आफन्त भेट्न अस्पताल पुग्ने पैसा छैन हुरी पीडितसँग

A+ A A-

बाराको हुरी प्रभावित पुरैनियाका बासिन्दासँग अस्पतालसम्म पुग्ने पैसाको पनि छैन । घरबार सबै हुरीले उडाएपछि घाईते आफन्त भेट्न अस्पतालसम्म जाने पैसा समेत छैन अफरोज मिया अन्सारीसँग ।

भत्किएको घरभित्र छोराछोरीलाई शिविरबाट ल्याएको खाना खुवाईरहेका मियाकी श्रीमती १७ गतेको हुरीमा घाईते भईन् । तर, मियाँलाई अझैसम्म थाहा छैन श्रीमतीको उपचार कहाँ, कुन अस्पतालमा भईरहेको छ । १७ गते साँझको हुरीले मियाको घरको पर्खाल भत्किदा उनकी श्रीमती घाईते भईन । ‘टाउको र छातीमा चोट लागेको थियो’ १७ गतेको साँझ सम्झिदै मिया भन्छन, ‘ट्याक्ट्ररमा राखेर लगेका थिए ।’

श्रीमतीलाई घरबाट लगेपछि, कहाँ राख्यो ? के भयो ? केही थाह छैन मियालाई । श्रीमतीलाई अस्पताल लगेपछि उनी छोराछोरी सम्हाल्नतर्फ लागे । रातभरी छोराछोरी रुँगेर बसे । ‘बिहान गाउँलेलाई सोधेको कोही चितवनमा छ भन्छन, कोही विरगञ्ज छ भन्छन, कोही चैनपुरमा छ भन्छन ।’ मियाले सुनाए, ‘अब कहाँ खोज्न जाने ?’

श्रीमती कहाँ छे भनेर खोज्न जानपनि सकिरहेका छैनन् मिया । ‘एक पैसा छैन, कसरी जानु ?’ पहिलो कुरा श्रमती कहाँ छिन् नै थाहा छैन, दोस्रो मियासँग गाडी चढ्ने पैसा पनि छैन् ।

‘२÷४ हजार थियो होला घरमा त्यो पनि कता उडायो, उडायो ।’ सम्पतीको नामा मियासँग अहिले जिउमा लगाएको लुगा मात्रै छ । हुरी आउने समयमा मियाँकी श्रीमती खाना पकाईरहेकी थिईन्, हुरी आएको साँझ सम्झिदै मियाँ भन्छन, ‘खाना पकाउँदै थिई, त्यही पर्खाल भत्केर थिच्यो । न उसले बनाएको खान पाईयो, न उ कहाँ छ भनेर थाह पाईयो ।’

हुरीको दुई दिन बितिसक्दा पनि श्रीमतीको अत्तोपत्तो नलागेपछि मियाको मनमा चिसो पसेको छ । कतै मृत्यु त भएन । ‘अल्लाह, यस्तो नहोस । छोराछोरी के गरी बाँच्छन ?’ मियाँले अल्लाह पुकार्दै भने । अस्पतालबाट आउने छिमेकी, पत्रकार, उद्धारकर्मी, राहतकर्मी, प्रहरी सबैसँग मियाले सोधिसके तर पक्का खबर अझै कसैले ल्याएको छैन् ।

बाराका हुरी प्रभावित भरवलीयामा कुर्मी र पटेल समुदायको बाहुल्यता भएको गाँउ हो भने, परैनिया मुस्लिम समुदायको बाहुल्यता भएको गाउँ हो । प्रहरीका अनुसार पुरैनियामा घटनास्थलमै १० जनाको मृत्यु भएको छ ।

प्रकाशित मिति: बुधबार, चैत २०, २०७५ १८:०१