हेटौंडाकी संक्रमित महिला कोरोना जितेर डिस्चार्ज

A+ A A-

कोरोना भाइरस (कोभिड–१९) संक्रमण पुष्टि भएकी हेटौंडाकी महिला कोरोना जितेर घर फर्किएकी छिन् । भरतपुरको कोरोना विशेष अस्पतालमा उपचार गराएर उनी आइतबार निको भएर घर फर्किएकी हुन् ।

१३ जेठमा हेटौंडास्थित किटजन्य रोज अनुसन्धान तथा तालिम केन्द्रको प्रयोगशालामा पीसीआर रिपोर्ट पोजिटिभ आएपछि उनलाई भरतपुर पठाइएको थियो ।

हेटौंडा-१ चौकिटोलकी संक्रमित महिला र उनका श्रीमानको ९ जेठमा परीक्षणको लागि स्वाब दिएका थिए । तर, सँगै स्वाब दिएको श्रीमतीको रिपोर्ट आएको ६ दिनपछि श्रीमानको आज आइतबार रिपोर्ट आएको छ ।

संक्रमित महिलाकी श्रीमानको पीसीआर रिपोर्ट नेगेटिभ आएको हेटौंडा आइसोलेसन वार्डका इञ्चार्ज भोला चौलागाईंले जानकारी दिए ।

कोरोना संक्रमणको पुष्टि भएकी महिला अस्पतालबाट डिस्चार्ज भएकै दिन उनको श्रीमानको पनि रिपोर्ट आएको छ । संक्रमित व्यक्तिको परिवारको स्वाब परीक्षण प्राथमिकताका साथ गर्नुपर्ने भएता पनि संक्रमित महिलाकी श्रीमानको भने स्वाब दिएको ९ दिनपछि रिपोर्ट आएको हो ।

संक्रमित महिलाको श्रीमानको स्वाब हेटौंडा प्रयोगशालाले पुनः परीक्षणको लागि राष्ट्रिय जनस्वास्थ्य प्रयोगशाला पठाइएको थियो । प्रयोगशालाले १७ जेठसम्म पनि उनको स्वाब परीक्षण नगरेको कारण रिपोर्ट आउन ढिलाई भएको इञ्चार्ज चौलागाईंले जानकारी दिए ।

‘हेटौंडा प्रयोगशालाले उनको रिपोर्ट नेगेटिभ वा पोजिटिभ हो भन्ने विषयमा टुंगो लगाउन नसक्दा पुनः परीक्षणको लागि राष्ट्रिय प्रयोगशाला काठमाडौं पठाइएको थियो । तर, लामो समयसम्म पनि उनको स्वाबको परीक्षण नहुँदा रिपोर्ट आउन ढिलाइ भयो’ इञ्चार्ज चौलागाईंले भने ।

उनका अनुसार संक्रमित महिलाकी श्रीमानले भरतपुरस्थित कोरोना विशेष अस्पतालमा आफ्नो अनुरोधमा शनिवार स्वाब परीक्षण गर्न लगाएका थिए ।

रिपोर्ट नेगेटिभ आएपछि श्रीमतीसँगै उनी हेटौंडास्थित घर फर्किएका छन् । श्रीमान्-श्रीमती नै ९ जेठमा चितवनको भरतपुरबाट हेटौँडा आएका थिए ।

मकवानपुर प्रशासनले संक्रमित महिलाको चौकिटोलस्थित घर भएको टोललाई पनि सिल गरेको थियो । स्वाब परीक्षण गर्न दिएर आइसोलेसनमा बस्नु पर्ने संक्रमित महिला घरमा बस्दै आएकी थिइन् ।

प्रकाशित मिति: आइतबार, जेठ १८, २०७७ १९:३६