लकडाउन खुकुलो हुन थालेपछि तेलको मूल्य बढ्न थाल्यो

A+ A A-

कोरोना भाइरसको महामारी नियन्त्रणका लागि गरिएको लकडाउन खुकुलो हुँदै जाँदा त्यसको असर तेलको मूल्यमाथि पर्न थालेको छ । अन्तर्राष्ट्रिय बजारमा बनेको साझा समझदारीका कारण कच्चा तेलको मूल्य बढ्न थालेको हो ।

ठूला तेल उत्पादक राष्ट्रबीच उत्पादनमा कटौती जारी राख्ने र लकडाउन विस्तारै खुकुलो हुँदै गएपछि तेलको मूल्य र माग विस्तारै बढ्ने तथा त्यसपछि उत्पादन वृद्धि गर्ने साझा समझदारी बनेको छ ।

आगामी दिनमा विमान र गाडीले खपत गर्ने तेलका लागि केही देशले भण्डारण सुरु गरेका छन् । यो परिस्थिति र सम्भावनाको असर मंगलबार अन्तर्राष्ट्रिय तेल बजारमा देखिएको छ ।

वेस्ट टेक्सास इन्टरमिडिएटमा कच्चा तेलको मूल्यमा ३.२ प्रतिशतले वृद्धि भएको छ । जसका कारण प्रति ब्यारेल १.६ डलरको नाफा हुने देखिएको छ । अब कच्चा तेलको मूल्य ३४.३१ डलर प्रतिब्यारेल भएको छ ।

अमेरिकामा सोमबार ‘मेमोरियल डे’ को बिदा भएका कारण वेस्ट टेक्सास इन्टरमिडिएटले मूल्य निर्धारण गरेको थिएन । अन्तर्राष्ट्रिय बेन्चमार्क ब्रेन्टमा पनि कच्चा तेलको मूल्यमा १.७ प्रतिशतले वृद्धि भएर प्रतिब्यारेल ३६.१२ डलर भएको छ ।

गत अप्रिलमा रुस र साउदी अरबले तेलको उत्पादनमा वृद्धि गरेपछि वैश्विक आपूर्तिसमेत प्रभावित भएको थियो ।

त्यसपछि १२ अप्रिलमा अमेरिकी राष्ट्रपति डोनाल्ड ट्रम्पको दबाबपछि संसारका ठूला तेल उत्पादक राष्ट्रबीच सम्झौता भएर तेलको उत्पादनमा कटौती गर्ने सहमति भएको थियो ।

तेल उत्पादक राष्ट्रहरूको संगठन ओपेक, रुस र अन्य सहयोगी तेल उत्पादक देशले ओपेक प्लस नामको समूह बनाएका थिए । जसमा उनीहरूबीच आफ्नो उत्पादनमा कटौती गरेर वैश्विक उत्पादनको करिब १० प्रतिशतबराबर राख्ने सहमति भएको थियो ।

अस्ट्रेलिया र न्युजिल्यान्ड बैंकिङ समूहका वरिष्ठ रणनीतिकार डेनियल हाइन्सले ओपेक प्लसले तेल उत्पादनमा कटौती गर्ने निर्णय सबैको हितमा भएकाे बताएका छन् ।

तेलको मूल्य बढाउन उत्पादनमा कति कटौती जारी राख्ने भन्ने विषयमा छलफलका लाग आगामी जूनमा ओपेक प्लसको बैठक बस्दै छ । तेल उत्पादकहरूले मे र जूनमा तेल उत्पादनमा कटौती गर्ने सहमति गरेका थिए ।

सबै उत्पादक देश तेलको मूल्य छिट्टै सामान्य हुनुपर्ने पक्षमा छन् । हाल तेलको जुल मूल्य अन्तर्राष्ट्रिय बजारमा रहेको छ, त्यो यस वर्षको सुरुमा निर्धारण गरिएको मूल्यभन्दा ४५ प्रतिशत कम छ ।

प्रकाशित मिति: मंगलबार, जेठ १३, २०७७ १७:२४