अन्त्येष्टि गरेर फर्किएपछि अस्पतालले भन्यो : ‘स्वास्थ्यमा सुधार आयो, लिन जाँदा भनियो मृत्यु भइसक्यो’

अन्त्येष्टि गरेर फर्किएपछि अस्पतालले भन्यो : ‘स्वास्थ्यमा सुधार आयो, लिन जाँदा भनियो मृत्यु भइसक्यो’

A+ A A-

गुजरातको अहमदावादस्थित सिभिल अस्पतालमा आइतबार एउटा अनौठो घटना बाहिर आयो । त्यहाँ एउटा परिवारलाई कोरोना संक्रमणका कारण बिरामी भएका परिवारका सदस्यको मृत्यु भएको सूचना आयो ।

त्यसको भोलिपल्ट अस्पतालबाट फोन आयो र बिरामीको कोरोना परीक्षणको रिपार्ट नेगेटिभ आएको जानकारी दियो । अस्पतालले उनको स्वास्थ्यमा सुधार भइरहेकोले घर लैजान सक्ने समेत बतायो ।

यो फोनपछि फेरि परिवारका सदस्यहरु बिरामीलाई लिनका लागि अस्पताल पुगे । तब उनीहरुलाई फेरि बिरामीको मृत्यु भइसकेको जानकारी दिइयो ।

निकोल इलाकाका ७१ वर्षीय देवरामलाई श्वासप्रश्वासमा समस्या देखिएपछि २८ मेमा अहमदावाद सिभिल अस्पतालमा भर्ना गरिएको थियो । देवराम मधुमेहका रोगी थिए ।

अस्पताल प्रशासनले देवरामका ज्वाई नीलेश निकतेलाई उपचारका क्रममा विरामीको मृत्यु भएमा अस्पताललाई जिम्मेवार ठहर गरिने छैन भन्ने सहमति पत्रमा हस्ताक्षर गराइएको थियो ।

नीलेशले भने, ‘मेरा ससुरालाई हाल कोरोनाको उपचार भइरहेको सिभिल अस्पतालमा भर्ना गरिएको थियो । त्यसबेला उहाँको सुगर लेभल ५७५ थियो र यो निकै धेरै हो । अस्पताल प्रशासनले मलाई सहमतिमा हस्ताक्षर गर्न भन्दा मैले सुसुरालाई एक पटक हेर्ने जिद्दी गरेपछि उनीहरुले भिडियो कल गरे । त्यसबेला यहाँको अवस्था सामान्य देखेपछि मैले हस्ताक्षर गरेँ ।’

अन्तिम संस्कारपछि स्वास्थ्यमा सुधार भएको फोन

नीलेशले सहमतिपत्रमा हस्ताक्षर गरेपछि उपचार सुरु भयो उनलाई ससुरा ठीक हुने विश्वास थियो ।

उनले भने, ‘अस्पतालको औपचारिकता पूरा गरेर हामी घर आयौं । अर्को दिन अस्पतालबाट कोरोना भाइरसका कारण ससुराको मृत्यु भएको फोन आयो । यसपछि अस्पताल जाँदा नीलो रंगको पीपीई किटले ढाकेका शब जिम्मा लगाइयो ।

त्यसबेलासम्म हामीलाई कोरोना पोजिटिभ रहेको रिपोर्ट दिइएको थिएन । अस्पतालका कर्मचारीले हामीलाई ससुराको कपडा देखाएपछि उहाँको मृत्यु भएको विश्वास भयो । त्यसबेला हामीले अनुहार हेर्न पाएनौं । त्यसपछि हामी अन्तिम संस्कारको तयारीमा व्यस्त भयौं ।’

उनीहरुले आफ्नो संस्कारअनुसार अन्त्येष्टि गरे । तर घटना यही सकिएन । अर्को दिन निलेशको परिवारलाई अस्पतालबाट फोन आयो । उनी भन्छन्, ‘अर्को दिन मलाई मेरो ससुराको कोरोना रिपोर्ट नेगेटिभ आएको र उनलाई जनरल वार्डमा लैजान लागिएको बताइयो । अस्पतालले हामीलाई उहाँलाई घर लैजान सल्लाह दियो ।’

