काेराेनाकाे उच्च जोखिममा रहेको काठमाडौंकै आइसोलेसन र क्वारेन्टाइन खाली

फाइल तस्वीर

A+ A A-

देशमा कोरोना संक्रमितको संख्या दैनिक बढिरहेको अवस्थामा भने मुलुककै केन्द्रीय राजधानी काठमाडौं उपत्यकाका आइसोलेसन र क्वारेन्टाइन खाली छन् ।

बागमती प्रदेशका १३ वटै जिल्ला मध्ये कोरोनाको सबैभन्दा जोखिममा रहेको जिल्ला काठमाडौं हो । हालसम्म याहाँका ७ जनामा कोरोना पोजेटिभ देखिएको छ ।

काठमाडौं प्रदेशका सबै जिल्ला मध्ये सबैभन्दा बढी संक्रमित भेटिएको जिल्ला हो । यहाँ ‘होम’ क्वारेन्टाइनमा बस्नेको संख्या पनि शून्य छ ।

१७ जेठसम्म काठमाडौंका ३ हजार २ सय ७४ जनाको पीसीआरबाट कोरोना परीक्षण गरिएको थियो । जसमध्ये ७ जनामा पोजिटिभ देखिएको हो । अन्यत्र जिल्ला स्थायी ठेगाना भइ काठमाडौं बस्ने ९ जनामा पनि पोजिटिभ देखिएको थियो । ९ हजार ४ सय ५ जनाको आरडीटीबाट परीक्षण गरिएकोमा २ सय ८५ जनामा पोजिटिभ देखिएको प्रदेशको सामाजिक विकास मन्त्रालयले जानकारी दिएको छ ।

विगतका केही दिनदेखि काठमाडौंका आइसोलेसन र क्वारेन्टाइन बेड खाली रहेको मन्त्रालयले जनाएको छ । काठमाडौंमा मात्रै ७ सय ९९ क्वारेन्टाइन र २ सय ४४ आइसोलेसन बेड तयारी अवस्थामा छन् ।

दोलखाका आइसोलेसन र क्वारेन्टाइन पनि खाली छन् । यहाँ पनि ‘होम’ क्वारेन्टाइनमा बस्नेको संख्या शून्य छ । दोलखामा ४ सय ६१ क्वारेन्टाइन र ४१ आइसोलेसन बेड तयारी अवस्थाका छन् ।

केही साताअघि प्रदेशका ६ जिल्लाका क्वारेन्टाइन र आइसोलेसन बेड खाली थिए । देशमा कोरोना संक्रमित बढ्दै गएको अवस्थामा प्रदेशका जिल्लाका क्वारेन्टाइन र आइसोलेसनका बेड पनि भरिँदै गएको छ । प्रदेशभरी मकवानपुरमा सबैभन्दा धेरै १९ जना आइसोलेसनमा बसेका छन् ।

बागमती प्रदेशमा ५ हजार ९ सय ९३ वटा क्वारेन्टाइन र १ हजार ११ वटा आइसोलेसन बेड तयारी अवस्थाका छन् । प्रदेशभरी १ हजार ४७ जना क्वारेन्टाइन र ५३ जना आइसोलेसनमा बसेका छन् । ४ सय ९ जना ‘होम’ क्वारेन्टाइनमा बसेको सामाजिक विकास मन्त्रालयले जानकारी दिएको छ ।

क्वारेन्टाइनमा बस्ने नुवाकोटका धेरै

प्रदेशभरी सबैभन्दा धेरै क्वारेन्टाइनमा बस्ने नुवाकोटका रहेका छन् । नुवाकोटका ३ सय ३१ जना क्वारेन्टाइनमा बसेको सामाजिक विकास मन्त्रालयले जानकारी दिएको छ ।

यहाँ ‘होम’ क्वारेन्टाइनमा बस्नेको संख्या १ सय ५५ रहेको छ । नुवाकोटमा ७ सय ८ वटा क्वारेन्टाइन र १६ वटा आइसोलेसन बेड तयारी अवस्थामा छन् । नुवाकोटमा १ जनामात्रै आइसोलेसनमा बसेका छन् ।

सिन्धुलीमा पनि १ सय ४० जना क्वारेन्टाइनमा बसेका छन् । ३ सय ४ क्वारेन्टाइन र ३२ आइसोलेसन बेड सिन्धुलीमा छ । सिन्धुलीमा १ जनामात्रै आइसोलेसनमा बसेका छन् ।

धादिङका १ सय ४० जना, रामेछापाका १ सय १३ जना र सिन्धुपाल्चोकका १ सय १४ जना व्यक्ति क्वारेन्टाइनमा बसेका छन् ।

धादिङका ६ जना र सिन्धुपाल्चोकका ५ जना आइसोलेसनमा बस्दा रामेछापमा आइसोलेसनमा बस्नेको संख्या शून्य छ ।

प्रकाशित मिति: आइतबार, जेठ १८, २०७७ २१:४१