जर्ज फ्लोइड प्रकरणः ‘घाँटीबाट तिम्रो खुट्टा झिक’ भन्ने दिन आयो

A+ A A-

२५ मेमा हत्या गरिएका अफ्रिकी मूलका अमेरिकी नागरिक जर्ज फ्लोइडको स्मृति सभामा उनको परिवारका वकिल बेन्जामिन क्रम्पले अब घाँटीबाट तिम्रो घुँडा झिक हामी श्वास फेर्न चाहन्छौं भन्ने दिन आएको टिप्पणी गरेका छन् ।

उनले जातीयताको महामारीका कारण फ्लोइडले ज्यान गुमाउनु परेको यस्तो कार्य ‘कुकर्म’ भएको टिप्पणी गरेका छन् ।

मिनियापोलिसमा गरिएको स्मृति कार्यक्रममा सयौं मानिस सहभागी भएका थिए । सो कार्यक्रममा प्रसिद्ध मानवअधिकारकर्मी याल शार्प्टनले पनि सम्बोधन गरेका थिए।

यसैबीच, फ्लोइडको हत्यामा सहयोग गरेको र मतियार बनेको आरोपमा अभियोग लागेका तीन प्रहरी अधिकारीहरू पहिलोपटक अदालतमा उपस्थित भएका छन् ।

फ्लोइडले सास फेर्न गाह्रो भयो भनिरहँदा पनि घाँटी थिचिरहेने प्रहरी अधिकारी डेरेक शोभिनविरुद्ध चाहिँ आशययुक्त हत्याको आरोप लागेको छ। उनी सोमवार अदालतमा उपस्थित हुनेछन् ।

प्रहरीले घाँटीमा थिचेको देखिने भिडिओ सार्वजनिक भएपछि फ्लोइडको मृत्युलाई लिएर अमेरिकाभर विभिन्न सहरहरूमा आक्रोश निम्त्याएको छ।
एक साताभन्दा लामो समयदेखि जारी प्रदर्शनले केही सहरमा हिंसात्मक रुप लिएको छ । जसका कारण कर्फ्यू लगाइएको छ।

स्मृति कार्यक्रममा बोल्दै फ्लोइड परिवारका वकिल बेन्जामिन क्रम्पले जोर्ज फ्लोइडको मृत्यु कोरोना भाइरसको महामारीले नभइ जातिवाद र भेदभावको महामारीले भएको बताए ।

मिनियापोलिस डाउनटाउनस्थित नर्थ सेन्ट्रल युनिभर्सिटीमा भएको कार्यक्रममा फ्लोइडको परिवारका सदस्यहरू, मिनेसोटाका गभर्नर, सिनेटर र मिनियापलिसका मेयरसहित सयौँ मानिसहरू भेला भएका थिए।

फ्लोइडका भाइ फिलोनाइसले आफूहरू सानो हुँदा गरिब रहेको कपडा धोएर जीवन गुजारा गरेको स्मण गर्दै अहिले आफ्ना दाइका लागि यति धेरै मान्छे जम्मा हुनुमा उनले धेरैको हृदय छोएको देखाएको बताए ।

मानवअधिकारकर्मी शार्प्टनले जवाफदेहिताको माग गरेका छन्। अमेरिकाका थुप्रै राज्यहरूमा प्रदर्शनहरू भइरहेको कुरा उल्लेख गर्दै उनले भने, ‘अब हामी रोकिँदैनौँ। न्याय प्रणाली पूर्ण रुपमा परिवर्तन नगर्दासम्म हामी रोकिने छैनौँ।’

‘फ्लोइडलाई जे भयो त्यो यो देशको शिक्षा, स्वास्थ्य र अन्य क्षेत्रमा प्रत्येक दिन हुन्छ। जर्जको नाममा हामी एक भएर तिमीहरूको घुँडा हाम्रो घाँटीबाट निकाल भन्नुपर्ने बेला आएको छ,’ उनले भने ।

प्रकाशित मिति: शुक्रबार, जेठ २३, २०७७ ०६:५९