डेढ महिना ग्रीन जोनमा रहेको सुदूरपश्चिममा फेरि कोरोना संक्रमित बढ्दै

A+ A A-

५ जना सङ्क्रमित निको भएर घर फर्किएपछि झन्डै डेढ महिनासम्म ‘ग्रीन जोन’ मा रहेको सुदूरपश्चिममा कोभिड-१९ को सङ्क्रमण पुनः उकालो लागेको छ ।

कामकोे सिलसिलामा भारत गएकाहरू धमाधम घर फर्केपछि सङ्क्रमण पुनः बल्झिएको हो । भारतबाट फर्किएकाहरू विभिन्न जिल्लाका गाउँगाउँसम्म पुगेका छन् । भारतबाट फर्किएका अधिकांशमा कोरोना सङ्क्रमण पुष्टि भइरहेको छ ।

यसअघि, सुरूवाती चरणमै कैलालीका ४ र कञ्चनपुरको १ व्यक्तिमा गरी ५ जनामा कोरोना सङ्क्रमण पुष्टि भएको थियो । उनीहरू सबै निको भएर घर गएको करिब डेढ महिनापछि पुनः सङ्क्रमण देखापरेको छ । सामाजिक विकास मन्त्रालयको सोमबारको तथ्याङ्कअनुसार सुदूरपश्चिममा हालसम्म सङ्क्रमितको सङ्ख्या ४३ रहेको छ ।

९ जिल्ला रहेको यो प्रदेशमा बझाङबाहेक बाँकी सबै जिल्लामा कोरोना सङ्क्रमण पुष्टि भएको मन्त्रालयले जानकारी दिएको छ । मन्त्रालयका अनुसार सङ्क्रमितको सङ्ख्या कैलालीमा सबैभन्दा बढी २७, बैतडीमा ६, अछाममा ३, बाजुरा, कञ्चनपुरमा २/२, डडेल्धुरा, दार्चुला र डोटीमा १/१जना रहेको छ ।

मंगलबारको परीक्षणमा अछाममा १० जना थपिएर सो जिल्लामा सङ्क्रमित सङ्ख्या १३ र प्रदेशको कुल सङ्क्रमित सङ्ख्या ५३ पुगेको छ । यद्यपि, अछाममा १० जना थपिएको विषयमा मन्त्रालयले भने त्यसको पुष्ट्याइँ गरिसकेको छैन ।

अछाममा १० जना सङ्क्रमित थपिएको भन्ने विषयमा बुझ्न बाँकी रहेको सामाजिक विकास मन्त्रालयका स्वास्थ्य महाशाखा प्रमुख नरेन्द्रसिंह कार्कीले बताए ।

हालसम्म कैलालीका ४, कञ्चनपुरको १ र डडेल्धुराको १ गरी यो प्रदेशमा छजना निको भएका छन् भने बाजुराकी एक दुई वर्षीया बालिकाको ज्यान गएको छ । बाँकी सबैको उपचार भइरहेको छ ।

सुदूरपश्चिममा हालसम्म पीसीआर विधिबाट ५ हजार ७ सय ६७ र आरडीटी विधिबाट २२ हजार ५ सय ४५ गरी जम्मा २८ हजार ३ सय १२ जनाको स्वास्थ्य परीक्षण गरिएको छ ।

यो प्रदेशमा ४३ हजार ३ सय ५७ पुरुष र छ हजार ५ सय ९६ महिला गरी ४९ हजार ९ सय ५३ जना हाल क्वारेन्टाइनमा रहेका मन्त्रालयले जानकारी दिएको छ । यसैगरी, ३० जना आइसोलेसनमा बसेको जनाइएको छ ।

प्रकाशित मिति: बुधबार, जेठ २१, २०७७ ०६:२३