भूकम्पले भत्किएका १ हजार ३४ घर निर्माण भए

A+ A A-

संखुवासभा जिल्लामा भूकम्पले भत्काएका १ हजार ३४ निजी घर निर्माण सम्पन्न भएका छन् । १२ वैशाख २०७२ मा गएको विनाशकारी महाभूकम्पले जिल्लामा धेरै मानिस घरबारविहीन भएका थिए । महाभूकम्पले धेरै मानिसको घर क्षतिग्रस्त पारेको थियो । भूकम्पले धेरैको घर भत्किएपछि घरबारविहीन हुनुपरेको थियो ।

कालो दिनको रूपमा सम्झिने गरेको महाभूकम्पले धेरै मानिसको उठिबास गराएको थियो । अहिलेसम्म संखुवासभामा भूकम्पले क्षतिग्रस्त १ हजार ३४ घर पुनर्निर्माण भइसकेको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ संवासभाका प्रमुख नवीनकुमार देवले जानकारी दिए । महाभूकम्पले संखुवासभाका १० स्थानीय तहका कुल २ हजार ५ सय ३ निजी घरहरू भत्किएको जिल्ला आयोजना कार्यान्वयन इकाइ प्रमुख देवले बताए । जसमा २ हजार ५७ घर पूर्ण रूपमा क्षतिग्रस्त र ४ सय ४६ घर आंशिक रूपमा भत्किएका थिए ।

राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ संखुवासभाको तथ्याङ्कअनुसार भोटखोला गाउँपालिकामा २४, चैनपुर नगरपालिका १ सय, चिचिला गाउँपालिकामा ४८, धर्मदेवी नगरपालिकामा ७९, खाँदबारी नगरपालिकामा २ सय ९५, मादी नगरपालिकामा १ सय सात, मकालु गाउँपालिकामा १ सय १५, पाँचखपन नगरपालिकामा ९४, सभापोखरी गाउँपालिकामा ६० र सिलिचोङ गाउँपालिका १ सय ६० गरी कुल १ हजार ३४ घर निर्माण सम्पन्न भएको हो ।

भूकम्प प्राधिकरणले क्षतिग्रस्त निजी आवास पुनर्निर्माणका लागि जस्तापाताले छाएको, १ तले, २ कोठे घर पुनर्निर्माण गरिदिने गरेको छ । त्यसका लागि सरकारले प्रतिघर ३ लाख रुपैयाँ अनुदान दिँदै आएको छ । पुनर्निर्माण भएका निजी घरहरूमा मानिसहरू बसोबास गर्न थालिसकेको प्रमुख देवको भनाइ छ । निमार्ण हुन बाँकी रहेका अन्य घरहरू लकडाउनमा पनि निर्माणको काम भइरहेको उनको भनाइ छ ।

प्रकाशित मिति: बिहीबार, जेठ १५, २०७७ ११:३८