हेलिकप्टरको पंखाजस्तो घुमेको त्यो ३ मिनेटको हुरी

हावाहुरीबाट भग्नावशेषमा परिणत भएको बस्ती । तस्बिरहरु : सागर चन्द

A+ A A-

‘साँझ ७ बजेको थियो, घरभित्र छिरेको मात्रै थिएँ, घरसहित मलाई उडाएर खेतमा पुर्यायो,’ भरवलियाका सञ्जय पटेलले भने ‘खेतबाट हेर्दा त आकाशमा धुलो बाहेक केही देखिएन ।’

हुरी धेरै लामो समय पनि चलेन । ‘जम्माजम्मी तीन मिनेट जति आयो होला तर यति जोरले चलेको थियो कि हेलिकप्टरको पंखा घुमेजस्तो’ उनले घटना सम्झिदै भने, ‘त्यही तीन मिनेटले हाम्रो गाउँ त धुलो भइसकेछ ।’

हावाहुरीसँगै असिना पानी पर्यो । भत्किएका घरमा च्यापिएका स्थानीयको उद्धार गर्ने कोही भएन । केही पक्की घरबाहेक सबै घर भत्किएका थिए । ‘सन्नाटाको अवस्था थियो । हामीले त केही सोच्नै सकेनौं, चिच्याइरहेको आवाज अहिले पनि कानमा गुञ्जिरहेको छ’, पटेलले भने, ‘उद्धार गर्न सक्ने अवस्थै थिएन । रात परिसकेको थियो, घरहरु भत्किएका थिए, अन्धकार मात्र ।’

आइतबार साँझ आएको शक्तिशाली हावाहुरीले बारा र पर्सामा विध्वंश मच्चायो । कसैले कल्पना पनि गरेका थिएनन्, हावाहुरीकै कारण यति ठूलो मावनीय र भौतिक क्षति हुन्छ भनेर । चैत बैशाखमा सँधै आउने हावाहुरी नै भन्ठाने सबै । तर त्यो हावाहावारी भने काल बनेर आयो ।

दिनभर काम गरेर थकित घर फर्केका स्थानीय कोही खाना पकाउने तयारीमा थिए कोही खाना खाएर आराम गर्दै । हावाहुरी आयो । यो नौलो लाग्ने कुरा थिएन तर करिब १५ मिनेटपछि त्यही हुरीले बस्ती नै उडायो, आकाशमा धुलो मडारियो । घरहरु गल्र्यामगुर्लुम भए । मान्छेहरुको कोकोहोलो मच्चियो । क्षणभरमै खुसी हरायो । साँझ घरमा जम्मा भएका परिवारका सदस्यहरु छुटे । कति अंगभंग भए । बस्ती नै शाेकमय भयो ।

बाराका भरवलिया, पुरैनिया, हर्दिया, तेलकुवा र धर्मनगरमा ठूलो मानवीय र भौतिक क्षति भयो । सग्ला घर मुस्किलले देखिन्छन भरवलियामा । करिब २ सय ५० घर रहेको यो बस्तीमा मुस्किलले आधा दर्जन घर मात्रै उभिएका देखिन्छन् । हुरीले ढाल्न नसकेका यी घर पनि चोइटिएका छन् । कसैको भित्ता, कसैको छानो त कसैका झ्याल, ढोका छैनन् ।

हावा हुरीले जनधनको क्षति भएको समाचार पाएपछि भरवलिया पुगेका थिए, फेटा स्वास्थ्य चौकीका स्वास्थ्य संयोजक लालबाबु प्रसाद । राति ३ बजे नै भरवलिया छिर्ने बाटोमा पुगेका लालबाबु आफूहरुले प्राथमिक उपचार गर्ने ठाउँसमेत नभेटेको सुनाए ।

‘हामी राति पुग्दा, घरका छाना, पर्खाल सबै छरपष्ट थिए । मान्छेहरु रोएको र चिच्याएको आवाज मात्रै सुनिन्थ्यो,’ यादव सुनाउँछन, ‘हामीले घाईतेलाई राखेर प्राथमिक उपचार गर्ने ठाउँसमेत भेटेनौ ।’

लालबाबुले भनेजस्तै हुरी प्रभावित क्षेत्रका सबैजसो घर लडेका छन् । घरभित्रका सामान सडक र खेतसम्म पुगेर छरिएका छन् । वरिपरिका रुखहरु ढलेर हिँड्नै समस्या थियो । बाँसका झ्याँङ भाँचिएका छन् ।

घरै लडाउने गरी आएको हावाहुरीले विजुलीका पोलहरु ढलेपछि भरवलिया र पुरैनिया क्षेत्रको विद्युत आपूर्ति बन्द भयो । उज्यालो नहुँदा मान्छेहरु आत्तिएर भाग्ने क्रममा धेरै घाइते भएका हुनसक्ने बताउँछन्, लालबाबु ।

नेपाली सेना, प्रहरी र सशस्त्र प्रहरीसँगै छिमेकी गाउँलेले दिनभर प्रयास गर्दा पनि अझै भग्नावशेष हटाउन सकिएको छैनन् । शिलापत्र टोली १९ गते दिउँसो २ बजे भरवलिया पुग्दा घरको भग्नावशेषमा दुई वटा लाश भेटिए । स्थानीयवासीका अनुसार भरवलियामा घटनास्थलमै मृत्यु हुनेको संख्या ९ पुगेको छ । पुरैनियामा घटनास्थलमै १० जनाको मृत्यु भएको स्थानीयवासीले बताएका छन् ।

सिमराबाट वीरगञ्जतर्फ जानो बाटोमा पर्ने चैनपुरमा बस र ट्क पनि हुरीले लडेका छन् । सकड किनारका विद्युत खम्बा ढलेका कारण चैनपुर क्षेत्रमा विद आपूर्ति बन्द भएको छ । बारा र पर्सामा गरी शक्तिशाली हुरीमा मृत्यु हुनेको संख्या २७ पुगेको छ भने ४ सयभन्दा बढी घाइते छन् । घाइतेको विभिन्न अस्पतालमा उपचार भइरहेको छ ।