पाेखरामा कोरोना संक्रमितकाे सम्पर्कमा आएकाहरूकाे ट्रेसिङ, ३५ जनालाई हाेम क्वारेन्टाइनमा बस्न सुझाव

पाेखरामा कोरोना संक्रमितकाे सम्पर्कमा आएकाहरूकाे ट्रेसिङ, ३५ जनालाई हाेम क्वारेन्टाइनमा बस्न सुझाव

फाइल तस्वीर

A+ A A-

घरमा अचेत अवस्थामा फेला परेपछि उपचारका लागि हेलिकोप्टरमार्फत काठमाडौं लगिएका पोखराका ६० वर्षीय पुरुषमा कोरोना संक्रमण देखिएपछि उनीसँग सम्पर्कमा आएकाहरूको ट्रेसिङ सुरू गरिएकाे छ ।

उनीमा काेरोना संक्रमण पुष्टि भएपछि पोखरा महानगरपालिकाले सम्पर्कमा आएकाहरूको ट्रेसिङ थालेको हाे । अहिलेसम्म उनको सम्पर्कमा पुगेको ३५ जना सम्पर्कमा आएको पोखरा महानगरपालिकाले जनाएको छ।

संक्रमितको सम्पर्कमा आउनेमा अधिकांश कानुन व्यवसायी रहेको पोखरा महानगरका स्वास्थ्य महाशाखाका अधिकृत हरिलाल आचार्यले जानकारी दिए । उनले संक्रमितको सम्पर्कमा आउनेको ट्रेसिङ गरिरहेका बताउँदै अहिलेसम्म ३५ जना सम्पर्कमा आएको बताए। ‘सम्पर्कमा आएका अधिकांश कानुन व्यवसायी रहेका छन्’, उनले भने, ‘कोही विद्यालयका फाउन्डर, कोही प्रिन्सिपल र औषधि व्यवसायीसमेत छन् ।’

अहिलेसम्म सम्पर्कमा आएका सबैलाई घरमै सुरक्षित बस्न भनिएको आचार्यले बताए । सम्पर्कमा आएका व्यक्तिको घरघरमै गएर प्रहरीको टोलीले साेधीखाेजी गरेकाे छ ।

प्रत्यक्ष सम्पर्कमा आएका व्यक्ति धेरै ठाउँमा पुगेका कारण पोखराकै लागि खतरा हुन सक्ने बताइएको छ।

संक्रमितसँग सम्पर्कमा आएकाको परीक्षण गर्ने वा नगर्नेबारे स्वास्थ्य निर्देशनालयसँग छलफल गर्ने तयारी भइरहेको आचार्यले बताए ।

मंगलबार आलुमाइला चोक नजिकै डेरामा अचेत अवस्थामा भेटिएका बिरामीलाई सोही दिन दिउँसो काठमाडौं लगिएको थियो । अहिले भने उनको होस खुलेको र स्वास्थ्य अवस्था सामान्य रहेको बताइएको छ ।

उनलाई कोरोना भएको पुष्टि शुक्रबार दिउँसो स्वास्थ्य मन्त्रालयले गरेको थियो ।उनलाई अचेत अवस्थामा डेरामा भेटेपछि आफन्तको सहयोगमा गण्डकी मेडिकल कलेज लगिएको थियो।