अस्पतालको यो फोनले नीलेशको परिवारमा सन्नाटा छायो र सबैले देवराम भनेर कस्को अन्तिम संस्कार गरियो भन्नेबारेमा सोच्न थाले । अत्तालिएका नीलेश र उनको परिवारका सदस्य फेरि एक पटक अस्पताल गए । उनीहरुलाई फेरि देवरामको मृत्यु भएको भन्दै त्यसलाई पुष्टि गर्ने कागज समेत देखाए । कुनै गलत सूचना प्रसार भएको हुनसक्ने भन्दै उनीहरु फेरि घर फर्किए ।

यसैबीच नीलेशलाई अस्पतालबाट अर्को फोन आयो ।

उनी भन्छन्, ‘यो अस्पतालले हामीलाई गरेको तेस्रो फोन थियो । यसपटक उनीहरुले ससुराको स्वास्थ्यमा सुधार भइरहेको र चिन्ता लिने आवश्यकता नभएको बताए । हामीले पछिल्ला दुई वटा फोनमा दिइएको जानकारीबारे स्पष्ट पार्न भनेपछि अस्पतालका कर्मचारीले उनको स्वास्थ्यबारे पछिल्लो अपटेड दुई घन्टा पहिले आएको बताए । एक पटक उनीहरुले ससुराको मृत्यु भएको बताए भने अर्को कलमा उनले स्वास्थ्यमा सुधार भएको बताएका थिए ।’

अस्पतालका डीनले यो गडबडीबारे पुष्टि गरे । डाक्टठर शशांक पान्ड्याले यो सबै गलत ‘फेमी’ का कारण भएको बताए ।

कसरी भयो गडबडी ?

देवरामलाई २८ मेमा सिभिल अस्पतालमा लगिएको थियो । उनको लक्षण देखिपछि गुजरात क्यान्सर इन्स्टिच्युटको कोभिड–१९ वार्डमा भर्ना गरिएको थियो । त्यहाँ परीक्षणका लागि नमुना समेत लिइयो ।

२९ मेमा देवरामको मृत्यु भयो र उनको शब परिवारलाई बुझाइयो । कोभिड–१९ का संदिग्ध विरामीको मृत्यु हुँदा सुरक्षाका कारण पीपीई किटमा बेरेर दिइन्छ । यसकारण परिवारलाई देवरामको शब पनि त्यसरी नै सुम्पिइयो ।

डाक्टर पान्ड्याले भने मृत्यु हुने बेलासम्म देवराजको कोभिड–१९ को रिपोर्ट आएको थिएन । मृत्यु पछि आएको रिपोर्टमा उनको नतिजा नेगेटिभ आएको थियो । अस्पतालका कर्मचारीले रिपोर्ट नेगेटिभ आएपछि परिवारलाई फोन गरेर जनरला वार्डमा सार्ने बताए, त्यसबेला ती कर्मचारीलाई देवराजको मृत्यु भएर शब परिवारलाई बुझाएको जानकारी थिएन ।

डाक्टर पान्ड्याले शब परिवर्तन गरेको अस्वीकार गरे र उनले यसलाई दुर्भाग्यपूर्ण गलत फेमी भएको बताए । उनले नीलेश र देवराजको परिवारसँग माफी समेत मागेका छन् ।

नीलेशले अस्पताल प्रशासनले माफी नै मागेका कारण यो घटनालाई थप लम्ब्याउन नचाहेको बताए । उनले आफूहरु यो कारणले दोहोरो मानसिक तनावमा परेको र आगामी दिनमा यस्तो गल्ती नहुने विश्वास व्यक्त गरे । देवरामको परिवारमा उनकी पत्नी, तीन छोरी, दुई ज्वाई र एक नाती रहेका छन् ।

प्रकाशित मिति: मंगलबार, जेठ २०, २०७७ १०:४८