लमजुङमा पनि फल्यो स्याउ

A+ A A-

लमजुङमा पनि स्याउ फल्न थालेको छ । यसअघि हिमाली जिल्लामा स्याउ फल्दै आएकामा पछिल्लो समय पहाडमा पनि स्याउ फल्न थालेको हो ।

क्व्होलासोंथर गाउँपालिका-१, बाग्लुङपानीमा रोपिएको स्याउ फलेको वडाध्यक्ष पेमा गुरुङले बताए । उनका अनुसार बाग्लुङपानीको जनज्योति माध्यमिक विद्यालय परिसरमा रोपिएको बोटमा स्याउ फलेको छ । स्याउ राम्रो फल्न थालेको यहाँका स्थानीयले बताएका छन् । विद्यालयका प्रधानाध्यापक बिलप्रसाद गुरुङका अनुसार धुलिखेलबाट ल्याएर लगाइएको स्याउको बेर्ना हुर्किएर फल्न थालेको छ ।

यो क्षेत्रमा तरकारी खेतीसम्बन्धी अध्ययन भए पनि तरकारीभन्दा स्याउको सम्भावना रहेको भनेपछि विद्यालयले स्याउको बिरुवा रोपेको प्रअ गुरुङले बताए । उनका अनुसार विद्यालयले खर्च बेहोर्नेगरी बिरुवा ल्याएर रोपिएका थिए ।

एभ्रिथिङ अर्गानिक नर्सरी धुलिखेलका प्राविधिकले स्याउ लगाउन उपयुक्त ठाउँ, लगाउने तरिकाको बारेमा जानकारी गराएअनुसार विद्यालयका शिक्षक, स्थानीयले स्याउ लगाउने तरिका, कटिङ गर्ने तरिकाको बारेमा तालिम लिएका थिए ।

सुरूमा प्रयोगात्मक रूपमा ६७ वटा स्याउको बिरुवा रोपिएको थियो । उक्त बिरुवा हुर्किंदै गएर स्याउ फल्न थालेको छ । समुद्री सतहदेखि १ हजार ५ सयदेखि ७ सय मिटरसम्म फल्ने जातको स्याउ लगाइएको उनले बताए ।

बाग्लुङपानीमा फलेको स्याउ डोर्सेट गोल्ड (म्यचकभत न्यमि) र चिनाइको स्ट्रोबेरी जातको हो । पहिलोपटक फलेको स्याउ राम्रो फलेको र राम्रै हुँदै गएमा विस्तार गर्ने योजना रहेको बताए । विद्यालयको नाममा ७४ रोपनी जग्गा भएकाले आगामी दिनमा विद्यालय वरपर स्याउ विस्तार गरिने उनले बताए ।

लमजुङकै सुन्दरबजार नगरपालिका-१, कुन्छाको हिर्कुस एग्रो फार्म प्रालिका सञ्चालक गोवद्र्धन गौलीले स्याउ फलाएका छन् । कागती, सुन्तला, अदुवा, कफी खेती गर्दै आए पनि परीक्षणका रूपमा स्याउको बिरुवा रोपेकामा फल लागेको उनले बताए ।

३ वटा स्याउका बिरुवा रोपिएकामा उक्त बोटमा स्याउ फलेको उनले बताए । चितवनबाट स्याउको बिरुवा ल्याएर रोपेको र यसको जात भने पत्ता लगाउन बाँकी रहेको सञ्चालक गौलीले बताए ।

प्रकाशित मिति: शनिबार, जेठ २४, २०७७ ०६:३०