफल पक्ष भएको राजनीतिज्ञहरूले बताएका छन् । उनको पार्टीबाटै राष्ट्रपतिका लागि उम्मेदवार बन्न चाहेका कतिपय उम्मेदवारहरूले आफ्नो उम्मेदवारी अभियानलाई स्थगित गरेको घोषणा यसअघि नै गरिसकेका छन् ।

डेमोक्रयाटिक पार्टीबाटै उम्मेदवार बन्न खोजेका बेर्नी सन्डेर्सले गत अप्रिलमै चुनावी अभियानबाट आफू पछाडि हटेको घोषणा गरेका थिए । बाइडेनसँग अहिले १ हजार ९ सय ९५ जना डेलिगेडट्स रहेका छन् भने उनले चुनावी प्रचारप्रसारलाई अब झन् सशक्त बनाउने बताएका छन् ।

तत्कालिन राष्ट्रपति बाराक ओबामाको कार्यकालमा उपराष्ट्रपति भएकाले उनलाई अमेरिकामा अहिले पनि निकै लोकप्रिय मानिनले ओबामाको ठूलो सहयोग हुने देखिएको छ । पछिल्लो समय बाइडेनलाई उम्मेदवार बनाउन पनि ओबामाले महत्वपूर्ण भूमिका खेलेको बताइएको छ । उनले आगामी चुनावी अभियानलाई थप प्रभावकारी बनाउने र नेतृत्वदायी भूमिका खेल्ने अपेक्षा गरिएको छ ।

वर्तमान राष्ट्रपति ट्रम्पले ओबामालाई लगातार अभिव्यक्तिमार्फत् आक्रमण गरिरहने गरेकाले पनि ट्रम्पलाई हराउन ओबामा सक्रिय हुने अनुमान गरिएको छ । ओबामाको समर्थनका कारण बाइडेनलाई अस्वेत मतदाताहरुको थप सहयोग हुने विश्लेषण गरिएको छ ।

ओबामाको उपराष्ट्रपति हुनुभन्दा अगाडी बाइडेन झण्डै ३६ बर्ष सिनेटको सदस्यका रुपमा रहेका थिए । ७७ वर्षीय उनलाई अमेरिकामा अनुभवी, परिवक्व र सन्तुलित नेताकारूपमा लिने गरिन्छ ।

प्रकाशित मिति: शनिबार, जेठ २४, २०७७ १९:१०