लकडाउन उल्लंघन गर्दै २१ जेठदेखि बजार खोल्ने हेटौँडाका व्यवसायीको निर्णय

A+ A A-

हेटौँडाका व्यवसायीहरूले देशमा जारी लकडाउन स्वीकार्दै बस्नुको औचित्य समाप्त भएको भन्दै सरकारलाई चेतावनी दिएका छन् ।

मकवानपुर उद्योग वाणिज्य संघले हेटौँडाका व्यवसायीहरूको चर्को दबाबमा २१ जेठदेखि बजार खुलाउने निर्णय लिएको छ । संघले सोमबार पत्रकार सम्मेलन गर्दै सरकारले आफूहरूको आग्रहलाई बेवास्ता गरेको भन्दै बजार खुलाउने जानकारी दिएको हाे ।

संघका वरिष्ठ उपाध्यक्ष माधव न्यौपानेले पटक–पटक मकवानपुर प्रशासनलाई व्यवस्थित तवरबाट बजार खुलाउने अनुमति माग गरिए पनि सकारात्मक धारणा नआएको भन्दै संघले बाध्य भएर बजार खुलाउने निर्णय गर्नुपरेको बताए । ‘प्रशासनसमक्ष आग्रह गरियो तर, प्रशासनले संघीय सरकारकै अनुमति चाहिने भन्दै हामीलाई बेवास्ता गरिरह्यो, त्यसैले अब बजार खुल्छ’, न्यौपानेले भने ।

११ चैतदेखि जारी लकडाउनले व्यवसायीहरू चरम पीडामा परेको भन्दै सुरक्षा संवेदनशीलता अपनाएर बजार खुलाइने संघले जनाएको छ । ‘रोगले होइन, भोकले मर्ने स्थिति छ’ भन्दै मकवानपुर उद्योग वाणिज्य संघअन्तर्गत सबै वस्तुगत संघहरूले बजार खुलाउने तयारी गरेका हुन् ।

उद्योग वाणिज्य महासंघका केन्द्रीय सदस्य तथा उद्योग वाणिज्य संघ मकवानपुरका पूर्वअध्यक्ष राजकुमार न्यौपानेले उद्योग व्यवसायीहरूको धैर्यधारण गर्ने समय सकिएको बताए । उनले व्यवसाय धरापमा परेको भन्दै बजार खुलाउनुको विकल्प नभएको धारणा राखे ।

व्यवसायीहरूमा बैंक ब्याज, पसल भाडा, कर्मचारी पारिश्रमिक, मौज्दात सामानहरूको म्याद गुज्रिने तथा क्षति हुन सक्ने सम्भावित अवस्थाले मानसिक तनावमा रहेको संघको भनाइ छ । ‘यी सबै अवस्थालाई अबका दिनमा सहन सक्ने स्थिति नआएको हुँदा सरकारले अनुमति नदिए पनि हामी बजार खुलाउने तयारीमा पुगेका हौँ’, वरिष्ठ उपाध्यक्ष न्यौपानेले भने ।

‘२१ जेठदेखि सबै व्यवसायीहरूलाई सुरक्षा अपनाउँदै व्यवसाय सुचारू गर्ने वातावरण मिलाइदिन संघीय सरकारसमक्ष अनुरोध पनि गर्दछौँ’, संघले भनेको छ, ‘उपभोक्ताहरूले पनि सचेत रहँदै सुरक्षा अपनाएर किनमेलमा सहभागी हुन अनुरोध गर्दछौँ ।’

मकवानपुर प्रशासनले हरेक दिन बिहान ९ बजेसम्म अत्यावश्यक वस्तुका पसल खुल्न अनुमति दिएको छ । हेटौँडामा प्रशासनको अनुमति बेगर अत्यावश्यकभित्र नपर्ने पसलहरू पनि खुल्ने गरेका छन् । केही व्यवसायीहरूले प्रशासनको आँखा छलेर आफ्नो व्यवसाय सञ्चालन गर्दै आएका छन् ।

प्रकाशित मिति: सोमबार, जेठ १९, २०७७ १४:११