फ्लोइड मृत्यु प्रकरणः प्रदर्शन रोक्न सेना परिचालनको तयारी

A+ A A-

अमेरिकामा भइरहेको प्रदर्शन रोक्नका लागि सेना परिचालन गर्ने तयारी भएको छ । राष्ट्रपति डोनाल्ड ट्रम्पले प्रदर्शन र प्रदर्शनको क्रममा भएका झडप, लुटपाट, तोडफोड, आक्रमण तथा भौतिक सम्पत्तिमा भइरहेको बिनास रोक्न सबै उपाय अवलम्बन गरिने बताएका छन् ।

ह्वाइट हाउसमा भएको पत्रकार सम्मेलनमा ट्रम्पले प्रदर्शन रोक्न संघीय तहमा उपलब्ध सबै स्रोत परिचालन गर्ने बताए । जसअन्तर्गत सेना समेत परिचालित हुनेछ ।

‘हामीले दंगा तथा कानून बिहीनता अन्त्य गर्दैछौँ, जुन देशभर फैलिएको छ,’ उनले भने, ‘क्रुरताका कारण भएको जर्ज फ्लोइडको मृत्युबाट सबै अमेरिकी स्तब्ध भएका छन् र त्यसका कारण आक्रोश पनि पैदा भएको छ । तर उनको मृत्यु व्यर्थ भएन होला ।’

फ्लोइडको सम्झना आक्रोशित भिडले गर्ने दंगाबाट हुन नसक्ने उनको भनाई थियो । गत २५ मेमा अश्वेत व्यक्ति फ्लोइडको मिनेशोटा राज्यको मिनियापोलिस प्रहरीको नियन्त्रणमा रहेका बेला मृत्यु भएको थियो । उनलाई पक्राउ गर्ने क्रममा श्वेत प्रहरी अधिकारीले घुँडाले घाँटीमा लामो समय थिचेको भिडियो सार्वजनिक भएको थियो ।

उनले प्रदर्शनका नाममा अराजकतावादी भीड, हिंस्रक, लुटपाट, आगजनी गर्नेहरु, अपराधीसमेत सहभागी भएको भन्दै उनले राज्य तथा स्थानीय सरकारहरु प्रदर्शन नियन्त्रण गर्न असफल भएको आरोप लगाए ।

यसअघि उनले प्रदर्शनका विषयमा गभर्नरहरुसँग टेलिफोन वार्ता गरेका थिए । उनले अमेरिकामा भइरहेको प्रदर्शनमा गर्भनरहरुले नेतृत्व दिन नसकेको भन्दै आलोचना गरेका थिए ।

कर्फ्यू समेत उल्लंघन गरी प्रदर्शनकारीले वासिङ्गटन डिसीसहितका देशभर प्रदर्शनलाई निरन्तरता दिएका छन् । उनले भने, ‘अब कर्फ्यू थप कडा बनाइने छ। नियम तोड्नेहरुलाई पक्राउ गरिने छ र कानून अनुसार कारवाही गरिने छ ।’

प्रकाशित मिति: मंगलबार, जेठ २०, २०७७ ०६:२३