कसले लग्यो ९ हजार थान पाल ?

डेढ वर्षीय छोराको साथमा गणेश बैठा र उनकी श्रीमती

A+ A A-

हावाहुरीका कारण घरबारबीहिन बनेका फेटा गाँउपालिका भरवलियाका २ सय ५० परिवारमध्ये अधिकांशले चाउचाउ र बिस्कुट खाएर खुला आकाशमुनि रात बिताएकाछन् ।

फेटाको भरवलियामा नेपाल प्रहरी श्रीमती संघले हिजै पाँच हजार थान त्रिपाल उपलव्ध गराएको भनेपनि आज अपरान्ह १२ बजेसम्मपनि प्रभावित क्षेत्रमा पाल आएको छैन ।

गहृ मन्त्रालयको बिपत व्यवस्थापन शाखाले पनि चार हजार थान त्रिपाल प्रभावित क्षेत्र फेटा पठाएको बताएको थियो । दुबैतर्फबाट पठाइएको भनिएका ९ हजार थान त्रिपाल भने फेटामा छैन ।
नेपाल प्रहरीका प्रवक्ता एसएसपी उमेशराज जोशीले पाल पुगेपनि बितरण नभएको बताएका छन् । तर किन बितरण भएन भन्ने बिषयमा भने उनले कुनै प्रतिक्रिया दिएनन् ।

पाल पठाइएको प्रचार गरेपनि फेटा गाउपालिका भरवलियाका घरवारबीहिन सबैले खुला आकाशमुनि रात बिताए ।

त्रिपाल मात्र होइन भरवलियाका कतिपय पीडितले १७ गते देखि चिउरा र सख्खर मात्र खाएर दिन कटाइरहेकाछन् ।

आज बिहान साढे ११ बजे भरवलिया पुग्दा गणेश बैठा श्रीमती सानी देवी र पाँच छोराछोरीका साथ हुरीले आधा भत्काएको घरमा बसिरहेका थिए ।

डेढ बर्षीया छोरी काखमा बोकेर बसिरहेकी गणेशकी श्रीमती सानीदेवीले भनिन, ‘चिउरा र सख्खर खुवाएर बालवच्चलाई आधा वाँकी रहेको छानोभित्र सुताएर हामी रातभर बाहिरै सुत्यौ ।’ आफुहरुलाई कसैले पाल नदिएको उनीहरुको भनाई छ ।

भरवलियाकै शान्ति देवी दम्पत्तिपनि रातभर खुला आकाशमुनि रात बिताएको बताउँछन् । हुरीका कारण बिद्युत सर्ट भएर उनीहरुको घरमा आगलागी भएको छ । आगलागीले उनीहरुको सवै सम्पत्ति नष्ट भयो । सुत्ने ठाउँ नभएपछि उनीहरुले पनि खुला आकाश मुनि नै रात बिताएको बताए ।

‘आफ्ना केही छिमेकी वाँकी रहेका पक्की घरमा सुत्न गएपनि हामी घरछेउमै रातभर बस्यौ,’ शान्तिदेवीले थपिन, ‘ गाँउमा खान त बनाएर वाँडेका थिए तर नपुगेपछि हामी चाउचाउ, बिस्कुट र चिउरा खाएर बस्यौ’ शान्तिदेवीले शिलापत्रसँग भनिन् ।

हावाहुरी पीडितका लागि नेकपाका संसदले एक दिनको तलव, कांग्रेसका सांसदले दुई दिनको तलव, प्रदेश २ सरकारले प्रतिपरिवार तीन लाख राहत, प्रदेश ३ सरकारले २५ लाख राहत दिने घोषणा गरेपनि ती सवै घोषणा फेटामा अझै कार्यान्वयन भएको छैन ।