चाउचाउ र बिस्कुटको भरमा फेटावासी, रात काट्ने चिन्ता (तस्विरसहित)

A+ A A-

आइतवार रातीको हावाहुरीका कारण घरबाट विस्थापित भएका वारा फेटा गाँउपालिका को भरवलियाका २ सय ५० परिवारले चाउचाउ र बिस्कुट खाएर दिन काटेपनि आजको रात कसरी कटाउने भन्ने अन्योल छ ।

हावाहुरीका कारण गाउँका २ सय ५० मध्ये केही पक्की वाहेक सवै घर पूर्णरुपमा क्षतिग्रस्त छन् । गाउँमा सुरक्षाका तीनबटै अंगले राहत तथा उद्धारको कार्य जारी राखेका छन् ।

प्रदेश सरकारका मन्त्रीहरु घाउँमा घुमिरहेकाछन् । तर अहिलेसम्म वेलुकीको वासका लागि पाल लगायतका सामग्री आइपुग्न सकेको छैन । स्थानीयवासीका अनुसार छिमेकी गाँउका वासिन्दा र स्थानीय संघसंस्थाबाहेकले गाउँमा अहिलेसमम सरकारको तर्फबाट राहतका सामग्री पुग्न सकेको छैन । सुरक्षाकर्मी र राजनीतक दलका नेता कार्यकर्ताको भने बाक्लो उपस्थिति छ ।

सुरक्षाकर्मीसँगै राहत र उद्धारमा स्थानीयवासी जुटेपनि फेटावासीका लागि वेलुकीको बास अन्योल बनेको हो । हावाहुरीले घरका सामानहरु यत्रतत्र छरिएका छन् । बिशेषगरी वृद्धबृद्धा र बालवालिकाको बिचल्ली भएको स्थानीयवासी बताउँछन् ।

आइतबार बारा र पर्सा जिल्लामा आएको हावाहुरीबाट हालसम्म २७ जनाले ज्यान गुमाइसकेका छन् । ज्यान गुमाउने मध्ये १८ जना फेटा गाउँपालिका बासिन्दा छन् । भरवलियाका मात्र ६ जनाले ज्यान गुमाएका छन् ।

फेटा गाउँपालिकाका अध्यक्ष अमिरीलाल प्रसादका अनुसार गाउँपालिकाको ६ नम्वर बडामा सबैभन्दा बढी क्षति भएको छ ।

एक र सात नम्बरमा वडामा समेत ठूलो क्षति भएको उनले बताए । गाउँपालिका अध्यक्षका अनुसार ६ नम्बर वडामा ९ जनाको १ नम्बर वडामा ८ जना र ७ नम्बर वडामा १ जनाको ज्यान गएको छ । पूरै गाउँपालिका शोकमा डुबेको छ । हावाहुरकिा कारण गाँउमा बिद्युत सेवा अवरुद्ध छ भने अधिकांश रुखहरु ढलेकाछन् ।

हावाहुरीले यस्तो बनायो फेटा गाउँपालिकाको भरबलिया गाँउ