सुरक्षाकर्मी कोरोनाको उच्च जोखिममा, अहिलेसम्म २२ जनामा संक्रमण पुष्टि

फाइल तस्वीर

A+ A A-

कोरोना भाइरस (कोभिड–१९) को नियन्त्रण तथा रोकथामा खटिएका सुरक्षाकर्मी नै एकपछि अर्को गर्दै कोरोना संक्रिमत हुन थालेका छन् । अहिलेसम्म फ्रन्टलाइनमा रहेर काम गर्ने स्वास्थ्यकर्मीभन्दा बढी सुरक्षाकर्मी काेराेनाबाट संक्रमित भएका छन् ।

मंगलबार बारामा कोरोना पुष्टि भएका ५ मध्ये २ जना नेपाली सेनामा कार्यरत रहेको खुलेको छ । बाराको पचरौता नगरपालिकाको क्वारेन्टाइन सुरक्षार्थ खटिएका २ जना सैनिक जवानमा कोरोना पुष्टि भएको हो ।

दुई दिनयता जिल्ला प्रहरी कार्यालय बाराका १ प्रहरी निरीक्षकसहित ७ जनामा कोरोना पुष्टि भएको छ ।सुरूमा १ जना प्रहरी जवानमा कोरोना पोजिटिभ देखिएपछि जिल्ला प्रहरी कार्यालयका ५१ जना प्रहरीको कोरोना परीक्षण गरिएको थियो ।

तीमध्ये अन्य ६ जना प्रहरीमा कोरोना पोजिटिभ देखिएको हो ।

त्यसरी नै गत बुधबार महानगरीय प्रहरी वृत्त कालिमाटीका २ जना प्रहरीमा कोरोना संक्रमण पुष्टि भएकाे थियाे ।

त्यसपछि वृत्तका अन्य सबै प्रहरीको शुक्रबार कोरोना परीक्षण गरिएको छ । उनीहरूको रिपोर्ट आउन भने बाँकी छ ।

यसरी कोरोना नियन्त्रण गर्न खटिएका नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धान विभाग गरी २२ जना सुरक्षाकर्मीमा कोरोना भाइरसको संक्रमण पुष्टि भएको छ ।

संक्रमितमध्ये धेरै नेपाल प्रहरीका छन् ।

नेपाल प्रहरीका १३ जना सुरक्षाकर्मीमा काेराेना संक्रमण पुष्टि भइसकेकाे छ । त्यस्तै, नेपाली सेना र सशस्त्र प्रहरीका ४–४ जना सुरक्षाकर्मीमा कोरोना पुष्टि भएको छ । उता, राष्ट्रिय अनुसन्धान विभागमा पनि १ जनामा कोरोना पुष्टि भएको विभागले जनाएको छ ।

कोरोना भाइरस रोकथामका लागि फ्रन्टलाइनमा खटिने सुरक्षाकर्मी नै कोरोना भाइरस संक्रमित हुन थालेपछि सबै सुरक्षा निकायले उच्च सर्तकता अपनाएका छन् ।

नेपाली सेना, प्रहरीले बिदाबाट फर्केकाहरूलाई सेल्फ क्वारेन्टाइनमा राख्नेदेखि फिल्डमा खटिँदा उच्च सर्तकता अपनाएर काम गर्न निर्देशन दिएको छ ।

प्रहरीले बिदाबाट फर्केका सुरक्षाकर्मीको कोरोना परीक्षणसमेत सुरू गरेको नेपाल प्रहरीका प्रवक्ता प्रहरी नायव महानिरीक्षक (डीआईजी) निरजबहादुर शाहीले बताए ।

स्वास्थ्यकर्मीभन्दा सुरक्षाकर्मी बढी प्रभावित

कोरोना संक्रमितको पछिल्लो तथ्याङ्क हेर्दा कोरोना उपचारका लागि खटिएका स्वास्थ्यकर्मीभन्दा राेकथामका लागि खटिएका सुरक्षाकर्मी बढी प्रभावित देखिएका छन् ।

२२ जना सुरक्षाकर्मीमा कोरोना पुष्टि हुँदा स्वास्थ्यकर्मीकाे तथ्याङ्क भने निकै न्यून छ । सरकारले दिएकाे जानकारी गराएअनुसार अहिलेसम्म १ जना स्वास्थ्यकर्मीमा मात्र कोरोना पुष्टि भएको छ । कपिलवस्तुकी एकजना स्टार्फ नर्समा कोरोना पोजिटिभ देखिएकी थिइन् ।

कुनै मानिसको स्वास्थ्य अवस्थाबारे जानकारी नै नलिई विभिन्न कारणले आममानिससँग बढी घुलमिल हुनुपर्ने भएकाले स्वास्थ्यकर्मीभन्दा प्रहरीलाई जोखिम बढी देखिएको महानगरीय प्रहरी कार्यालय रानीपाखेरीका प्रमुख डीआईजी विश्वराज पोखरेलको भनाइ छ ।

‘कहिले विभिन्न आपराधिक गतिविधि भइरहेको हुन्छ । कतै जुलुस हुन्छ । त्यसलाई नियन्त्रण गर्नैपर्छ । कुनै मानिसमा कोरोना छ वा छैन्, हामीलाई थाहा हुँदैन । भीडभाड हुँदा नियन्त्रण गर्न प्रहरी नै जानुपर्छ, त्यसकारण फ्रन्टलाइनको प्रहरी उच्च जोखिममा छ', डीआईजी पोखरेलले भने ।

प्रहरीको तुलनामा स्वास्थ्यकर्मीले बिरामीको सबै हिस्ट्री खोजेर उपचार प्रक्रिया अगाडि बढाउने भएकाले उनीहरूमा केही जोखिम कम रहेको पोखरेलको भनाइ छ ।

प्रकाशित मिति: मंगलबार, जेठ १३, २०७७ १३:०४