हावाहुरीको बितण्डाः तीन दिनदेखि अस्पतालनै घर तर छैन भेट

A+ A A-

१७ चैतको बिनाशकारी हावाहुरीले जोतपुर गमरियाका रामबहादुर साहको पूरै परिवारलाई अस्पताल पुर्याएको छ । ५३ वर्षीय साहको परिवारका ६ जना नै घाइते भएका छन् । नेसनल मेडिकल कलेज वीरगन्जमा उपचाररत साहको पूरै परिवार घाइते भएपछि कुरुवासमेत छैन ।

‘के दशा लाग्यो यस्तो ! हामीले के बिगारेका थियौँ प्रभु ?’ १७ चैतयता उनी यसरी नै बरबराउँछन् । ‘सुरुमा अलिअलि हल्लायो । मैले छोरीलाई समातेँ । केहीबेरमै घरको छाना उडाइहाल्यो,’ हुरीबतास सम्झँदै उनी भन्छन् ।

यसपछि उनी बेहोस भए । होस खुल्दा उनले आफूलाई अस्पतालमा पाए । नेसनल मेडिकल कलेजमा अहिले साहकी श्रीमती नैनादेवी, छोरीहरू मीरा कुमारी र रोदाकुमारी तथा छोराहरू दिलिपकुमार र दीपककुमारको उपचार भइरहेको छ ।

उनले परिवारको अवस्थाबारे १८ चैतमा छिमेकी दाइबाट चाल पाएका थिए । हाड जोर्नी उपचार कक्षमा साह, श्रीमती नैनादेवी र छोरी मीराको उपचार भइरहेको छ । बाँकी दुई छोरा र एक छोरीको टाउकामा चोटका कारण न्युरो वार्डमा उपचार भइरहेको छ ।

साह दम्पतीले एउटै अस्पतालमा भएर पनि न्युरो वार्डमा राखिएका छोरी रोदा तथा दुई छोरा दिलिप र दीपकलाई देख्न–भेट्न पाएका छैनन् ।

‘टाउको र ढाडमा चोट लागेको छ भन्छन् डाक्टर । कस्तो छ, देख्न पाएका छैनौ,’ नैनादेवीले आँखाभरि आँसु पारेर भनिन् । छोराछोरीको अवस्थाले साह दम्पती विक्षिप्त हुने डरले अस्पतालले उनीहरूलाई छोराछोरीसँग भेटघाट नगराएको हो ।

‘यत्रो कालबाट त बाँच्यौँ । घरका सबै घाइते छौँ । अब के गरी खाउँला ?’ नैनीदेवीले चिन्ता व्यक्त गरिन् । उनीहरूका दुई बाख्रा, एक भैँसी, एक हल गोरु र अन्नपात घरभित्रै पुरिएको छ ।

पकाएको खाना खानै पाइनन् फातिमाले

फातिमा मिया खाना पकाउँदै थिइन् । उनले आठ जनाको परिवारका लागि भ्यान्टा पकाइसकेकी थिइन् ।

‘तरकारी पकाइसकेकी थिएँ । भातका लागि चामल पखाल्न थालेकी थिएँ । एकैछिनमा त धुलोधुवाँ उडेर संसारै अँध्यारो भयो ।हुरी थामिएपछि हेर्दा त खाना पनि छैन । सबै उडाएर लगेछ,’ १८ गतेको कहालीलाग्दो साँझ सम्झिँदै फातिमाले भनिन् ।

हावाहुरीका कारण फातिमाका नन्द, श्रीमान् र छोरा गरी तीनजना घाइते भए । घाइतेहरूको पर्सामा उपचार भइरहेको छ । फातिमाले खण्डहर घर हेर्दै भनिन्, ‘हामी त केही थिएन, छोरालाई के खुवाउने ? खानलाई केही छैन । छोरो बिस्कुट, चाउचाउ खान मान्दैन ।’

हातमा राहतस्वरूप पाएको चाउचाउ । हतारिएर दौडिँदै थिइन्, सूर्य ज्योतिदेवी पटेल । ६० वर्षीया पटेल तीन वर्षीय छोराको पालनपोषण गर्ने चिन्तामा छिन् । ‘बच्चा भोक लाग्यो भनेर रोएको रोयै छ । के खुवाउने ?’ उनी मलिन अनुहार पारेर भन्छिन् ।

पटेलको आठ जनाको परिवारमा चार जना बालबालिका छन् । उनीहरूले बिहानको खानाबाहेक अरू थोक खान पाएका छैनन् । ‘हिजो बिहान खाना खाएका थियौँ । त्यसपछि त केही खाएकै छैन । बच्चाहरू भोकले नै मर्ने भयो,’ पटेल गहभरि आँसु पारेर रोइन् ।

वीरगन्जका केही व्यापारी र छिमेकीले भरबलिया सडकमै खाना पकाउन सुरु गरेका छन् । उनीहरूले वीरगन्ज बजारबाट ग्याँस र खाद्यान्न मगाएर सडकबाटै खाना वितरण गर्न थालेका छन् । यसबाट हावाहुरीपीडितले राहतको महसुस गरेका छन् ।

प्रकाशित मिति: बुधबार, चैत २०, २०७५ २३:०६