निजी विद्यालयलाई सरकारी साथ, सामुदायिकमा संक्रमितको बास !

A+ A A-

निजी विद्यालयहरूले शैक्षिक गतिविधि सुरु गर्ने भएका छन् । कोरोना भाइरस (कोभिड– १९) का कारण लकडाउन भएपछि पठनपाठन प्रभावित भएको थियो । निजी विद्यालयले वैकल्पिक विधिबाट पठनपाठन सुरु गर्ने भएका छन् ।

सामुदायिक विद्यालयमा धमाधम क्वारेन्टाइन निर्माण भइरहेका बेला सरकारले निजी विद्यालयको पुकार सुन्ने नाममा वैकल्पिक विधिवाट विद्यालयमा पठनपाठनको अनुमति दिएको हो ।

आइतबार शिक्षा, विज्ञान तथा प्रविधिमन्त्री गिरिराजमणि पोखरेलले आइतबार विज्ञप्ति जारी गरेर बालबालिकाको नियमित पठनपाठनको सहज अवस्था सिर्जना गर्नका लागि दूर तथा खुला शिक्षालगायत वैकल्पिक प्रणालीबाट सिकाइमा सहजीकरण गर्न निर्देशिका जारी भएका बताएका थिए

निजी विद्यालयले वैकल्पिक विधिबाट पठनपाठन सुरु गर्ने तयारी गरे पनि देशभरका अधिकांश सामुदायिक विद्यालयमा भने कोरोना संक्रमितलाई राखिएको छ ।

निर्देशिकाअनुसार १ असारदेखि कार्यान्वयन गर्न गराउन संघ, प्रदेश र स्थानीय तहका सबै निकायहरू तथा सरोकारवाला सबैलाई आव्हान गरेका थिए ।

यसअघि प्रधानमन्त्री केपी ओलीले पनि भर्चुअल विधिबाट पठनपाठन गर्ने बताएका थिए । त्यस्तै, बजेट भाषणमा पनि सो कुरा उल्लेख भएको थियो ।

त्यहीअनुसार वैकल्पिक विधिबाट निजी विद्यालयले पठनपाठन सुरु गर्ने भएका हुन् । निजी विद्यालयले २१ जेठदेखि नै शैक्षिक कार्यक्रम सुरु गर्ने बताउँदै आएका थिए ।

नेसनल प्याब्सनका केन्द्रीय अध्यक्ष ऋतुराज सापकोटाले वैकल्पिक विधिबाट पठनपाठन सुरु गर्ने विषय सकारात्मक भएको बताए ।

‘तत्काल भौतिक रूपमा नै विद्यार्थीलाई विद्यालय ल्याएर पढाउने भनिएको होइन,’ उनले भने, ‘विद्यालयको प्रशासनिक गतिविधि बढाउने र बालबालिकासँग कुनै न कुनै रूपले जोडिनुपर्छ भन्ने हो ।’

पाठ्यपुस्तक बालबालिकाको हातमा पुर्‍याउनुपर्ने उनले बताए । ‘सरकारसँगकै समन्वयमा विद्यार्थीको हातमा किताब पुर्‍याउनुपर्छ,’ उनले भने, ‘किताब विद्यार्थीको हातमा पुर्‍याउन सकियो भने स्वअध्ययनलाई पनि मद्दत गर्छ ।’

अनलाइन कक्षालाई प्रभावकारी बनाउनुपर्नेमा जोड दिँदै उनले अभिभावकलाई भौतिक उपस्थिति गराएर भर्ना नगरिने पनि स्पष्ट पारे ।

प्याब्सनका अध्यक्ष टीकाराम पुरीले अनलाइनबाट कक्षा सुरु गर्ने बताए । ‘प्रधानमन्त्री, शिक्षामन्त्रीले भर्चुअलबाट कक्षा पठनपाठन गर्ने भन्नुभएको छ । यो स्वागतयोग्य छ,’ उनले भने, ‘ अब भर्चुअल कक्षाको तयारी सुरु गर्छौं ।’

उनले १ असारअगाडि नै शिक्षक र कर्मचारीलाई भर्चुअल कक्षाको ट्रेनिङ दिने र विद्यार्थीको किताब व्यवस्थापन गर्ने बताए ।

‘विद्यालय सञ्चालन गर्ने भनेको होइन,’ उनले भने, ‘अभिभावक विद्यार्थी कहाँ छन्, त्यो खोज्नुपर्‍यो । भौतिक रूपमा विद्यार्थी उपस्थित नभई अनलाइनबाट पठनपाठन गर्ने भनिएको हो ।’

अभिभावक संघका अध्यक्ष केशव पुरीले शिक्षामन्त्रीको फेरिइरहने बोलीले अन्योल भएको बताए ।

‘शिक्षामन्त्रीले कहिले अनलाइन कक्षा बन्द गर्नू, शुल्क नलिनु भन्नुहुन्छ । कहिले साउनको अन्तिमबाट सुरु गर्दा पनि शैक्षिकसत्र भ्याइन्छ भन्नुहुन्छ । कहिले शिक्षा प्रदेश र स्थानीयको हो भन्नुहुन्छ । कुन कुरा पत्याउने ?,’ उनले प्रश्न गरे ।

सहज वातावरण नभएसम्म विद्यालय सञ्चालन गर्न नहुने उनले बताए ।

‘संसदीय समितिले अनलाइन कक्षा नगर्नू भनेको छ । कसले भनेको मान्ने ? मन्त्रीको, समितिको, प्याब्सनको, एनप्याब्सनकाे ? कसले भनेको मान्ने भन्नेमा नै समस्या भएको उनले बताए ।

नेपाल शिक्षक महासंघका अध्यक्ष बाबुराम थापाले सरकारीमा तत्काल अनलाइनबाट पढाउन नसकिने बताए । ‘सबै ठाउँमा अनलाइनबाट पढाउन सकिने अवस्था छैन,’ उनले भने, ‘कसरी पढाउने ? के गर्ने भन्ने विकल्पका विषयमा छलफल हुँदै छ ।’

वैशाखमै शिक्षामन्त्रीलाई विद्यालयमा डाटा सेन्टर राख्न भने पनि त्यो सुनुवाइ नभएको उनले बताए । ‘विद्यालयमा डाटा सेन्टर खोलौँ । डाटा सेन्टरबाट पढाउन सकिन्थ्यो । त्यो पनि भएन,’ उनले भने, ‘अब १ असारबाट सरकारीमा कसरी अनलाइनबाट पढाउन सकिन्छ ?’

निजीले अनलाइनबाट पठनपाठन सुरु गरे भने सरकारी विद्यालयमा पढ्ने विद्यार्थी टुलुटुलु हेरेर बस्नुपर्ने अवस्था आउने भएको छ ।

कक्षा ९ र १० का लागि भने टेलिभिजनबाट कक्षा भइरहेको छ । तर, अन्य कक्षाका लागि छैन । शिक्षा मन्त्रालयले अनलाइन पोर्टल चलाए पनि दुर्गम ठाउँमा इन्टरनेटको सुविधा नहुँदा त्यो पनि प्रभावकारी भएको छैन ।

कक्षा १ देखि ९ सम्मको परीक्षा सकिएपछि लकडाउन भएको थियो । कक्षा १०, ११ र १२ को परीक्षा स्थगित भएको थियो । अब परीक्षा कहिले हुने भन्ने अन्योल छ । विद्यालय तहमा ७५ लाख बालबालिका छन् ।

प्रकाशित मिति: सोमबार, जेठ १९, २०७७ १७:०२