जीवन ‘फूल’ कि ‘फुल’ ?

A+ A A-

जिन्दगी फूल (पुष्प) र फुल (हुस्सु) मात्र हुदैन । फूल र फुल बाहिर पनि जिन्दगी धेरै हुन्छ । मान्छे सधैँ फूल वा फुल (हूस्सु) मात्रको घेराबाहिर पुगेर कहिले करुण बन्छ, कहिले कठोर ।

मान्छे फूलसँग जोडिँदा रस, शृंगार आदि पनि सँगै आउलान् । मानिसभित्र रिस राग छन् । सुख दुःख छन् । सबै कुरा यी दुई कुरामा नै सीमित रहन्छन् भन्ने होइन । तर जीवनका धेरै पाटाहरु तिनै फूल र फुलभित्र रहन्छन् ।

फूल मानिसको जीवनको प्रतीक हो जहाँ पात हुन्छ, काँडा हुन्छ, डाँठ हुन्छ र ती सबैलाई जराले अड्याएको हुन्छ । जरा अडिन माटो चाहिन्छ । माटोमा राम्रो बन्न मलजल चाहिन्छ । जीवन पनि त्यस्तै हो, धेरै कुराहरुको समिश्रणबाट नै सिर्जित छ र त सुन्दर छ फूलजस्तै ।

त्यस्तै मानिस सदा इमान्दार, असल र सजगमात्र हुँदैन । जीवनका पाटाहरु हूस्सु भइरहेका हुन्छन् । संसारका इमान्दार र जान्ने भनिएका मानिसहरु पनि कहीँ न कहीँ हूस्सु भइरहेका हुन्छन् । मानिस महान् बन्ने क्रममा नै कति हूस्सु भएका छन् ।

हुन त त्यही हूस्सुपनबाट नै नयाँ–नयाँ कुराको आविष्कार पनि गरेका छन् । त्यसैले पनि हूस्सु हुनु र इमान्दार हुनु मानिसको जीवनमा दिन र रातको भोगाइसरह हो । जीवनको अन्तिम क्षणसम्म मानिसहरु हूस्सु भइरहन्छन् ।

हिटलरजस्तो संसार जित्छु भन्दै हिँड्ने मानिसले पनि एउटा सानो कुरामा हूस्सु भएकै कारण जीवनमा धेरै दुःख भोग्नु परेको हो । विश्वका महान् मानिने बुद्ध, ओशो, स्वामी विवेकानन्द पनि धेरैचोटि हूस्सु भएका छन् तर उनीहरु त्यही हूस्सुबाट बिस्तारै आफूलाई माथि उठाउन सकेर मात्र सफल मानिस भएका हुन् र जीवनलाई फूल बनाएका हुन् ।

म पनि धेरै ठाउँमा हूस्सु भएको छु, जीवनमा मूर्ख नबन्ने मानिसहरु सफल पनि हुँदैनन् । कहिले सामान किन्दा पसलेले नै हूस्सु बनाउँछ, कहिले आफ्नै सुरमा रहेको बेला आफू नै हूस्सु हुन्छु । कलम गोजीमा हुँदा कलम खोज्छु । लेख्न मन पराउने मान्छे भएर होला कहिलेकाँही त खाना खाएर नचुठी कलम समाउन पुग्दो रहेछु । यो म आँफैले आँफैलाई बनाएको हूस्सू हो ।

तर पछिल्लो समय अप्रील फुलको नाउँमा मानिसको संवेदनशीलतालाई नबुझी दुख, पीडा दिने काम गर्छन् त्यो एकदमै नकरात्मक कुरा हो ।

कसैलाई झुक्याउँदा पनि दुवै पक्षलाई रमाईलो हुन्छ भने रमाईलोका लागि मात्रै हो भने त्यो झुक्याई पनि अति सुन्दर हुन्छ तर कहिलेकाँही मानिसहरु अरुको संवेदनशीलतालाई रमाईलो बनाउन खोज्छन् भने त्यसले अर्को दुर्घटना निम्त्याउन सक्छ । त्यसैले अप्रील फुलको सन्दर्भ झिकेर अरुलाई हुस्सु बनाउने नाउँमा कसैलाई पनि प्रयोग नगरौं ।

त्यसैले झुक्याउने नाउँमा कुनै दुर्घटना निम्त्याउने खालका गतिविधि नहुने गरी सकरात्मक पक्षमा आफ्नो मिल्ने साथीलाई केही शारिरीक कसरत गराईन्छ वा रमाईलो गराईन्छ भने त्यसले चाँही जीवनमा केही सुन्दरता थप्न अवश्य मद्दत गर्छ ।

(ज्योति तिलाञ्जलीसँगको कुराकानीमा आधारित)

प्रकाशित मिति: मंगलबार, चैत १९, २०७५ ०१:४७