रेमडेसिभिरको क्लिनिकल परीक्षण गर्न बेलायतको अनुमति

A+ A A-

बेलायतको स्वास्थ्य सेवा एनएचएसले कोरोना भाइरसका बिरामीका लागि रेमडेसिभिर औषधि उपलब्ध गराउने भएको छ ।

बेलायती स्वास्थ्यमन्त्री म्याट हेनककले बेलायतले कोभिड–१९ का विरामीका लागि रेमडेसिभिर औषधिको क्लिनिकल परीक्षण सुरु गर्न लागेको जानकारी दिएका हुन् ।

उनले कोरोना महामारी सुरु भएपछि बिरामीको उपचारका लागि उठाइएको यो अहिलेसम्मकै सबैभन्दा ठूलो कदम हुने बताए ।

बेलायती विज्ञहरुले यो औषधिको प्रयोगलाई लिएर पर्याप्त प्रमाण रहेको र चर्चित कोभिड–१९ अस्पतालमा यसको प्रयोग गर्ने अनुमति दिन सकिने उनले बताए ।

औषधिको उपलब्धता कम भएका कारण अत्यावश्यक परेका बिरामीलाई मात्रै यो औषधी दिइनेछ । अमेरिका र र जापानमा समेत यो औषधि प्रयोग गरिएको थियो ।

यद्यपि स्वास्थ्य विज्ञले कोभिड–१९ का बिरामीको उपचारका लागि रेमडेसिभिर कुनै अचुक औषधि नभएको चेतावनी दिइसकेका छन् ।
रेमडेसिभिर अमेरिकाको कम्पनी गिलिड साइन्सेजले विकसित गरेको थियो र यो इबोलाको उपचारका लागि निर्माण गरिएको थियो । हालै अमेरिकामा भएको एक अध्ययनमा रेमडेसिभिर औषधि गम्भीर बिरामीको छिटो स्वास्थ्य अवस्था सुधार गर्न सहयोगी रहेको पाइएको थियो ।

विश्व स्वास्थ्य संगठनका डाक्टर ब्रुस आइलवर्डले चीनको भ्रमणपछि रेमडेसिभिर औषधि नै कोरोनाका बिरामीका लागि सहयोगी पाइएको बताएका थिए । रेमडेसिभिरले शरीरमा भाइरस प्रवेश गरेर विकसित हुने वातावरणलाई नष्ट गरिदिन्छ ।

संसारका केही देशमा रेमडेसिभिर औषधिको क्लिनिकल परीक्षण भइरहेको छ । परीक्षणमा प्राप्त तथ्यांकअनुसार यो औषधिले बिरामीलाई निको हुन लाग्ने समय चार दिनसम्म कम गर्ने पाइएको छ ।

यद्यपि यो औषधिले धेरै मानिसको ज्यान बचाउन सक्छ भन्नेबारेमा भने केही पुष्टि भइसकेको छैन भने बेलायतका लागि गिलिड साइन्सेजले कति औषधि भण्डारण गरेर राखेको छ भन्ने पनि स्पष्ट छैन । बेलायतमा डाक्टरको सल्लाहमा मात्रै यो औषधि दिइनेछ ।

प्रकाशित मिति: बुधबार, जेठ १४, २०७७ ०७:५६