मैले चिया पकाउन सिकेँ नि ! तिमीले ?

A+ A A-

मेरो नाम सिस्टम भण्डारी हो । मेरो घर इलाम हो । अहिले कीर्तिपुरमा बस्छु । म एलआरआई स्कुलमा कक्षा ३ मा पढ्छु । अहिले लकडाउन छ भन्नुहुन्छ बाबा । त्यही भएर हामी घरमै बसेका छौँ ।

बाहिर बाटोमा धेरै साथीहरू खेल्छन् । तर, मलाई अहिलेको समयमा यो ठीक लाग्दैन । पहिला जान मन लाग्थ्यो। तर, समाचारमा कोरोना भाइरस लागेका मान्छेका समाचार सुनेपछि मलाई जानै मन लागेन । म त जान्नँ । म मेरा साथीलाई पनि नजाऊ भन्छु । तर, केही हुन्न भन्दै खेल्छन्, खालि ।

म मेरो दादा दिदीसँग सहयोग मागेर घरमा भएका विभिन्न पुराना सामग्रीको प्रयोग गरेर नयाँनयाँ कुरा बनाउन सिक्न थालेको छु । मैले यो मेरो लेखसँगै पठाएका फोटा मैले नै बनाएको हुँ ।

मैले पुरानो कार्डबोर्डबाट फूल राख्ने भास, अनि पुरानो पेपरको फूल बनाएर सजाउन सिकेँ । यस्तै, पुरानो पेपरबाट विभिन्न प्रकारका बास्केटहरू पनि बनाएर घरमा सजाएकी छु ।

ढोकामा झुन्ड्याउने विभिन्न सामग्री पनि घरमा भएका मामुका पुराना चुरा पोतेहरूबाट बनाउन सिकेँ । त्यस्तै, मैले सेतो पेपरमा विभिन्न प्रकारका नक्सा पनि बनाउन सिकेँ ।

आज म तपाईंहरूलाई यो सबै देखाउँछु ल !

मैले मामु र दिदीबाट किचेनमा गरिने काम पनि अलिअलि सिकेँ । मलाई चिया पकाउन पनि आउन थाल्यो । कालो चिया बनाउन सजिलो लाग्छ, दूधको भन्दा ।

मलाई प्याज, गोलभेँडा काट्न, मसिना कप सफा गर्न पनि आउन थाल्यो । मेरो मामुले मलाई सिकाउनुभयो, अनि मैले जानेको क्या !

थाहा छ, मैले युट्युब हेरेर मामुसँगै मीठोमीठो खानेकुरा पकाउन पनि अब अलिअलि आउन थाल्यो नि !

बाबा र मामुले मलाई अरु साथीहरूसँग कस्तो व्यवहार गर्ने, कसरी बोल्ने, कसरी खेल्ने भनेर पनि सिकाउनु भा'छ । मलाई बाबामामुले यो सिकाउँदा स्कुलमा मिसले सिकाएजस्तै लाग्छ ।

बाबाको ल्यापटपमा म युट्युब आफैँ खोल्छु । पेन्ट पनि गर्छु । कार्टुन हेर्छु, रमाइला कुरा पनि हेर्छु ।

मेरा साथीहरूलाई पनि घरमै बस्नु भनेको, तर मान्दैनन् । उनीहरूका बाबामामुले पनि मेरो बाबमामुले जस्तै सिकाउनु नभएर होला उनीहरू फोहोरमा खेलेका के !

म जुमबाट अनलाइनमा पढ्न थालेकी छु नि । दिनको ३ घण्टा त्यसमै रमाउँछु । साथीहरूसँग बोल्ने गफ गर्ने गर्छु । म्यामले धेरै कुरा सिकाउनुभएको छ । म्याम तपाईंलाई धेरै धन्यवाद भन्छु । मलाई घरमा बोर भइरहेको थियो, अनलाइनबाटै धेरै कुरा सिकाइदिनु भो । तपाईंहरूले दिएको होमवर्क पनि गरेकी छु मैले ।

मजस्तै घरमै बसेर धेरै कुरा मेरा साथीहरूले पनि सिक्नुपर्छ नि होइन ?

मैले लेखेको कुरा टाइप गरिदिनुभएकोमा बाबालाई धन्यवाद ।