प्रदेश ५ मा कोरोना परीक्षणको दायरा बढाइँदै

A+ A A-

कोरोना संक्रमितको संख्या वृद्धिसँगै प्रदेश ५ मा परीक्षणको दायरा बढाइने भएको छ । अन्य प्रदेशको तुलनामा आवश्यक जनशक्ति, प्रयोगशालाको क्षमता कमजोर हुँदा यहाँ परीक्षण सुस्त छ ।

हालको जनशक्ति कमी हुँदा प्रदेश ५ मा कोभिड-१९ संक्रमितको अवस्था पत्ता लगाउन संकलन गरिएका स्वाब फ्रिजमा पालो पर्खेर बस्ने अवस्था छ । प्रदेश ५ मा ३ वटा प्रयोगशालाबाट कोरोना परीक्षण गरिँदै आएकोमा स्वाबको चाप बढेसँगै केन्द्रीय प्रयोगशालामा पनि स्वाब पठाइएको छ ।

अझै प्रदेशमा ४ हजार ३ सय ९८ जनाको स्वाव परीक्षण गर्न बाँकी छ । ३ वटा प्रयोगशालाले यहाँ दैनिक बढी ३ सय मात्र परीक्षण गर्न सक्ने क्षमता छ । पछिल्लो समय भारतबाट अत्याधिक नागरिक भित्रिएपछि स्वाब संकलन पनि बढी भइरहेको सामाजिक विकास मन्त्रालयले बताएको छ ।

मन्त्रालयका वरिष्ठ स्वास्थ्य प्रशासक डा. उमाशंकर चौधरीले प्रदेशमा रहेका ३ वटै ल्याबमा जनशक्ति थप गरेर परीक्षणको दायरा बढाउने बताए । ‘अहिले भएका कोरोना परीक्षण ल्याब छन् । भैरहवा, दाङ र नेपालगञ्ज त्यहाँ अस्थायी करार कर्मचारी थप गरेर भए पनि दायरा बढाउने तयारीमा छौँ’ उनले भने ।
प्रयोगशाला स्थापनाको सुरू अवस्थामै जनशक्ति अभाव ब्यहोरेको प्रयोगशालाले पुनः किटको अभाव हुँदा परीक्षणको दायरा बढाउन सकिरहेका थिएनन् ।

प्रदेशमा आवश्यक किटको माग भइरहेको र अब परीक्षणको दायरा द्रुत बनाउने मन्त्रालयको योजना छ । प्रत्येक प्रयोगशालामा सिफ्ट कर्मचारी थप गरी परीक्षण बढाउने तयारी भइरहेको बताइएको छ । उनले २ सिफ्टमा कर्मचारीले परीक्षण गर्ने गरी प्रत्येक ल्याबमा ५ जना कर्मचारी थप गर्ने तयारी भएको बताए । ‘विदेशबाट नेपाली आउने क्रम बढ्दै छ, परीक्षणको दायरा पनि बढाउनुको विकल्प छैन्, प्रदेश सरकार त्यसको तयारीमा छ’ उनले भने ।

पछिल्लो समय कपिलवस्तु र बाँकेमा संक्रमितको संख्या बढेसँगै यी जिल्लामा स्वाब परीक्षण अन्य जिल्लाको तुलनामा बढी छ । स्वाब परीक्षण मात्र होइन आडीटी परीक्षणसमेत द्रुत गतिमा बढाउने मन्त्रालयले तयारी गरेको छ ।

प्रदेशमा अहिले क्वारेन्टाइनमा ३० हजार भन्दा बढी छन् । उनीहरू सबैका लागि आरडीटी किटको माग भइरहेको बताइएको छ । प्रदेशका कतिपय जिल्लामा आरडीटी परीक्षण समयमा नगर्दा क्वारेन्टाइनबाटै भागेका घटनाहरू समेत भइरहेकाले परीक्षणलाई सरकारले द्रुत गतिमा अगाडि बढाउनुपर्ने सुझाव जनस्वास्थ्य विज्ञहरूले दिइरहेका छन् ।

परीक्षणको दायरा बढाउने मात्र नभएर क्वारेन्टाइनको संख्यामा वृद्धि गर्ने गरी पनि काम भइरहेको मन्त्रालयले जनाएको छ ।

प्रकाशित मिति: मंगलबार, जेठ २०, २०७७ ०८:५३